Ministerstva finansaŭ ZŠA paviedamiła, što spyniaje vytvorčaść adnacentavych maniet (pieńni) i nie budzie bolš zapuskać ich u abaračeńnie, piša CNN.
Apošniuju partyju zahatovak dla pieńni ŭžo zakazali, i maniety buduć vyrablacca tolki da taho času, pakul jany nie skončacca. Ludzi zmohuć praciahvać karystacca najaŭnymi pieńni, ale novyja maniety ŭ abarot nie pastupiać. U budučyni, pry najaŭnych raźlikach, suma budzie akruhlacca da najbližejšaj pavodle naminału piacicentavaj maniety.
Pryčyna spynieńnia vypusku pieńni — ekanamičnaja: vytvorčaść adnaho kaštuje bolš za try centy, što ŭtraja pieravyšaje naminalny košt maniety. Prezident ZŠA Donald Tramp jašče ŭ lutym zajaviŭ, što heta «marnatraŭstva», i rasparadziŭsia spynić vytvorčaść. Jon zaklikaŭ «prybrać marnatraŭstva ź biudžetu, navat kali heta — pa adnym pieńni za raz».
Administracyja prezidenta ZŠA miarkuje, što heta rašeńnie dazvolić aščadzić 56 miljonaŭ dalaraŭ u hod. Ale jość niuans: vytvorčaść piacicentavych maniet (nikielaŭ) jašče daražejšaja — kala 13,8 centa za adzinku. Kali spyniać vypusk pieńni, to kolkaść nikielaŭ u abarocie, chutčej za ŭsio, daviadziecca pavialičyć, i heta moža pierakreślić usialakuju ekanomiju.
Ale ŭ toj ža čas prynamsi častka ekśpiertaŭ i handlaroŭ padtrymlivajuć ideju — na praktycy pieńni mała chto vykarystoŭvaje, mnohija amierykancy pakidajuć ich u bankach ci prosta kidajuć. Handlovyja sietki adznačajuć, što admova ad pieńni paskoryć apracoŭku najaŭnych raźlikaŭ.
Raniej padobnuju apieracyju zrabiła susiedniaja Kanada. Hetaja kraina spyniła vypusk svaich pieńni ŭ 2012 hodzie, a z 2013-ha całkam vyvieła ich z abaračeńnia.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA15
Kamientary