Na UNS zaćvierdzili prahramu sacyjalna-ekanamičnaha raźvićcia Biełarusi na piacihodku. U joj siem pryjarytetaŭ

Prahrama vyznačaje siem asnoŭnych pryjarytetaŭ na piacihodku.

Pieršym ź ich źjaŭlajecca nacyjanalnaja demahrafičnaja biaśpieka — zachavańnie nasielnictva, umacavańnie zdaroŭja i padtrymka siamji.

Druhi pryjarytet — raźvićcio čałaviečaha patencyjału praź jakasnuju adukacyju i vychavańnie harmaničnaj, patryjatyčnaj asoby.

Treci — stvareńnie zručnaha i jakasnaha asiarodździa dla žyćcia.

Čaćviorty napramak praduhledžvaje pavyšeńnie kankurentazdolnaści ekanomiki, paskareńnie technałahičnaha raźvićcia i ličbavuju transfarmacyju.

Piatym pryjarytetam stali mocnyja rehijony, šostym — umacavańnie abaranazdolnaści dziaržavy i raźvićcio abaronnaj haliny ekanomiki, siomym — raskryćcio turystyčnaha patencyjału krainy. Dla kožnaha z napramkaŭ prapisany kankretnyja zadačy.

Pavialičyć

Premjer-ministr Alaksandr Turčyn: prezientujučy prahramu, adznačyŭ, što jaje realizacyja dazvolić hramadzianam adčuć palapšeńnie jakaści žyćcia ŭžo ciaham nastupnych piaci hadoŭ. Jana nibyta całkam zabiaśpiečana finansavańniem, a krynicy srodkaŭ raźličany z ulikam realnych mahčymaściaŭ ekanomiki.

Vykanańnie pastaŭlenych zadač budzie štohod razhladacca na Usiebiełaruskim narodnym schodzie, a pry nieabchodnaści ŭ prahramu mohuć unosicca źmieny.

Płanujecca, što za piacihodku vałavy ŭnutrany pradukt krainy vyraście na 15,8%, u siarednim nie mienš jak na 3% štohod. Asobnaja ŭvaha nadajecca dyviersifikacyi ekspartu i raźvićciu vysokatechnałahičnych vytvorčaściaŭ — ad pramysłovych robataŭ i bieśpiłotnych sistem da mikraelektroniki, farmaceŭtyki i elektramabilaŭ.

Da 2030 hoda ŭsie darohi ad rajonnych centraŭ da ahraharadkoŭ pavinny atrymać udaskanalenaje pakryćcio. Usiaho zapłanavana rekanstrujavać, pabudavać abo kapitalna adramantavać nie mienš za 25 tysiač kiłamietraŭ daroh. Za piać hadoŭ płanujecca ŭźvieści kala 5 miljonaŭ kvadratnych mietraŭ arendnaha žylla, što pavinna dapamahčy pryciahnieńniu kadraŭ u rehijony.

Siarod bujnych inviestycyjnych prajektaŭ — budaŭnictva druhoha zavoda pa vypusku sulfatnaj celułozy, stvareńnie vytvorčaści poliprapilenu, dakładnaha aluminijevaha lićcia i traktaroŭ vysokaj mahutnaści. Taksama ŭ krainie źjavicca Centr raźvićcia pradprymalnictva, a dola małoha i siaredniaha biznesu ŭ vałavaj dadatkovaj vartaści pavinna dasiahnuć 33%.

Asobny akcent robicca na raźvićci abaronnaj pramysłovaści, ukaranieńni inavacyjnych uzoraŭ uzbrajeńnia i vajskovaj techniki.

U ahrapramysłovym kompleksie zapłanavana budaŭnictva bolš za 200 małočnatavarnych i piaci bujnych śvinakompleksaŭ.

U sacyjalnaj śfiery stavicca meta pavialičyć naradžalnaść (na 1 tys. čałaviek z 6,5 da 7), źnizić śmiarotnaść i padoŭžyć siaredniuju praciahłaść žyćcia da 76,5 hoda. Płanujecca ŭźvieści kala 20 dziciačych sadoŭ i 27 škoł, a taksama pašyryć mahčymaści dadatkovaj adukacyi darosłych.

U achovie zdaroŭja stavicca zadača achapić dyspansieryzacyjaj nie mienš za 95% darosłaha nasielnictva i raźvivać sietku mižrajonnych centraŭ śpiecyjalizavanaj miedycynskaj dapamohi.

U ekałahičnaj śfiery płanujecca pavialičyć pierapracoŭku ćviordych kamunalnych i vytvorčych adkidaŭ i ŭvieści ŭ stroj siem novych abjektaŭ pa abychodžańni ź ćviordymi kamunalnymi adkidami.

U turyźmie za piać hadoŭ płanujecca pabudavać i rekanstrujavać kala 100 abjektaŭ, kab zrabić halinu adnym z drajvieraŭ ekanomiki.

Na rynku pracy hałoŭnaja meta — zabiaśpiečyć bałans kadraŭ, nie dapuścić ich adtoku i adnačasova zavabić zapatrabavanych śpiecyjalistaŭ. Uzrovień zabiaśpiečanaści kadrami pavinien składać nie mienš za 97%, z asablivaj uvahaj da moładzi i jaje chutkaj intehracyi ŭ ekanomiku krainy.

• 1
• 0
• 17
• 3
• 0
• 0
• 0
• 0