Urad Pašyniana surjozna baicca pieravarotu pry padtrymcy Rasii.
Sud zadavoliŭ chadajnictva ab aryšcie lidara ruchu «Śviaščennaja baraćba» Bahrata Hałstaniana na dva miesiacy, piša News.am.
Raniej sud zadavoliŭ chadajnictvy ab aryšcie deputata Nacyjanalnaha schodu Nahornaha Karabacha Davida Hałstaniana, pamočnika archijepiskapa Bahrata Hałstaniana Maŭsiesa Šarbaciana, błohiera Armiena Aleksaniana i pałkoŭnika zapasu Mihrana Machsudziana terminam na dva miesiacy.
Usiaho ŭ sud byli padadzieny chadajnictvy ab aryšcie 16 asob.
U sieradu ranicaj u Armienii prajšli vobšuki ŭ damach prychilnikaŭ ruchu «Śviaščennaja baraćba». Jany praviali dziejańni i ŭ rezidencyi archijepiskapa Bahrata Hałstaniana, paśla čaho jon byŭ zatrymany.
Śledčy kamitet Armienii ŭ sieradu raspaŭsiudziŭ zajavu, zhodna ź jakoj udzielniki i arhanizatary «Śviaščennaj baraćby» płanavali ździajśnieńnie terarystyčnych aktaŭ u Armienii i zamach na źviaržeńnie ŭłady.
U padrychtoŭcy, jak śćviardžajecca, udzielničali roznyja asoby, u tym liku byłyja palicejskija i vajskoŭcy. SK taksama apublikavaŭ šerah aŭdyjazapisaŭ, u apazicyi heta admaŭlajuć.
Urad Pašyniana surjozna baicca pieravarotu pry padtrymcy Rasii, piša Bi-bi-si.
Ab niebiaśpiecy takoha scenaru karespandentu Bi-bi-si ŭ roznyja hady raspaviadali krynicy — u tym liku člen kabinieta ministraŭ i deputat ad kiroŭnaj partyi (jany havaryli na ŭmovach ananimnaści). Maskva zaŭsiody admaŭlała hetyja abvinavačańni.
«U Armienii ŭ jakaści palityčnaj apazicyi dziejničaje Kreml — u asobie jaho armianskich vykanaŭcaŭ. Ułada pakul nie zajaŭlaje pra heta publična, napeŭna, kab nie začynić kanały dla dyjałohu z Kramlom», — napisaŭ blizki da ŭłady pravaabaronca Artur Sakunc. Jon nie pradstaviŭ dokazaŭ.
«Heta ŭnutranaja sprava Armienii, — skazaŭ pra aryšt archijepiskapa Bahrata pres-sakratar Kramla Dźmitryj Piaskoŭ. — My, viadoma ž, zacikaŭlenyja ŭ tym, kab u Armienii zachoŭvałasia zakonnaść, spakoj. I kab Armienija była kvitniejučaj, stabilnaj krainaj, siabroŭskaj Rasii».
Heta nie pieršy raz, kali ŭ razhar vostraj palityčnaj baraćby ŭ Armienii praŭładnyja siły abvinavačvajuć Maskvu va ŭmiašańni.
U vieraśni 2023 hoda praŭładny armianski telehram-kanał raspaŭsiudziŭ čutku, što Kreml nibyta adpraviŭ u Armieniju try tysiačy bajevikoŭ PVK «Vahnier» dla źviaržeńnia Pašyniana. Nijakich dokazaŭ hetaha pradstaŭlena nie było, i MZS RF nazvaŭ paviedamleńnie ŭkidam.
«U kiroŭnaj partyi jość surjoznyja aściarohi, što Maskva pastajanna sprabuje inicyjavać niejkija pracesy, — adznačaje armianski palitołah Tyhran Hryharan. — Nakolki hetyja strachi pierabolšanyja, skazać składana. Ale jany ŭvieś čas bačać takija ryzyki».
Chacia hałoŭnym abvinavačanym pa kryminalnaj spravie ciapier prachodzić archijepiskap Bahrat, premjer-ministr Pašynian śćviardžaje, što za zmovaj staić kiraŭnik Armianskaj apostalskaj carkvy (AAC) katalikos Harehin II i rasijska-armianski miljarder Samvieł Karapiecian.
Abarona śviatara admaŭlaje hetyja abvinavačańni — i kaža, što ŭ Armienii nie aryštoŭvali vysokapastaŭlenych śviataroŭ z časoŭ stalinskich represij.
«Archijepiskap Bahrat viadzie samastojnuju dziejnaść, i z apublikavanych śledčych materyjałaŭ navat nie vynikaje, što carkva źviazanaja z hetaj spravaj», — cytuje jaho advakata vydańnie News.am.
Pašynian znachodzicca ŭ adkrytym kanflikcie z kiraŭnikom AAC Harehinam II, abvinavačvaje katalikosa ŭ parušeńni abietu biasšlubnaści i patrabuje jaho adstaŭki.
U Armienii carkva adździelenaja ad dziaržavy, i miascovyja palitołahi źviazvajuć kanflikt z palitykaj — carkva ŭ apošnija hady stała ŭpłyvovym hołasam niazhodnych, a ŭ krainie nabližajucca parłamienckija vybary.
Miljarder Karapiecian nie ŭdzielničaje ŭ armianskaj palitycy, ale na minułym tydni vystupiŭ u padtrymku AAC, paabiacaŭšy, kali spatrebicca, abaranić jaje «pa-svojmu».
U toj ža dzień jon byŭ aryštavany pa abvinavačańni ŭ zaklikach da zachopu ŭłady — tak ułady vytłumačyli jaho słovy. Abarona Karapieciana admaŭlaje ŭsie abvinavačańni.
Ciapier čytajuć
Čamu ŭ biełaruskaj turmie tak mocna chudziejuć? Tłumačym11
Kamientary