Kiraŭnica rasijskaha Centrabanka zajaviła pra vyčarpańnie apošnich resursaŭ rostu rasijskaj ekanomiki
Resursy, jakija dazvalali rasijskaj ekanomicy dva hady pakazvać rost va ŭmovach vajny i sankcyj, vyčarpanyja, zajaviła na Pieciarburhskim mižnarodnym ekanamičnym forumie (PMEF) u čaćvier kiraŭnica Banka Rasiei Elvira Nabiulina, piša The Moscow Times.
«My raśli dva hady davoli vysokimi tempami praz toje, što byli zadziejničanyja svabodnyja resursy», — skazała Nabiulina.
Pa jaje słovach, havorka idzie pra pracoŭnuju siłu, vytvorčyja mahutnaści, zapasy kapitału bankaŭskaj sistemy, a taksama hrošy Fondu nacyjanalnaha dabrabytu (FND), z dapamohaj jakoha ŭrad łataŭ dzirki ŭ biudžecie i apłačvaŭ tryljonnyja miehaprajekty.
«Nam treba razumieć, što mnohija z hetych resursaŭ sapraŭdy vyčarpanyja», — skazała Nabiulina, jakuju cytuje TASS.
Uzrovień biespracoŭja, pa danych Rasstata, apuściŭsia da histaryčnaha minimumu ŭ 2,3%, a masavaja emihracyja i viarboŭka mužčyn na vajnu sparadzili niedachop kadraŭ, jaki ŭrad aceńvaje ŭ 2 miljony čałaviek.
Uzrovień zahruzki mahutnaściaŭ na pradpryjemstvach, zhodna z Rasstatam, pieravyšaŭ 80%, što stała rekordam u sučasnaj historyi. Likvidnyja aktyvy FND z pačatku vajny skaracilisia ŭtraja— da 2,8 tryljona rasijskich rubloŭ. Zapasy valuty ŭ fondzie źnizilisia da 153,7 miljardaŭ juaniaŭ — minimumu z momantu jaho stvareńnia ŭ 2008 hodzie, a załaty zapas FND schudnieŭ da 139,5 tony, choć pierad pačatkam vajny pieravyšaŭ 400 ton.
Rasijskaja ekanomika znachodzicca «na miažy recesii», zajaviŭ na siesii PMEF z Nabiulinaj kiraŭnik Ministerstva ekanamičnaha raźvićcia Rasii Maksim Areškin.
Pavodle źviestak Rasstata, u pieršym kvartale tempy rostu VUP zamarudzilisia ŭtraja — 4,1% da 1,4%, a kvartał da kvartała ekanomika ŭpieršyniu z 2022 hoda pačała ściskacca. Prybytki biznesu ŭ sakaviku abvalilisia na tracinu, a ŭ klučavym, naftahazavym siektary — udvaja. Pramysłovaść apynułasia na miažy stahnacyi (1,2% rostu za studzień—krasavik), a cyvilnyja haliny pačali skaračacca. Abarot roźnicy zapavoliŭsia ŭ 3 razy — 2, 4% na kaniec krasavika suprać 7, 2% na kaniec śniežnia.
Paśla troch hadoŭ vajennaj mabilizacyi ekanomika Rasii astudžajecca, kanstatuje Alaksandr Kalandr, navukovy supracoŭnik Center for European Policy Analysis.
«Ekanomika vydychajecca, a spad lohka moža pieratvarycca ŭ abvał, — papiaredžvaje jon. — Niasłušnyja rašeńni čynoŭnikaŭ, dalejšaje padzieńnie cenaŭ na naftu, nieaściarožnaść ź inflacyjaj — i Rasija moža apynucca ŭ vialikaj biadzie».
Cana rasijskaj nafty padskočyła amal na 15% za niekalki dzion paśla ŭdaraŭ Izraila pa Iranie
Rasijskija čyhunki sutyknulisia z najbujniejšym padzieńniem hruzapieravozak u historyi kampanii
Rasijskaja ekanomika pačała 2025 hod z mocnym zapavoleńniem
ES zapadozryŭ Kitaj u abychodzie 80 pracentaŭ sankcyjnych abmiežavańniaŭ suprać Rasii
Aryštavany dyrektar Pałaca Respubliki, adzin z arhanizataraŭ Marafona adzinstva9
Kamientary
[Zredahavana]