«Z usim hetym zołatam tut heta vyhladaje vielmi padobna da Mar-a-Łaha», — zaŭvažyŭ śpiecpasłańnik administracyi Trampa Kit Kiełah, zaŭšoŭšy ŭ Pałac Niezaležnaści. Ale čamuści muž Piatkievič Rybakoŭ nie staŭ pierakładać heta dasłoŭna. Pra što razmova?
U piatnicu ŭviečary 19 červienia Alaksandr Łukašenka ŭ Pałacy niezaležnaści pryniaŭ śpiecyjalnaha pasłańnika prezidenta ZŠA Kita Kiełaha, jaki napačatku pieramovaŭ padzialiŭsia svaimi ŭražańniami ad raskošy pamiaškańniaŭ:
«Z usim hetym zołatam tut heta vyhladaje vielmi padobna da Mar-a-Łaha prezidenta Trampa».
«Heta lepš vyhladaje, čym holf-kłub Mar-a-Łaha», — tak pierakłaŭ hetyja słovy pradstaŭnik Biełarusi pry AAN Valancin Rybakoŭ, jaki na sustrečy byŭ i pierakładčykam.
Što takoje Mar-a-Łaha
Mar-a-Łaha — heta majontak płoščaj 5810 kvadratnych mietraŭ, raźmieščany ŭ horadzie Pałm-Bič, štat Fłaryda, na paŭdniovym uschodzie ZŠA. Jon byŭ pabudavany ŭ 1920-ch hadach amierykanskaj miljanierkaj Mardžory Mieryviezer Post.
Nazva «Mar-a-Łaha» pa-ispansku aznačaje «ad mora da voziera», što adlustroŭvaje toj fakt, što majontak raspaścirajecca ad adnaho kanca vostrava Pałm-Bič da druhoha, ad Atłantyčnaha akijana na ŭschodzie da voziera Uort na zachadzie.
Paśla śmierci Mardžory Post u 1973 hodzie majontak pierajšoŭ pad kiravańnie Słužby nacyjanalnych parkaŭ ZŠA. U płanach było vykarystoŭvać jaho jak «Zimovy Bieły dom» abo aficyjnuju haściavuju rezidencyju. Adnak utrymańnie majontka akazałasia finansava ciažkim, tamu ŭ 1980 hodzie Kanhres viarnuŭ majontak Fondu Post.
U 1985 hodzie Mar-a-Łaha byŭ nabyty Donaldam Trampam, jaki staŭ jaho vykarystoŭvać jak rezidencyju. U 1994 hodzie majontak byŭ pieraabstalavany ŭ zakryty kłub z numarami dla haściej, spa-centram i inšymi vyhodami haściničnaha typu. Siamja Trampaŭ maje na jaho terytoryi pryvatnyja pakoi ŭ zakrytaj zonie.
Členstva ŭ kłubie Mar-a-Łaha patrabavała ŭstupnaha ŭznosu ŭ pamiery 200 000 dalaraŭ. Pry hetym štohadovy členski ŭznos u 2017 hodzie składaŭ 14 000 dalaraŭ. Hości płaciać da 2000 dalaraŭ za noč. Śpis členaŭ kłuba doŭhi čas byŭ achutany zaviesaj sakretnaści.
U vieraśni 2019 hoda Mar-a-Łaha staŭ asnoŭnym miescam pražyvańnia Donalda i Miełanii Tramp. A padčas svajho pieršaha prezidenctva Tramp vykarystoŭvaŭ Mar-a-Łaha jak «Zimovy Bieły dom». Tam jon nie tolki pracavaŭ, ale i prymaŭ prezidentaŭ inšych krain. Siarod jakich byŭ staršynia KNR Si Czińpin i premjer-ministr Japonii Sindzo Abe.
Paśla zakančeńnia prezidenctva ŭ 2021 hodzie Tramp pierajechaŭ u Mar-a-Łaha, adkryŭ tam ofis u adpaviednaści z Zakonam ab byłych prezidentach i pieravioz tudy prezidenckija dakumienty, što stała pradmietam rasśledavańnia FBR u žniŭni 2022 hoda. Tramp znachodziŭsia ŭ Mar-a-Łaha ŭ noč prezidenckich vybaraŭ 2024 hoda.
Čym admietny Mar-a-Łaha
Architekturna majontak vykanany ŭ styli ispanskaha adradžeńnia. Hałoŭny dom — heta viła ŭ mižziemnamorskim styli, adaptavanaja da ispana-maŭrytanskaj architektury, jakaja była papularnaj u Pałm-Bič u pieryjad pabudovy. Budynak maje dvuchpaviarchovy centralny korpus ź siamiejnymi pakojami, a taksama dapamožnyja kryły i flihieli z pamiaškańniami dla absłuhi.
Dom viančaje vieža vyšynioj pryblizna 23 mietry z dacham z čarapicy. U joj znachodziacca spalnyja pakoi, vannyja i ahladnaja placoŭka ź vidam na Pałm-Bič.
Dla azdableńnia budynku vykarystoŭvalisia impartavanyja materyjały, u tym liku try łodki daryjskaha vapniaka z Hienui, jaki vykarystany dla ašaloŭki źniešnich ścien, unutranych struktur, arak i skulptur. Hety vapniak abrany z-za jaho prydatnaści dla tonkaj raźby.
Kala 20 000 dachovak i 2200 čorna-biełych marmurovych błokaŭ dla padłohi pachodziać z kubinskaha zamka. U piarednim paviljonie, pacia, kałanadach i niekatorych pakojach vykarystana ispanskaja čarapica XV stahodździa z pryvatnaj kalekcyi ŭ amal 36 000 štuk, sabranaj u 1880-ch hadach.
Mar-a-Łaha ličycca adnym z hałoŭnych simvałaŭ trampizmu. Paśla nabyćcia majontka za 5 miljonaŭ dalaraŭ Tramp vydatkavaŭ jašče 3 miljony na meblu. Tolki na załatyja rukamyjniki było patračana 100 tysiač dalaraŭ.
Tramp adramantavaŭ budynak, dadaŭšy da isnujučych 126 pakojaŭ, siarod jakich 58 spalniaŭ i 33 vannyja pakoi ahulnaj płoščaj amal 10 000 mietraŭ, balnuju zału płoščaj 1900 kvadratnych mietraŭ. Na terytoryi źjavilisia piać tenisnych kortaŭ z hruntovym pakryćciom i dva basiejny. Akramia hetaha viadoma pra try bombaschoviščy.
U 2022 hodzie Forbes acaniŭ košt majontka prykładna ŭ 350 miljonaŭ dołaraŭ.
Ciapier čytajuć
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary