Premjer-ministr Litvy Hintaŭtas Pałuckas vyrašyŭ syści ŭ adstaŭku jak z pasady kiraŭnika ŭrada, tak i z pasady staršyni Litoŭskaj sacyjał‑demakratyčnaj partyi, paviedamili krynicy LRT.lt.
Paźniej navinu paćvierdziŭ i prezident Hitanas Naŭsieda, jaki paviedamiŭ, što premjer-ministr Hintaŭtas Pałuckas siońnia ranicaj abviaściŭ pra svaju adstaŭku.
Raniej niezaležnyja rasśledavalniki z «Laisvės TV» i centra «Siena» paviedamili, što kampanija Garnis, zasnavanaja Pałuckasam i jaho partnioram, atrymała lhotny kredyt u 200 000 € užo paśla pryznačeńnia Pałuckasa premjeram. Paśla hetaha vyjavilisia źviestki pra nieviernutyja kredyty jaho inšaj firmy Sagerta i sumnieŭnyja ździełki ź biznesmienam Darusam Viłčynskasam, u jakoha Pałuckas, miarkujučy pa ŭsim, nabyŭ nieruchomaść u 2012 hodzie.
Akramia taho, žurnalisty daviedalisia, što ŭ 2012 hodzie kiprskaja firma pradała Pałuckasu kvateru ŭ centry Vilni sa źnižanaj canoj, kali toj pracavaŭ u meryi. Taksama vyznačyli, što tolki 8 lipienia 2025 hoda jon pahasiŭ astatniuju častku škody, prysudžanaj u miežach tak zvanaj «spravy pra pacukoŭ».
«Siońniašniaja navina ŭ tym, što H. Pałuckas patelefanavaŭ ranicaj i abjaviŭ pra svaju adstaŭku», — skazaŭ prezident u čaćvier.
Dniami śpikier Sejma Saŭlus Skviarnialis zajaviŭ, što partyja «Sajuz demakrataŭ «U imia Litvy»» admovicca ad udziełu ŭ kirujučaj kaalicyi, kali Pałuckas zastaniecca premjeram. Jon abmierkavaŭ situacyju z prezidentam Hitanasam Naŭsiedam, jaki daŭ Pałuckasu dva tydni dla tłumačeńniaŭ abo razvažańniaŭ pra svaju palityčnuju adkaznaść. Adnak zamiest tłumačeńniaŭ Pałuckas pajšoŭ u adpačynak, a skandały praciahvali abvastracca.
U čaćvier stała viadoma, što Słužba rasśledavańnia finansavych złačynstvaŭ praviała pieratrusy ŭ kampanii žonki brata Pałuckasa — Dankora, jakaja atrymała jeŭrapiejskija subsidyi i zakuplała akumulatarnyja sistemy ŭ firmy Garnis, častkova jakaja naležyć samomu premjeru. Finalnym udaram stała infarmacyja pra toje, što kampanija Dankora, źviazanaja ź siamjoj Pałuckasa, atrymała jeŭrapiejskuju dapamohu, značnuju častku jakoj patraciła na zakupki ŭ jaho ž kampanii. Paśla rozhałasu firma śpiašałasia admovicca ad subsidyi.
Niahledziačy na ŭsio heta, Pałuckas da apošniaha admaŭlaŭ abvinavačvańni, a prezidyum jaho partyi zajaŭlaŭ, što jon pavinien praciahvać pracu da zaviaršeńnia rasśledavańniaŭ. Adnak palityčny cisk, jak bačna, akazaŭsia zanadta mocnym.
U pačatku 2000‑ch troje nastaŭnikaŭ historyi źbiehli va Ukrainu ad «hienacydu biełaruskaha naroda», jaki čyniŭ režym Łukašenki. Jak skłaŭsia ich los?1515
Kamientary