Paramount, uznačaleny blizkim da Trampa miljarderam, ustupiŭ u baraćbu z Netflix za Warner Bros

Pa słovach Paramount, jaje prapanova źjaŭlajecca «bolš vyhadnaj alternatyvaj» ździełcy z Netflix, zabiaśpiečvajučy akcyjanieram nie tolki bolš vysokuju canu, ale i bolš vysokija šancy na adabreńnie rehulatarami. Zhodna z dakumientami, pradstaŭlenymi ŭ Kamisiju pa kaštoŭnych papierach i biržam, siarod finansavych partnioraŭ Paramount, jakija ŭdzielničajuć u ździełcy, ličycca ziać prezidenta Donalda Trampa Džared Kušnier.

Na minułym tydni Netflix abviaściŭ ab kupli kinastudyi i stryminhavych sietak Warner Bros za 72 młrd dalaraŭ. Čakałasia, što ździełka budzie zakryta paśla raniej anansavanaha vyłučeńnia padraździaleńnia WBD Discovery Global u novuju publičnuju kampaniju, aryjentyrovačna ŭ trecim kvartale 2026 hoda.

Tramp skazaŭ, što sa ździełkaj Netflix «mohuć uźniknuć prablemy», spasyłajučysia na aściarohi z nahody kankurencyi z-za doli rynku, jakuju kantralujuć Netflix i Warner Bros.

U intervju CNBC u paniadziełak uładalnik Paramount Devid Elisan raspavioŭ pra pieravahi svajho płana dla ŭsioj miedyjaindustryi, śćviardžajučy, što pahłynańnie Warner Bros Discovery kampanijaj Netflix skancentruje zanadta šmat upłyvu ŭ rukach adnoj kampanii.

«Heta žudasnaja ździełka dla Halivuda», — skazaŭ jon.

Elisan dadaŭ, što, na jaho dumku, namier Warner Bros vyłučyć kabielnyja telekanały ŭ samastojnuju kampaniju asudzić ich na pravał i ŭ kančatkovym vyniku stanie pamyłkaj dla akcyjanieraŭ.

«Ja dumaju, što [hetyja akcyi] buduć kaštavać značna mienš, čym śćviardžajuć ludzi» — zajaviŭ Elisan.

Kiraŭniki Netflix u paniadziełak nazvali sprobu Paramount pierabić ich prapanovu «całkam čakanaj» i vykazali ŭpeŭnienaść u pośpiechu svaich płanaŭ.

Mnohija na Uoł-stryt ličać Paramount mocnym hulcom u honcy za kuplu Warner Bros, zbolšaha tamu, što siamja Elisan, jakaja vałodaje kampanijaj, źjaŭlajecca bujnym donaram Respublikanskaj partyi i adnosiny Łary i Devida Elisana z Trampam dapamohuć palehčyć praces adabreńnia ździełki.

U paniadziełak Tramp zajaviŭ, što nivodny z bakoŭ «nie źjaŭlajecca maimi siabrami», i padkreśliŭ, što choča «zrabić pravilna». Jon dadaŭ, što nie abmiarkoŭvaŭ prapanovu Paramount z Kušnieram. Pry hetym Tramp daŭ zrazumieć, što maje namier pryniać udzieł u pryniaćci rašeńnia ab adabreńni abo nieadabreńni ździełki.

Čakajecca, što źlićcio kampanij takoha pamieru pryciahnie ŭvahu antymanapolnych rehulataraŭ u ZŠA i Jeŭropie.

Analityki adznačyli, što płan Netflix, vierahodna, vykliča aściarohi z nahody daminavańnia na rynku stryminhu, tady jak prapanova Paramount zapatrabuje pravierki z-za mahčymaha ŭpłyvu na navinavy biźnies i suviaziaŭ siamji Elisanaŭ z Trampam.

U minułym miesiacy sienatary-demakraty papiaredzili, što takaja ździełka pryviadzie da taho, što «adna kampanija budzie kantralavać amal usio, što amierykancy hladziać pa televizary».

Paramount užo kantraluje takija efirnyja telekanały, jak Nickelodeon, CBS i Comedy Central. Pahłynańnie Warner Bros pryniasie joj CNN, the Food Network i ceły šerah spartyŭnych telekanałaŭ.

U toj ža čas, na dumku analitykaŭ, źlićcio Paramount i Warner Bros vyhladaje łahičnym, tak jak jano zabiaśpiečyć kampanii dastatkovy maštab, kab supraćstajać hihantam nakštałt Netflix i Disney.

Rada dyrektaraŭ Warner Bros Discovery zajaviła, što razhledzić prapanovu Paramount, ale zachoŭvaje raniejšuju pazicyju pa ździełcy z Netflix. Kampanii było rekamiendavana «pakul nie pradprymać nijakich dziejańniaŭ» z nahody prapanovy Paramount Skydance.

Netflix — najbujniejšy ŭ śviecie stryminhavy servis pa kolkaści padpisčykaŭ, ich u jaho bolš za 300 miljonaŭ. U Paramount jość ułasny stryminh z 79 młn padpisčykaŭ.

Adnym z kaštoŭnych aktyvaŭ Warner Bros źjaŭlajecca stryminh HBO Max, znakamity premijalnymi sieryjałami, takimi jak «Hulnia tronaŭ», «Spadčyńniki» i «Bieły łotas». Pry hetym, pa acency analitykaŭ Raymond Jones, bolš za 70% klijentaŭ HBO Max u ZŠA majuć padpisku i na Netflix taksama.

Warner Bros taksama vałodaje vielizarnym archivam kinafilmaŭ, jakija zdymalisia na praciahu amal 100 hadoŭ — ad kłasiki, takoj jak «Łuni ciunz» i «Kasabłanka», da filmaŭ ad Hary Potera.

• 0
• 0
• 0
• 1
• 0
• 0
• 2
• 0