Dziciačy łahier pad Minskam kupili za miljon dalaraŭ, ale ŭžo praz paru miesiacaŭ viarnuli nazad
U kastryčniku źjaviłasia infarmacyja, što były łahier «Kiraviec» pad Minskam pradali z aŭkcyjonu amal za miljon dalaraŭ. Ciapier ža stała viadoma, što pakupnik nie raźličyŭ svaich mahčymaściaŭ i admoviŭsia ad pakupki. Atmaśfierny dziciačy «sanatoryj» na Minskim mory znoŭ trapiŭ na tarhi «BUTB-majomaść», piša Realt.by.
Znachodzicca były łahier «Kiraviec» u Minskim rajonie, u lasnym masivie pobač ź vioskaj Zialonaje Ždanovickaha sielsavieta. Adlehłaść ad MKAD — kala 10 kiłamietraŭ. Da plažaŭ Minskaha mora — kala 2 kiłamietraŭ.
Hety dziciačy łahier pabudavali jašče ŭ 1960‑ch hadach. Raniej ustanova naležała Minskamu stankabudaŭničamu zavodu imia Kirava. Za čas jaho pracy tut paśpieła adpačyć nie adno pakaleńnie minčukoŭ. Łahier ź pijanierami na ŭjeździe funkcyjanavaŭ da pačatku 2000-ch, a zatym staŭ pastupova pieratvaracca ŭ całkam zaniadbanaje miesca.
Ciapier na terytoryi 6,5 hiektaraŭ mieścicca bolš za dziasiatak raznastajnych pabudoŭ. U asnoŭnym heta byłyja žyłyja karpusy (draŭlanyja damki), a taksama roznyja haspadarčyja pabudovy (miedpunkt, łaźnia, biblijateka) toj ci inšaj stupieni zachavanaści.
Za apošnija hady abjekt ź dziasiatkam damkoŭ nie raz pierachodziŭ z ruk u ruki. Tak, z 2010 hoda ŭčastkam vałodała kampanija «Interfinbud», ale z-za biaździejnaści łahier u jaje kanfiskavali.
U 2025‑m «Kiraviec» trapiŭ na tarhi i byŭ paśpiachova pradadzieny za rekordnuju sumu ŭ 2,9 miljona rubloŭ (kala 980 tysiač dalaraŭ). Jak paviedamlali tady ŭ «BUTB-Majomaść», novym ułaśnikam zakinutaha łahiera stała pryvatnaja kampanija, jakaja zajmajecca vyrabam i realizacyjaj mebli. Ale, na žal, krychu paźniej pakupnik admoviŭsia ad pakupki.
Ciapier pusty łahier z raznastajnymi pabudovami ahulnaj płoščaj kala 1200 kvadrataŭ znoŭ vystaŭleny na elektronnyja tarhi. Pačatkovy košt kompleksu składaje 44,5 tysiačy rubloŭ (kala 15 tysiač dalaraŭ).
Aŭkcyjon pa prodažy łahiera projdzie 24 śniežnia.
Razam z budynkam novy ŭładalnik atrymaje ŭčastak amal u 7 hiektaraŭ. Jaho pieradaduć u arendu na 30 hadoŭ.
Novy ŭładalnik abaviazany harantavać biaśpieku i abmiežavańnie dostupu na abjekt, padtrymlivać naležny sanitarna-techničny stan terytoryi, pravieści rekanstrukcyju abo źnieści staryja pabudovy, uvieści novy abjekt u ekspłuatacyju i vykarystoŭvać jaho pa pryznačeńni, jakoje vybiera Minski rajvykankam.
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach53
Kamientary