Karbalevič adkazaŭ, chto z atačeńnia Łukašenki moh by jaho zamianić i čamu nie vieryć u pierajemnika Kolu
Palityčny ahladalnik Valer Karbalevič u vypusku jutub-prajekta «Žyćcio-malina» parazvažaŭ pra mahčymaść Koli Łukašenki źmianić svajho baćku i pra toje, kali i z čaho mohuć pačacca pieramieny.
Pra budučyniu Mikałaja Łukašenki
«Ja skieptyčna staŭlusia da palityčnaj budučyni Mikałaja Łukašenki, bo pakul jon jašče davoli małady, kab možna było ŭsurjoz kazać pra jaho palityčnuju karjeru. I nie dumaju, što Łukašenka dačakajecca taho času, kali Mikałaj stanie darosłym i pačnie niejak uciahvacca ŭ palityku», — vykazaŭ svoj pohlad Valer Karbalevič.
Pytańnie i ŭ tym, što treba ŭmieć utrymać uładu. U Koli takich navykaŭ jašče niama.
«Ja pakul nie baču, što Kolu sprabujuć vieści pa niejkaj karjernaj leśvicy», — davodzić analityk.
Prykładam uvachodžańnia Mikałaja Łukašenki ŭ palityku mahło b stać pryznačeńnie jaho čynoŭnikam ci chacia b topam BRSM ci «Biełaj Rusi». Adnak takoha niama.
Na dumku Karbaleviča, toje, što Mikałaj supravadžaje Łukašenku padčas usich vizitaŭ, niedastatkova.
Kali pačnucca pieramieny ŭ Biełarusi
Kali ž havaryć pra pačatak pieramien u krainie, Karbalevič pierakanany, što pieramieny ŭ Biełarusi pačnucca paśla sychodu Alaksandra Łukašenki ŭ niezaležnaści ad taho, chto budzie jahonym nastupnikam.
Jon tłumačyć:
«Siońniašniaja palityčnaja sistema, siońniašni palityčny režym — heta kłasičny piersanaliscki režym, režym asabistaj ułady. 30 hadoŭ Łukašenka stvaraŭ hety režym pa svaim, što nazyvajecca, vobrazie i padabienstvie. Jon šyŭ jaho pad siabie, z unikalnymi asablivaściami, padstrojvaŭ pad asobu mienavita samoha Łukašenki.
I prosta tak u hetaj sistemie zamiest Łukašenki pasadzić inšaha čałavieka i mierkavać, što ničoha nie pamianiajecca, heta naŭrad ci. Takoha nie budzie».
Jak davodzić analityk, luby novy kiraŭnik, jaki pryjdzie na miesca Łukašenki, pavinien budzie niejkim čynam damahacca svajoj lehitymizacyi, a jaje možna budzie ŭtrymać, «tolki idučy pa šlachu dełukašenizacyi Biełarusi».
U jakaści prykładu jon zhadaŭ, jak paśla śmierci Stalina jahonyja nastupniki sprabavali atrymać lehitymnaść, idučy pa šlachu destalinizacyi:
«Pryčym, pieršym pačaŭ takuju liniju, i jak by heta ni dziŭna, Łaŭrencij Bieryja. Voś, paśla jahonaha rasstrełu byŭ Malankoŭ, nu a potym i Chruščoŭ, XX źjezd, raźviančańnie kultu asoby i tak dalej. To bok, usie nastupniki, saratniki Stalina razumieli, što dalej ruchacca pa tym ža treku nielha. Treba iści ŭ druhi bok, treba atrymać padtrymku i elity, i hramadstva, a možna atrymać, tolki idučy pa šlachu destalinizacyi. Tak ibudzie i ŭ Biełarusi».
Analityk miarkuje, što źmieny buduć adbyvacca nie chutka, adnak kirunak ich budzie ŭ bok peŭnaj libieralizacyi, jak ekanamičnaj tak i palityčnaj, u tym liku i ŭ adnosinach z Zachadam.
Jon tłumačyć, što siońniašnija palityčnyja represii ŭ značnaj stupieni zaviazanyja na asobie Alaksandra Łukašenki, jaki pieražyŭ mocnuju psichałahičnuju traŭmu paśla padziej 2020 hoda. Ciapier jon kirujecca žadańniem pomsty i stracham pierad tym, što lubyja pasłableńni mohuć spravakavać novyja pratesty.
Ci jość u atačeńni Łukašenki zamiena jamu?
Karbalevič nie sumniavajecca, što ŭ atačeńni Łukašenki dastatkova ludziej, jakija zmohuć padchapić paśla jaho ŭładu.
«Kali kazać pra prosta prezidenta, nie pra «baćku», nie pra «ajca nacyi», a prosta pra čynoŭnika, jaki na piać hadoŭ zaniaŭ hetuju pasadu, jak u Polščy ci jak u Litvie, to, u pryncypie, luby čałaviek ź jahonaha atačeńnia hetuju funkcyju zmoža vykonvać. Lepš, horš — ale nie dumaju, što moža być niejkaja katastrofa. Tamu luboje proźvišča nazyvaj, luboha ministra, luboha kiraŭnika, namieśnika kiraŭnika administracyi, i ŭ pryncypie, ja dumaju, što ludzi spraviacca».
Karbalevič upeŭnieny, što šmat u kaho jość palityčnyja ambicyi, bo «kali b u ludziej ambicyj nie było, to jany b nie sprabavali iści pa karjernaj leśvicy».
Praŭda, jak zaŭvažaje analityk, u ich niama takoj prahi da ŭłady, jak u samoha Łukašenki.
«Łukašenka, čaplajučysia za ŭładu, stvaryŭ takuju palityčnuju sistemu, jakaja paśla jaho sychodu chutčej za ŭsio vykliča palityčny kryzis. Tamu što siońnia palityčnaja vaha roznych instytutaŭ raściahnutaja.
Jość urad, jość parłamient, pryčym dźvie pałaty, jość prezident, jaho administracyja, jość jašče Usiebiełaruski narodny schod. Usie hetyja instytucyi nie pracujuć, tamu što ŭsie rašeńni prymaje adzin čałaviek. A kali čałaviek hety źnikaje, to hetyja instytucyi, jak by, zapracujuć. I pamiž imi pačniecca baraćba za ŭładu».
U momant kryzisu moža źjavicca mahčymaść dla praviadzieńnia libieralizacyi i šanc da ŭdziełu ŭ sistemie demakratyčnych sił.
«Roznyja instytucyi, tyja ž samyja siłavyja struktury, nie buduć viedać, na kaho aryjentavacca i što im rabić. I ŭ hetaj situacyi ŭžo ŭ hetuju abstanoŭku mohuć uklinicca i roznyja, skažam, apazicyjnyja siły, jakija adčujuć, što źjaviłasia, adkryłasia niejkaja fortačka».
Kamientary
Eto zadača minimum, čtoby nadieliť nieprikosnoviennosťju mładšieho syna Kolu.
Jeho mať Irina Abielskaja užie nadielena immunitietom kak člen Sovieta Riespubliki.