Kiraŭnik Nacbanka Biełarusi ŭ intervju telekanału ANT prakamientavaŭ pytańnie ab mahčymym abmiežavańni pryjomu i prodažu dalaravych kupiur staroha ŭzoru ŭ krainie, piša BiełTA.
«My nie źjaŭlajemsia emitentam dalaraŭ ZŠA. Hetyja kupiury vypuskajuć Złučanyja Štaty Amieryki. U ZŠA niama nijakaj roźnicy. U abarocie znachodziacca kupiury niekalkich hadoŭ vypusku. Možna biez prablem zdać, abmianiać dołary na bolš novyja sieryi, — adznačyŭ Raman Hałoŭčanka. — Va ŭsim astatnim śviecie, u tym liku i ŭ nas, heta zamiežnaja valuta».
Suśvietnaja sistema praduhledžvaje, što emitent kanviersijnaj valuty (dalar, jeŭra, jena, juań) zabiaśpiečvaje banki inšych krain najaŭnaściu dla zamieny znošanych kupiur, i raniej prablem z hetym nie ŭźnikała. Adnak ciapier z-za sankcyj suprać finansavaha siektara i bankaŭ Biełarusi praviadzieńnie takich abmiennych apieracyj uskładniłasia.
Havoračy pra dalary i inšyja kupiury roznych vypuskaŭ, što zachoŭvajuć płaciežazdolnaść, Hałoŭčanka zajaviŭ, što na dziaržaŭnym uzroŭni nie prymałasia i nie budzie prymacca rašeńniaŭ ab abmiežavańni ich pryjomu abo prodažu.
«Na ŭzroŭni dziaržavy nie prymałasia i nie budzie prymacca nijakich rašeńniaŭ pa abmiežavańni pryjomu abo prodažu kupiur roznych hadoŭ vypusku — bolš starych abo bolš novych. Treba razumieć, što va ŭmovach adsutnaści takoj masavaj padpitki zamiežnaj valutaj my ŭ pryncypie abmiežavanyja tymi banknotami, jakija cyrkulujuć u krainie».
Kiraŭnik Nacbanka znoŭ akcentavaŭ uvahu, što kupiury ŭsich uzoraŭ u abarocie prymajucca pa adnolkavaj canie, i parekamiendavaŭ aryjentavacca na instrumienty, na jakija dziaržava moža ŭpłyvać naŭprost — biełaruski rubiel i nacyjanalnyja kaštoŭnyja papiery.
Kamientary