Šarenda-Panasiuk asudziła vizit Kiełaha da Łukašenki: Znajšoŭsia kupiec, hatovy handlavacca
Byłaja palitźniavolenaja Palina Šarenda-Panasiuk prakamientavała kanału «Basta!» anansavany ŚMI vizit u Minsk śpiecpradstaŭnika ZŠA pa Ukrainie Kita Kiełaha. «Atrymlivajecca, Łukašenka — małajčyna?» — aburanaja jana.
Byłaja palitźniavolenaja Palina Šarenda-Panasiuk kaža, što jaje staŭleńnie da hetaha vizitu «vielmi niehatyŭnaje».
«Atrymlivajecca, Łukašenka — małajčyna? Čverć stahodździa źbiraŭ zakładnikaŭ – i narešcie znajšoŭsia kupiec, hatovy handlavacca», — kaža jana.
Šarenda-Panasiuk miarkuje, što ŭ administracyi Trampa, mahčyma, jość dobryja biźniesmieny, «ale jak palityki — jany poŭnyja prafany».
«Znoŭ čujem kazki pra «adryŭ režymu ad Rasii». Ale adryvać tam niama čaho: Łukašenka ŭ 1994 hodzie byŭ pastaŭleny Kramlom i trymajecca vyklučna na rasijskich štykach. Nie budzie i miru va Ukrainie z boku absalutnaha satelita ahresara. Kiełah pavinien razumieć: jon jedzie da złačyncy i terarysta», — kaža Palina.
«Łukašenka nie maje lehitymnaści, i navat sto vizitaŭ Kiełaha hetaha nie źmieniać», — dadaje jana.
Šarenda-Panasiuk zajaŭlaje, što tolki vyzvaleńnie zakładnikaŭ i adsutnaść novych moža stać umovaj dla prypynieńnia sankcyj, ale nie admieny ich.
«Poŭnaje i biezumoŭnaje vyzvaleńnie ŭsich biełaruskich zakładnikaŭ i maratoryj na novyja represii — tolki heta moža stać umovaj dla prypynieńnia, ale nie admieny sankcyj», — upeŭnienaja jana.
Palina Šarenda-Panasiuk była zatrymanaja ŭ studzieni 2021 hoda i ŭ červieni prysudžanaja da dvuch hadoŭ pazbaŭleńnia voli pavodle art. 364, 368 i 369 KK (abraza Łukašenki i pradstaŭnika ŭłady, hvałt u dačynieńni da milicyjanta). Jana pavinna była vyjści na volu ŭ 2022 hodzie, ale joj dvojčy dadavali pa hodu kałonii.
Kamientary
jakoje siońnia nadvorje ŭ vašaj krainie ružovych poni ? ci heta malitva rpc:šnaja ? jakoje heta maje dačynieńnie da rečaisnaści