Rasija nie zmoža adnavić straty dalniaj avijacyi paśla ŭkrainskaj apieracyi «Pavucińnie»

Na jadzierny patencyjał Rasii straty asabliva nie paŭpłyvajuć, bo jon u asnoŭnym składajecca z rakiet naziemnaha i padvodnaha bazavańnia, kažuć zachodnija eksperty, ź jakimi pahutaryła Reuters. Adnak padbityja bambaviki Tu-95MS i Tu-22M3 byli častkaj parku dalniaj avijacyi, i ich Rasija vykarystała na praciahu ŭsioj vajny dla naniasieńnia udaraŭ zvyčajnymi rakietami pa ŭkrainskich haradach, abaronnych zavodach, vajskovych bazach, enierhietyčnych abjektach i inšym celach, kaža Džaścin Bronk, ekśpiert pa avijacyi z Łondanskaha karaleŭskaha abjadnanaha instytuta abaronnych daśledavańniaŭ (RUSI).

Na raspaŭsiudžanych Słužbaj biaśpieki Ukrainy videakadrach ataki dronaŭ vidać, što niekatoryja samaloty zabiaśpiečanyja kryłatymi rakietami Ch-101. Hetyja ž samaloty pieryjadyčna ździajśniali patrulnyja paloty ŭ Arktycy, Paŭnočnaj Atłantycy i paŭnočnaj častcy Cichaha akijana dla demanstracyi siły i strymlivańnia zachodnich praciŭnikaŭ Rasii.

Pierad uvarvańniem va Ukrainu ŭ 2022 hodzie Rasija mieła pavietrany fłot z 50-60 samalotaŭ Tu-95MS i kala 60 Tu-22M3, a taksama prykładna 20 ciažkich bambavikoŭ Tu-160M, zdolnych nieści jadziernyja bojehałoŭki, kaža Bronk. Pa jaho acency, jana straciła bolš za 10% sukupnaha parku Tu-95MS i Tu-22M3, uličvajučy ataki ŭ ramkach apieracyi SBU «Pavucińnie» i bolš rannija straty.

Pa danych Oryx, da minułych vychadnych Rasieja straciła piać Tu-22M3 i adzin Tu-95M. Hetyja straty «akažuć surjozny cisk na klučavuju rasijskuju siłu, jakaja i tak užo dziejničała na miažy mahčymaściaŭ», skazaŭ Bronk Reuters.

Na samaj spravie straty mohuć być bolšymi, choć dakładnyja acenki adroźnivajucca. SBU i Hienštab Ukrainy paviedamili, što vyvieli sa stroju 41 pavietranaje sudna Pavietrana-kaśmičnych sił RF, uklučajučy Tu-95MS i Tu-22M3, a taksama samalot dalokaha radyjołakacyjnaha vyjaŭleńnia A-50.

U NATA The Moscow Times paćvierdzili maštaby škody: «Ukrainskim vajskoŭcam udałosia paškodzić bolš za 40 rasijskich samalotaŭ. Ad 10 da 13 ź ich byli źniščanyja, u tym liku jak minimum adzin raźviedvalny samalot A-50».

Pavodle acenki ZŠA, udaru zaznali da 20 samalotaŭ, ź jakich kala 10 byli źniščanyja, raskazali Reuters dva amierykanskija čynoŭniki. Pra 20 samalotaŭ sa spasyłkaj na čynoŭnikaŭ ZŠA, znajomych sa źviestkami raźviedki, pisała i The New York Times, choć heta było da taho, jak SBU ŭ sieradu apublikavała novyja videa z dronaŭ, jakija atakavali rasijskija avijabazy.

Na hetych videa, u pryvatnaści, bačna, jak drony pryziamlajucca na dva samaloty A-50. Nieviadoma, praŭda, ci nanieśli jany im straty, bo zdymka zaviaršajecca da mahčymaha vybuchu. Na samalotach nie vidać ruchavikoŭ, to jość mahčymaść, što jany nie ekspłuatavalisia, skazaŭ The Wall Street Journal Sem Łejr z Daśledčaha centra pa nieraspaŭsiudžańni zbroi Džejmsa Marcina. Na zroblenych u paniadziełak spadarožnikavych zdymkach adsutničaje adzin ź piaci A-50, jakija znachodzilisia na bazie.

Zamianić Tu-95M i Tu-22M3 budzie prablematyčna. Jany byli źniatyja z vytvorčaści jašče ŭ saviecki čas, a najaŭnyja samaloty madernizavalisia, kaža Duhłas Bary, ekśpiert pa aerakaśmičnaj technicy ź Mižnarodnaha instytuta stratehičnych daśledavańniaŭ u Łondanie. Uznaŭleńnie takich ža samalotaŭ jon ličyć vielmi małavierahodnym, i nieviadoma, ci jość u Rasii choć by prydatnyja dla vykarystańnia karpusy dla ich. Akramia taho, zachodnija sankcyi abmiažoŭvajuć pastupleńnie ŭ Rasieju takich kampanientaŭ, jak mikrapracesary, jakija nieabchodnyja dla avijoniki, choć častkova joj udajecca zakuplać ich pa alternatyŭnych kanałach, dadaje Bary.

Rasija vyrablaje Tu-160M, ale, jak paviedamiŭ adzin Z-błohier, usiaho čatyry štuki na hod, adznačaje Reuters. Pavolna idzie i raspracoŭka šmatmetavaha stratehičnaha bambavika-rakietanosca novaha pakaleńnia PAK DA.

Vyprabavalnyja paloty zapłanavanyja nie raniej nastupnaha hoda, a vytvorčaść moža pačacca tolki ŭ 2027 hodzie. Ciapier, paśla straty častki dalniaj avijacyi, treba było b paskoryć praces, ale heta naŭrad ci mahčyma, miarkuje Chans Krystensen ź Fiederacyi amierykanskich navukoŭcaŭ.

Bronk z RUSI taksama skieptyčny: «Praź niedachop biudžetnych srodkaŭ i sankcyjnych abmiežavańniaŭ na pastaŭku materyjałaŭ i technałohij Rasii ŭ pryncypie budzie ciažka vykanać prahramu PAK i ŭ najbližejšyja piać hadoŭ, nie kažučy ŭžo pra jaje paskareńnie».

Mik Małroj, były namieśnik pamočnika ministra abarony ZŠA, skazaŭ WSJ:

«Pavucińnie» ŭvojdzie ŭ historyju jak adna z samych efiektyŭnych śpiecapieracyj z vykarystańniem raźvieddadzienych. Tajemnaja raspracoŭka płatformy dla jaje praviadzieńnia, apieratyŭnaja biaśpieka, jakuju ŭdałosia zabiaśpiečyć dla jaje realizacyi, a taksama majsterstva i vopyt, nieabchodnyja dla vykanańnia, byli vyklučnymi».

Apytanka

• 11
• 0
• 0
• 0
• 0
• 0
• 0
• 0