U toj čas jak bolšaść dziaciej jaho ŭzrostu jašče nie pačynaje vučycca čytać, trochhadovy Sarvahja Sinhch Kušvacha ŭžo stvaraje składanyja stratehii, jak pastavić mat sapierniku. Hety mały ź indyjskaha horada Sahar jašče chodzić u dziciačy sadok, ale ŭžo ŭvajšoŭ u historyju suśvietnaha sportu.
Va ŭzroście ŭsiaho 3 hadoŭ, 7 miesiacaŭ i 20 dzion maleńki žychar horada Sahar (štat Madchja-Pradeš) Sarvahja Sinhch Kušvacha (Sarwagya Singh Kushwaha) atrymaŭ startavy rejtynh na 1572 punkty pa chutkich šachmatach (rapid), što značna vyšej za minimalny paroh 1400. Chłopčyk aficyjna ŭvajšoŭ u historyju jak samy małady šachmatyst, jaki atrymaŭ rejtynh Mižnarodnaj šachmatnaj fiederacyi (FIDE). Hetym dasiahnieńniem jon pabiŭ rekord svajho suajčyńnika Aniša Sarkara, ustanoŭleny letaś u listapadzie.
Jak piša vydańnie The Indian Express, kab prosta daciahnucca da fihur na procilehłym baku pola, chłopčyku davodzicca stanavicca na kresła abo navat siadzieć na viežy z troch kresłaŭ, pastaŭlenych adno na adno. Adnak Sarvahja hulaje ahresiŭna: jon hučna stukaje fihurami pa kletkach i mocna bje pa hadzińniku, demanstrujučy sapiernikam svaju ŭpeŭnienaść.
Kab atrymać rejtynh FIDE, hulec pavinien nabrać bały ŭ hulniach suprać jak minimum piaci rejtynhavych sapiernikaŭ na aficyjnych turnirach. Sarvahja vykanaŭ hety narmatyŭ, pieramohšy takich darosłych sapiernikaŭ jak 22‑hadovaha Abchidžyta Avastchi (rejtynh 1542), 29‑hadovaha Šubchama Čaŭrasiju (rejtynh 1559) i 20‑hadovaha Johieša Namdeva (rejtynh 1696).
Jak piša vydańnie, chłopčyk paznajomiŭsia z šachmatami ŭ dva z pałovaj hady. Jaho baćka, Sidchart, zaŭvažyŭ, što rozum syna ŭbiraje infarmacyju jak hubka — usiaho za tydzień mały vyvučyŭ nazvy ŭsich fihur. Ciapier hrafik Sarvahji ŭklučaje 4—5 hadzin zaniatkaŭ štodzień: hadzina ŭ šachmatnym centry, a astatni čas — anłajn-hulni i vyvučeńnie taktyki pa videa.
«Kali razbudzić jaho pasiarod nočy i paprasić zhulać, jon budzie siadzieć za doškaj hadzinami bieź pierapynku. Jaho adroźnivaje ad inšych dziaciej nievierahodnaja ciarplivaść», — adznačaje baćka Sidchart Sinhch.
Congratulations to Sarvagya Singh Kushwaha for becoming the World's Youngest Fide Rapid Rated Player!
Sarvagya was born in 2022
He creates history by becoming a FIDE rated player at “3 years, 7 months and 20 days”
Incredible! pic.twitter.com/VqS49Au3uK
Tym nie mienš praca z takim junym hienijem patrabavała asablivaha padychodu. Trenier uspaminaje, što spačatku lubaja strohaść davodziła małoha da śloz. Tady nastaŭnik prymianiŭ chitraść: za kožny pravilny chod jon davaŭ chłopčyku cukierku ci pačak čypsaŭ. Hetaja matyvacyja spracavała, i nieŭzabavie talent Sarvahji pačaŭ raskryvacca napoŭnicu.
Dla paraŭnańnia: eks-čempijon śvietu Mahnus Karłsen pačaŭ hulać u piać hadoŭ, indyjskaja lehienda Višvanatan Anand — u šeść. A Hukieš Damaradžu, jaki ŭ 2024 hodzie staŭ samym maładym čempijonam śvietu va ŭzroście 18 hadoŭ, sieŭ za došku ŭ siem. Na hetym fonie trochhadovy rejtynhavy šachmatyst vyhladaje amal nievierahodna.
Ciapier, jak adznačaje vydańnie, kamanda chłopčyka nacelena na toje, kab pabić rekord amierykanca Abchimańju Mišry, jaki staŭ samym maładym hrosmajstram u historyi ŭ 12 hadoŭ, 4 miesiacy i 25 dzion. Trenier Sarvahji ličyć takuju płanku realnaj, zajaŭlajučy: «My chutka pačniem šukać inšych trenieraŭ, moža, dałučym anłajn-śpiecyjalistaŭ. Budziem pracavać na hety vynik».
Kamientary