U Izraili 1 zahinuŭ, 40 paranienych ad iranskaj balistyki. Pačałasia treciaja chvala ŭdaraŭ pa Iranie
Pa papiarednich acenkach, ahułam Iran vypuściŭ pa Izraili kala 150 rakiet.
Miedycynskija słužby paviedamili pra dzieviać miescaŭ padzieńnia snaradaŭ.
Paciarpiełych 41 čałaviek. Adzin ź ich paźniej pamior u balnicy. Jašče adzin atrymaŭ mocnyja traŭmy, astatnija atrymali lohkija traŭmy abo im spatrebiłasia dapamoha miedykaŭ dla vychadu sa stanu šoku.
U palicyi zajavili:
«Palicejskija sapiory ŭ ciapierašni čas pracujuć nad izalacyjaj miescaŭ traplańniaŭ. My prosim hramadskaść trymacca dalej ad miesca traplańniaŭ i padparadkoŭvacca ŭkazańniam palicyi na miescach. Vykonvajcie ŭkazańni kamandavańnia tyłu i zastavajciesia ŭ abaronienych zonach».
Pieralik rajonaŭ, u jakija byli celilisia iranskija rakiety, pryvodziać śpiecyjalizavanyja resursy:
- Finansavy centr Tel-Aviva;
- Ministerstva abarony Izraila;
- Ministerstva ekanomiki;
- Avijabaza Tel-Nof;
- Niekalki punktaŭ u rajonie Chajfy;
- Hazavaja płatforma la ŭźbiarežža Hazy.
Ministr abarony Izraila Israel Kac vystupiŭ z žorstkaj zajavaj:
«Iran pierajšoŭ čyrvonuju rysu, kali advažyŭsia zapuścić rakiety pa cyvilnych nasielenych punktach u Izraili. My praciahniem abaraniać hramadzian Izraila i zabiaśpiečym, kab režym ajatał zapłaciŭ vielmi vysokuju canu za svaje złačynnyja dziejańni».
U hetyja chviliny adbyvajecca novaja chvala izrailskich udaraŭ pa Iranie. Izrailskija ŚMI pišuć, što metaj hetaj chvali stali ŭstanoŭki supraćpavietranaj abarony Irana ŭ rajonie stalicy, Tehierana.
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia1
Kamientary