U abnoŭleny sankcyjny śpis trapiŭ šerah tavaraŭ bytavoj chimii. Što nielha budzie ŭvozić?

U 18-m pakiecie sankcyj, jakija Jeŭrasajuz uvioŭ 18 lipienia, apynulisia nie tolki čatyry biełaruskija banki i niekalki pradpryjemstvaŭ, źviazanych z rasijskaj vajennaj pramysłovaściu, ale i novyja mytnyja kody tavaraŭ, pastaŭku jakich u Biełaruś zabaranili.

Siarod novych fihuruje kod 3402, jaki adpaviadaje arhaničnym pavierchnieva-aktyŭnym rečyvam (PAR), čyściačym i myjnym srodkam (akramia myła — kod 3401), a taksama čyściačym preparatam, navat tym, što źmiaščajuć myła.

Prostymi słovami — šmatlikija srodki bytavoj chimii.

Pastaŭščyk padobnych tavaraŭ u Biełaruś, jaki nakiravaŭ zapyt u polskuju mytniu i atrymaŭ tłumačeńni, kaža, što pad zabaronu trapiŭ šerah papularnych marak.

Naprykład, takija srodki dla myćcia posudu, jak Morning Fresh.

Taksama pad zabaronu na pastaŭki ŭ Biełaruś traplajuć šmatlikija suchija i vadkija pralnyja paraški, šampuni i hieli dla duša. Srodki dla myćcia padłohi, vannaha pakoju i hetak dalej, kali jany ŭtrymlivajuć paviarchoŭna-aktyŭnyja rečyvy (PAR).

Aproč srodkaŭ dla myćcia, pad zabaronu trapili aśviažalniki dla bializny, takija jak Lenor, i navat parfuma dla bializny.

Ale ŭsie hetyja zabarony biełaruskija spažyŭcy adčujuć nie adrazu.

Na praciahu šaści miesiacaŭ z momantu pryniaćcia abmiežavańniaŭ budzie dziejničać pierachodny pieryjad. Takim čynam, da 21 studzienia 2026 hoda pastaŭščykam dazvolena ekspartavać vyšejzhadanyja tavary ŭ Biełaruś, kali damova była zaklučana da 20 lipienia 2025 hoda.

Z ulikam hetaj akaličnaści pastaŭščyki buduć namahacca pastavić maksimum pradukcyi, kab zabiaśpiečyć składy zapasami. 

Surazmoŭca ź liku pastaŭščykoŭ kaža, što pry vialikim žadańni biznes zmoža abyści hetaje abmiežavańnie. Adnak, pakolki lubyja sproby abychodu sankcyj pavyšajuć kančatkovy košt tavaru, moža paŭstać pytańnie pra metazhodnaść takich pastavak.

Tamu biznesmien nie vyklučaje, što zvykłaja bytavaja chimija źniknie z prodažu, a na jaje miesca pryjduć tavary kitajskaj, rasijskaj i biełaruskaj vytvorčaści.

Jak i ŭsie papiarednija abmiežavańni, raspaŭsiudžvajucca jany ŭ tym liku i na fizičnych asob.

Heta aznačaje, što śpis tavaraŭ, jakija maje sens vieźci z Polščy abo Litvy, staŭ jašče mienšym. U admysłovych čatach, dzie razdajuć tavary na pierakidvańnie praź miažu, taksama adznačajuć, što apošnimi dniami polskaja mytnia na miažy nie afarmlaje VAT na bytavuju chimiju. Mašyny z takimi tavarami mohuć viarnuć u Polšču.

• 5
• 0
• 1
• 6
• 0
• 1
• 0
• 0