«З усім гэтым золатам тут гэта выглядае вельмі падобна да Мар-а-Лага», — заўважыў спецпасланнік адміністрацыі Трампа Кіт Келаг, заўшоўшы ў Палац Незалежнасці. Але чамусьці муж Пяткевіч Рыбакоў не стаў перакладаць гэта даслоўна. Пра што размова?
У пятніцу ўвечары 19 чэрвеня Аляксандр Лукашэнка ў Палацы незалежнасці прыняў спецыяльнага пасланніка прэзідэнта ЗША Кіта Келага, які напачатку перамоваў падзяліўся сваімі ўражаннямі ад раскошы памяшканняў:
«З усім гэтым золатам тут гэта выглядае вельмі падобна да Мар-а-Лага прэзідэнта Трампа».
«Гэта лепш выглядае, чым гольф-клуб Мар-а-Лага», — так пераклаў гэтыя словы прадстаўнік Беларусі пры ААН Валянцін Рыбакоў, які на сустрэчы быў і перакладчыкам.
Што такое Мар-а-Лага
Мар-а-Лага — гэта маёнтак плошчай 5810 квадратных метраў, размешчаны ў горадзе Палм-Біч, штат Фларыда, на паўднёвым усходзе ЗША. Ён быў пабудаваны ў 1920-х гадах амерыканскай мільянеркай Марджоры Мерывезэр Пост.
Назва «Мар-а-Лага» па-іспанску азначае «ад мора да возера», што адлюстроўвае той факт, што маёнтак распасціраецца ад аднаго канца вострава Палм-Біч да другога, ад Атлантычнага акіяна на ўсходзе да возера Уорт на захадзе.
Пасля смерці Марджоры Пост у 1973 годзе маёнтак перайшоў пад кіраванне Службы нацыянальных паркаў ЗША. У планах было выкарыстоўваць яго як «Зімовы Белы дом» або афіцыйную гасцявую рэзідэнцыю. Аднак утрыманне маёнтка аказалася фінансава цяжкім, таму ў 1980 годзе Кангрэс вярнуў маёнтак Фонду Пост.
У 1985 годзе Мар-а-Лага быў набыты Дональдам Трампам, які стаў яго выкарыстоўваць як рэзідэнцыю. У 1994 годзе маёнтак быў пераабсталяваны ў закрыты клуб з нумарамі для гасцей, спа-цэнтрам і іншымі выгодамі гасцінічнага тыпу. Сям'я Трампаў мае на яго тэрыторыі прыватныя пакоі ў закрытай зоне.
Членства ў клубе Мар-а-Лага патрабавала ўступнага ўзносу ў памеры 200 000 даляраў. Пры гэтым штогадовы членскі ўзнос у 2017 годзе складаў 14 000 даляраў. Госці плацяць да 2000 даляраў за ноч. Спіс членаў клуба доўгі час быў ахутаны завесай сакрэтнасці.
У верасні 2019 года Мар-а-Лага стаў асноўным месцам пражывання Дональда і Меланіі Трамп. А падчас свайго першага прэзідэнцтва Трамп выкарыстоўваў Мар-а-Лага як «Зімовы Белы дом». Там ён не толькі працаваў, але і прымаў прэзідэнтаў іншых краін. Сярод якіх быў старшыня КНР Сі Цзіньпін і прэм'ер-міністр Японіі Сіндзо Абэ.
Пасля заканчэння прэзідэнцтва ў 2021 годзе Трамп пераехаў у Мар-а-Лага, адкрыў там офіс у адпаведнасці з Законам аб былых прэзідэнтах і перавёз туды прэзідэнцкія дакументы, што стала прадметам расследавання ФБР у жніўні 2022 года. Трамп знаходзіўся ў Мар-а-Лага ў ноч прэзідэнцкіх выбараў 2024 года.
Чым адметны Мар-а-Лага
Архітэктурна маёнтак выкананы ў стылі іспанскага адраджэння. Галоўны дом — гэта віла ў міжземнаморскім стылі, адаптаваная да іспана-маўрытанскай архітэктуры, якая была папулярнай у Палм-Біч у перыяд пабудовы. Будынак мае двухпавярховы цэнтральны корпус з сямейнымі пакоямі, а таксама дапаможныя крылы і флігелі з памяшканнямі для абслугі.
Дом вянчае вежа вышынёй прыблізна 23 метры з дахам з чарапіцы. У ёй знаходзяцца спальныя пакоі, ванныя і аглядная пляцоўка з відам на Палм-Біч.
Для аздаблення будынку выкарыстоўваліся імпартаваныя матэрыялы, у тым ліку тры лодкі дарыйскага вапняка з Генуі, які выкарыстаны для ашалёўкі знешніх сцен, унутраных структур, арак і скульптур. Гэты вапняк абраны з-за яго прыдатнасці для тонкай разьбы.
Каля 20 000 даховак і 2200 чорна-белых мармуровых блокаў для падлогі паходзяць з кубінскага замка. У пярэднім павільёне, паціа, каланадах і некаторых пакоях выкарыстана іспанская чарапіца XV стагоддзя з прыватнай калекцыі ў амаль 36 000 штук, сабранай у 1880-х гадах.
Мар-а-Лага лічыцца адным з галоўных сімвалаў трампізму. Пасля набыцця маёнтка за 5 мільёнаў даляраў Трамп выдаткаваў яшчэ 3 мільёны на мэблю. Толькі на залатыя рукамыйнікі было патрачана 100 тысяч даляраў.
Трамп адрамантаваў будынак, дадаўшы да існуючых 126 пакояў, сярод якіх 58 спальняў і 33 ванныя пакоі агульнай плошчай амаль 10 000 метраў, бальную залу плошчай 1900 квадратных метраў. На тэрыторыі з'явіліся пяць тэнісных кортаў з грунтовым пакрыццём і два басейны. Акрамя гэтага вядома пра тры бомбасховішчы.
У 2022 годзе Forbes ацаніў кошт маёнтка прыкладна ў 350 мільёнаў долараў.
Каментары