5000 jeŭra na miesiac za pracu ŭ biełaruskaj palitycy? Knyrovič ličyć, što heta narmalny zarobak
Pavieł Łatuška raskazaŭ pra razmovu ź biznesmienam Alaksandram Knyrovičam nakont prychodu apošniaha na pracu ŭ Nacyjanalnaje antykryzisnaje ŭpraŭleńnie. Pa słovach Łatuški, Knyrovič chacieŭ mieć 5000 jeŭra ŭ miesiac, ale takich zarobkaŭ u NAU niama. Knyrovič u hutarcy z «Našaj Nivaj» parazvažaŭ nakont zarobkaŭ dla siabie, dla palitykaŭ u vyhnańni i dla kiraŭnikoŭ biełaruskich pradpryjemstvaŭ. Jakimi jany pavinny być?
Łatuška: U nas niama takich zarobkaŭ
U efiry «Jeŭraradyjo» Pavieł Łatuška raskrytykavaŭ Alaksandra Knyroviča.
«Ja nie abvinavačvaju jaho ŭ tym, što jon pracuje na KDB, ale jon pracuje ŭ naratyvach KDB. I hety čałaviek niachaj spravazdačycca, što za dva hady jon zrabiŭ u Kaardynacyjnaj radzie? Ničoha», — skazaŭ Łatuška.
Jon raspavieŭ, što Knyrovič niekali pryjšoŭ u NAU i paprasiŭ vialiki zarobak.
«Ja skazaŭ: «U nas niama takich zarobkaŭ», — raskazaŭ Łatuška.
5000 jeŭra — bazavy minimum?
Knyrovič ža kaža, što nikoli nie prasiŭ u Łatuški takich hrošaj.
«Ja pryjechaŭ u Polšču ź nievialikaj sumaj hrošaj i razumieŭ: dla taho, kab upeŭniena siabie adčuvać pa žyćci, u mianie musić być niejki minimalny ŭzrovień zabiaśpiečanaści. Adna sprava, kali čałavieku 20 hadoŭ i ŭsio žyćcio napieradzie, a inšaja — kali tabie kala 50. Tamu ja razumieŭ, što moj vybar budzie pamiž tym: iści ŭ palityku abo iści pracavać na siabie», — tłumačyć biznesmien.
5000 jeŭra na miesiac Knyrovič ličyć nieabchodnaj sumaj dla taho, kab zabiaśpiečyć tył i mieć mahčymaść sto pracentaŭ svaich sił i svajho času vydatkoŭvać na palityku.
«U takim vypadku ja moh by spakojna, nie adciahvajučysia na niešta inšaje, paŭnavartasna pracavać pa 40 hadzin na tydzień u jakaści biełaruskaha palityka ŭ vyhnańni», — kaža jon.
Knyrovič dadaje, što na hetym prapanavaŭ Łatušku skončyć razmovu pra svajo pracaŭładkavańnie ŭ NAU, bo vydatna razumieŭ, što taki zarobak u arhanizacyi jamu płacić nichto nie stanie — u ich takich hrošaj niama, jak niama i takich vysokich zarpłat u inšych supracoŭnikaŭ. Tamu ahułam pytańnie ŭładkavańnia i apłaty pracy jon nazyvaje rytaryčnym.
«Pierad tym, jak zajmacca niečym vysokim, mušu pierš za ŭsio dumać pra toje, jak zabiaśpiečyć sabie žyćcio. Heta narmalny padychod da spravy.
Treba spačatku sacyjalizavacca, a potym užo pačynać zajmacca niejkimi prajektami. Tamu heta była rytaryčnaja fihura maŭleńnia, nikoli z maich vusnaŭ nie hučała: «Pavieł, ja hatovy pracavać na vas za 5000 jeŭra»», — zapeŭnivaje biznesmien.
Ci možna pracavać za ideju?
Ahułam Knyrovič ličyć, što na vałanciorskich pačatkach možna rabić tolki niejkija karotkaterminovyja rečy.
«Možna niejki niepraciahły termin paprasić ludziej pracavać biaspłatna — heta narmalna. Voś žnivień 2020 hoda byŭ takim prykładam: davajcie my ŭsie razam štości zrobim biaspłatna, ad čaho potym nam usim budzie dobra. Ale kali prapanavać ludziam pracavać bolš za 3‑4 miesiacy vyklučna za ideju, to jany pačnuć zvalniacca», — ličyć jon.
Na jaho dumku, u takich vypadkach zastajucca tolki fanatyki (što, pavodle jaho słoŭ, škodna dla spravy) abo ludzi, jakim akramia hetaha bolš niama čym zajmacca, bo ŭ ich niama prafiesii, dobraj adukacyi ci talentaŭ.
«Tamu jany nie mohuć realizavacca ŭ inšym miescy i kruciacca vakoł palityčnych struktur i NKA. Kab čałaviek pracavaŭ dobra — jamu treba płacić».
Biznesmien kaža, što ŭ svaim vypadku jon razumieŭ: majučy za plačyma vialiki dośvied i dobruju adukacyju, na jakuju było vydatkavana šmat času i hrošaj, jon moža pajści pracavać na siabie i zabiaśpiečyć sabie hodny ŭzrovień žyćcia.
Viartajučysia da temy zarobkaŭ biełaruskich palitykaŭ u vyhnańni, Knyrovič kaža, što heta važnaje i składanaje pytańnie.
«U Polščy jość minimalnaja zarpłata, jość siaredniaja, jakaja składaje kala 1500 jeŭra na ruki, a jość bolš vysokija zarobki ŭ tych śpiecyjalistaŭ, čyje viedy i ŭmieńni aceńvajucca vyšej. Tamu my pavinny razumieć: kali heta zdolny čałaviek i vysokakłasny śpiecyjalist, to jon moža znajści sabie pracu ŭ toj ža Polščy abo Litvie».
U jakaści admoŭnaha prykładu Knyrovič pryvodzić biełaruskuju sistemu, dzie na zavodzie z abarotam sotni miljonaŭ dalaraŭ pracuje dyrektar z zarpłataj try tysiačy dalaraŭ.
«Adkaznaść i nahruzka vializarnyja, zvolnić mohuć u luby momant, a zarpłata — usiaho try tysiačy dalaraŭ. Tamu nadychodzić momant, kali źjaŭlajucca schiematozy, chabary, kradziažy. Kab hetaha nie adbyvałasia, zarpłata ŭ śpiecyjalista, jaki kiruje zavodam ź miljonnymi prodažami, musić być našmat bolšaj za ŭmoŭnyja try tysiačy. I tady na takija miescy buduć prychodzić prafiesijanały, jakija zmohuć zrabić pradpryjemstva bolš efiektyŭnym».
Na dumku biznesmiena, padobny padychod pavinien być i ŭ palitycy.
Tamu ideja Knyroviča ŭ tym, što kali my chočam bačyć vyniki, to jakasnym palitykam treba płacić hodna.
«I kali Pavieł Łatuška ci Śviatłana Cichanoŭskaja za svaju dziejnaść buduć atrymlivać ahučanyja mnoju 5000 jeŭra ci navat bolš, to ja tolki padtrymaju heta. Bo treba, kab hrošaj chapała nie tolki na arendu kvatery, ježu i adzieńnie, ale i na toje, kab paśla nie akazacca z sacyjalnaj piensijaj».
Uzrovień zarobkaŭ ludziej u ofisach palitykaŭ, na dumku Knyroviča, musić vyznačacca rynkam.
«Pry ŭsim patryjatyźmie isnuje rynak pracy. Śpiecyjalnaści ŭnutry palityčnych struktur standartnyja: analityk, markietołah, pres-sakratar. U takich śpiecyjalistaŭ jość svaja cana na rynku krainy pražyvańnia, i čałaviek musić atrymlivać stolki ž, kolki płaciać u toj ža Polščy abo Litvie», — ličyć Knyrovič.
Što ž zaraz z zarobkam u samoha Knyroviča?
«Za hetyja hady ŭ mianie byŭ nievialiki pieryjad z bolš vysokim prybytkam, ale ciapier — nie. Tamu pytańnie, ci nie pakinuć publičnuju aktyŭnaść i skancentravacca na pracy «na siabie», aktualnaje ŭvieś čas».
Ciapier čytajuć
Usie čakali padzieńnia cen, ale ničoha padobnaha! Jak za hod źmianilisia ceny na kvatery ŭ Minsku i inšych bujnych haradach1
Kamientary