Zasnavalnik kanała «Kraina dla žyćcia» i adna z hałoŭnych postaciaŭ padziej 2020 hoda byŭ zatrymany jašče da vybaraŭ. Za kratami Siarhiej Cichanoŭski pravioŭ bolš za piać hadoŭ.
Siarhiej Cichanoŭski vyjšaŭ na volu. Heta stała mahčymym u vyniku vizitu ŭ Minsk śpiecpradstaŭnika prezidenta ZŠA Donalda Trampa Kita Kiełoha. Były palitviazień vyjechaŭ ź Biełarusi.
Siarhieju Cichanoŭskamu 46 hadoŭ. Jon naradziŭsia ŭ Horkach, a vyras u Homieli, dzie skončyŭ fiłałahičny fakultet miascovaha ŭniviersiteta. Potym jon zaniaŭsia biznesam. Ładziŭ kancerty, adkryvaŭ načnyja kłuby ŭ Mazyry i Homieli, vałodaŭ sietkaj sałonaŭ sotavaj suviazi i videastudyjaj, što zdymała rekłamu dla papularnych brendaŭ.
U 2019 hodzie Cichanoŭski stvaryŭ kanał «Kraina dla žyćcia», kab, jak jon sam kazaŭ, zmahacca ź biaźmiežžam čynoŭnikaŭ. Mienš čym za hod kanał staŭ adnym z samych papularnych u biełaruskim Youtube.
Błohier aktyŭna jeździŭ pa rehijonach, sustrakaŭsia z padpisčykami i prosta miascovymi žycharami, braŭ u ich intervju. Ludzi raspaviadali Siarhieju ab svaich prablemach, časta krytykavali čynoŭnikaŭ i ŭłady.
Siarhiej Cichanoŭski staŭ adnoj z klučavych fihur dramatyčnych padziej 2020 hoda. Adzin z samych papularnych palityčnych błohieraŭ krainy vyrašyŭ bałatavacca ŭ prezidenty, adnak pierad samym pačatkam vybarčaj kampanii jaho aryštavali, i jon nie zmoh padać dakumienty. U vyniku kandydatkaj stała jahonaja žonka Śviatłana Cichanoŭskaja, a Siarhiej paśla aryštu uklučyŭsia ŭ kampaniju ŭ jakaści kiraŭnika jaje štaba i davieranaj asoby. Pikiety ŭ padtrymku Cichanoŭskaj źbirali niebyvałuju kolkaść ludziej pa ŭsioj krainie.
29 maja 2020 hoda na lehalnym pieradvybarčym pikiecie ŭ Hrodnie Cichanoŭskaha zatrymali paśla pravakacyi siłavikoŭ.
Praz dva miesiacy Łukašenka publična zajaviŭ, što Cichanoŭskaha zatrymali pa jaho rasparadžeńni. Jon abvinavaciŭ Siarhieja ŭ tym, što toj sprabavaŭ arhanizavać u Biełarusi Majdan.
«Kali b my tady niekatorych nie pryščamili, siońnia b bušavaŭ i Salihorsk. Usio pačynajecca pastupova, my heta viedajem. Raschistvajecca abstanoŭka ŭnutry krainy, davodzicca da biełaha ŭzbudžeńnia, idzie nastup na dziejučuju ŭładu, adbyvajecca złom ułady. Z dapamohaj Majdanu ŭźnikajuć biesparadki, až da zvarotu da zamiežnaj dziaržavy.
Tak, ja daŭ sihnał pa Cichanoŭskim. Ja niešta nie tak zrabiŭ? Ja pieražyvaŭ za svaju krainu, za jakuju ja pakul jašče adkazvaju», — skazaŭ tady Łukašenka.
Ułady žorstka pakarali Cichanoŭskaha za toje, što jamu ŭdałosia zmabilizavać prostych ludziej da palityčnaj aktyŭnaści. Siarhieja sudzili ŭ zakrytym režymie prosta ŭ homielskim SIZA. U śniežni 2021 hoda jamu prysudzili 18 hadoŭ kałonii ŭzmocnienaha režymu pa čatyroch palityčnych artykułach — č. 1 art. 293 (arhanizacyja masavych biesparadkaŭ), č. 3 art. 130 (raspalvańnie sacyjalnaj varožaści), č. 2 art. 191 (pieraškoda pracy CVK), č. 1 art. 342 (arhanizacyja dziejańniaŭ, jakija hruba parušajuć hramadski paradak). Paźniej jamu dadali jašče paŭtara hoda za nibyta złosnaje niepadparadkavańnie administracyi kałonii. Pryznavać vinu Siarhiej kateharyčna admoviŭsia.
Cichanoŭskaha trymali ŭ poŭnaj izalacyi ad śvietu. Bolš za dva hady pra jaho nie było nijakaj infarmacyi. Na voli za miažoj jaho čakali syn Karniej i dačka Ahnija. I žonka Śviatłana Cichanoŭskaja.
Biznesmien, biełaruska sa Šviecyi, chłopiec, asudžany za čat na piaciarych. Kaho jašče vyzvalili i vyvieźli ŭ Vilniu razam ź Siarhiejem Cichanoŭskim1212
Kamientary
Nu a Siarhieja, viadoma, vinšuju. U dobry šlach.