Stała viadoma pra śmierć 39-hadovaha eks-palitviaźnia Aleha Hniedčyka
U junactvie Hniedčyk byŭ aktyvistam «Maładoha fronta», jon trapiŭ u kałoniju paśla Płoščy-2010.
Pra zaŭčasnuju śmierć byłoha aktyvista paviedamiŭ kolišni lidar «Alternatyvy» Aleh Korban, jaki ciapier znachodzicca ŭ emihracyi. Hniedčyk byŭ palitviaźniem paśla padziej 2010 hoda.
Aleh Hniedčyk naradziŭsia 22 listapada 1986 hoda. Skončyŭ budaŭničuju vučelniu, pracavaŭ na budoŭlach u Minsku i Maskvie. U 2003-2005 hadach za palityčnuju aktyŭnaść jak siabra «Maładoha frontu» jaho zatrymlivali i karali administracyjnymi aryštami. U 2006 hodzie adsiedzieŭ 12 sutak za ŭdzieł u namiotavym łahiery.
Byŭ aktyŭnym udzielnikam Płoščy-2010. Maładafrontaŭca sudzili ŭ adnoj hrupie z kandydatam u prezidenty Andrejem Sańnikavym. Hniedčyk atrymaŭ 3 hady źniavoleńnia.
Aleh Hniedčyk trapiŭ u kałoniju Škłova.
U liście na volu Mikoła Statkievič pisaŭ: «Ciapier pačałasia novaja chvala cisku na «dziekabrystaŭ» — sprabujuć prymusić napisać zajavy pra pamiłavańnie i vystupić pierad telekamieraj. Bolš za ŭsio dastajecca Hniedčyku… — jon užo pabyvaŭ u ŠIZA. Ja chłopcam skazaŭ: «Možacie pisać. Vam možna. Heta mnie nielha». Ale jany nie chočuć pryznavać vinu».
Hniedčyk byŭ vyzvaleny pa pamiłavańni 1 vieraśnia 2011 hoda — biez pryznańnia viny.
«Kažuć, što turma łamaje čałavieka. Ale jana naadvarot robić jaho macniej. Ja staŭ krychu macniej», — zajaviŭ jon paśla vyzvaleńnia.
«U padziejach 2020 hoda jon nie zaśviaciŭsia, trymaŭ dystancyju, zastavaŭsia žyć u Minsku», — napisaŭ pra Hniedčyka Korban.
Apošni raz jon byŭ «Ukantakcie» 30 krasavika 2025 hoda.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary