Łukašenka pra pavietranyja šary ź Biełarusi: Ja razmaŭlaŭ ź lotčykami, dla samalotaŭ nijakaj prablemy niama
Na pasiadžeńni Rady biaśpieki palityk siońnia prakamientavaŭ situacyju z pavietranymi šarami kantrabandystaŭ, što zalatajuć u Litvu ź Biełarusi i, u tym liku, paralizujuć pracu aeraporta ŭ Vilni.
«Za hety čas, jak mnie paviedamili śpiecyjalisty, pytańnie prapracavana surjozna, navat da piłotaŭ hramadzianskaj avijacyi. I toje, što siońnia nam vystaŭlajuć litoŭcy, — heta niemahčyma, heta nierealna. Navat kali b hetyja šary tudy zalatali, navat kali b jany latali, ja razmaŭlaŭ ź lotčykami, jany kažuć: «Heta nijakaj prablemy nie ŭjaŭlaje», — skazaŭ Łukašenka.
Pavodle jahonych słovaŭ, litoŭskija palityki prablemu pačynajuć nahniatać, prablemu pačynajuć palityzavać.
«Navošta? Uźnikaje pytańnie. Ci sapraŭdy chočuć vajavać? Nam vajna nie patrebnaja. Upeŭnieny, što i litoŭskamu narodu taksama vajna nie patrebnaja, jak i palakam, łatyšam i estoncam. My navajavalisia, dastatkova ŭžo. Stolki ludziej stracili, jašče žyvyja pakaleńni, jakija bačyli hetuju vajnu. Nam vajna nie patrebnaja!» — skazaŭ Łukašenka.
«Kali jany sprabujuć raźviazać tut niejki kanflikt, naŭrad ci ŭ ich niešta atrymajecca. My z narodam Litvy zaŭsiody damovimsia, jak i z palakami. Heta našy ludzi. A kali chočacie narmalnych adnosin — siadajcie za stoł pieramovaŭ i abmiarkoŭvajcie hetyja prablemy. My da hetaha hatovyja. Inšych varyjantaŭ niama. I naŭrad ci źjaviacca», — dadaŭ Łukašenka.
«My bačym, što adbyvajecca vakoł. I siońnia nam treba aktualizavać svaje abarončyja dziejańni, kab usie bačyli, i pierš za ŭsio naš narod, što my hatovyja abaraniać kožny kavałak našaj ziamli», — zaklučyŭ palityk.
Siońnia ŭrad Litvy abviaściŭ režym nadzvyčajnaj situacyi praz prablemy z šarami.
Kamientary