Praŭładnaja błohierka z Barysava paprasiła padpisčykaŭ padzialicca prablemnymi pytańniami. I joj ich nakidali
Park patrebny, ale spačatku — prybiralni, daktary i aŭtobusy. Žychary Barysava raskazali pra realnyja, a nie pakaznyja prablemy horada. A błohierka, jakaja prapanavała sabrać pytańni dla «hałoŭnaha», naŭrad ci čakała, što narodny śpis atrymajecca takim doŭhim i złym, piša Ex-press.live.
Paśla taho jak u Barysavie abviaścili ab vydzialeńni 3 miljonaŭ rubloŭ na ŭparadkavańnie haradskoha parku, praŭładnaja błohierka vyrašyła padtrymać temu. Jana prapanavała padpisčykam raskazać pra nadzionnyja haradskija prablemy Barysava.
Pry hetym sama ličyć, što prablema numar adzin — heta park, u jaki nie moža pryvodzić svaich dziaciej. Błohierka paabiacała danieści prablemy «našamu hałoŭnamu» i atrymać adkazy.
«Pišycie ŭsie svaje dumki i idei, chutka ŭsio ŭbačycie, usie adkazy našaha hałoŭnaha», — paabiacała jana.
Reakcyja barysaŭcaŭ akazałasia niečakana maštabnaj. Zamiest padtrymki temy parku žychary Barysava vykacili ceły śpis niavyrašanych pytańniaŭ, jakija, na ich dumku, kudy važniejšyja za pryhožyja alei.
Mnohija kamientatary sapraŭdy padtrymali ideju rekanstrukcyi parku, adznačajučy, što Barysavu daŭno nie chapaje zony adpačynku z atrakcyjonami. Adnak razam z hetym hučali i skieptyčnyja hałasy — niekatoryja adkryta nazvali park «hańbaj horada».
Haradskija prybiralni — adna z samych vostrych tem
Siarod kamientaroŭ asabliva časta ŭzdymałasia tema adsutnaści hramadskich prybiralniaŭ u centry, na praśpiekcie i ŭ samim parku:
«U horadzie niama nivodnaj hramadskaj prybiralni, navat płatnaj».
«Chaciełasia b schadzić u čystuju, zručnuju prybiralniu, a nijakaj naohuł niama».
«Čamu ŭ Starym horadzie tualetaŭ niama, usio začyniena?»
Prablemy daroh, tratuaraŭ i transpartu
Ludzi skardziacca na:
- adsutnaść narmalnych daroh u pryvatnym siektary (vulicy Maładziožnaja, Čkałava, Dymki);
- tratuary, jakija niemahčyma prajści nočču z-za adsutnaści aśviatleńnia;
- redkija rejsy aŭtobusaŭ, asabliva ŭ stary horad i ŭ vychadnyja;
- niedachop tratuaraŭ i viełaściežak pamiž Barysavam i Žodzinam.
Achova zdaroŭja i apteki
Haradžanie ŭźniali pytańni dastupnaści miedycyny:
«U 4-j paliklinicy trapić da traŭmatołaha abo nieŭrołaha — treba ŭstavać a 5-j ranicy. Nam patrebna jašče adna paliklinika».
«Na Čyrvonaarmiejskaj daŭno nie pracuje krama, nie chodziać aŭtobusy i maršrutki. Da prypynku iści chvilin 20 pa žvirovaj darozie z kamianiami, ad jakoj abutak imhnienna psujecca i nohi stamlajucca».
«Niama aptek u vielizarnych rajonach — Panfiłava, Maksimava, Torfbałota».
«Infiekcyjnaja balnica — heta žach. Lažała z dačkoj paru tydniaŭ tamu — nie pieradać słovami, jaki tam kašmar. Para zrabić kapitalny ramont, a nie pierakładać darohi i sadžać tui».
«Chočacca, kab piataja paliklinika była ŭkamplektavanaja daktarami».
Sacyjalnyja prablemy i pytańni biaśpieki
«Rajon Zaliniejny — voś heta treš. Nivodnaha adździaleńnia banka, niama aptek, para saŭdepaŭskich kram, a transpart — heta naohuł asobny treš. Ale nichto ničoha nie robić i rabić nie budzie, heta prosta razmovy».
«Vychavańnie padletkaŭ? Prypynki novyja, a ŭžo raźbityja».
«Niama prytułkaŭ dla biazdomnych žyvioł, zhublenych niama kudy padzieć».
«Lifty, padjezdy brudnyja, śmiećcie nie vyvozicca».
«Dzie dyskateki? Dzie miescy dla dziaciej i moładzi? U horadzie dla ich ničoha niama».
Stary horad — asobny bol
Žychary staroj častki horada pieražyvajuć:
- adnosna zakrytaj kniharni;
- niama dzie hulać ź dziećmi;
- adnosna zakinutych dvaroŭ i fasadaŭ, jakija 20 hadoŭ nie farbujucca;
- adnosna stychijnaha śmietnika la pomnika achviaram Barysaŭskaha hieta i vakoł vakzała.
«I što źmienicca?»
Mnohija kamientatary pastavilisia da sproby błohierki sabrać pytańni ź ironijaj:
«Zanadta šmat błohieraŭ raźviałosia».
«Vy chto takaja, kab vyrašać pytańni?»
«My atrymajem adkazy — i što dalej?»
«Nie treba ničoha mianiać. Navat Puhačovaj z Hałkinym Barysaŭ spadabaŭsia».
I heta jašče nie ŭsio…
Pa reakcyi barysaŭcaŭ vidać: ich štodzionnaje žyćcio poŭnaje niavyrašanych bazavych pytańniaŭ — ad prybiralni da aŭtobusa. I kali zamiest kompleksnaha padychodu akcent robicca na adnu vitrynnuju zonu adpačynku, heta vyklikaje razdražnieńnie.
Park patrebny. Ale žychary Barysava chočuć nie tolki park.
«Mianie kałaciła, ciakli ślozy». Samalot «Biełavija», jaki lacieŭ z Bresta ŭ Antalju, pryjšłosia raźviarnuć nad Rasijaj
«Abo toŭstyja pisali, abo ź dziećmi». Fanat Łukašenki Žan Sodziel nie zmoh znajści žonku i aburajecca, što «dziaŭčaty pajšli nie tyja»
Pracuje ŭ kałhasie, piša knihi i pijaryć rodnaje Paleśsie. Heta ŭsio pra 27-hadovaha Dzieda Jankiela
«Heta nie ja abrała Babu Niuru, a jana mianie». Błohierka raskazała, čamu stała tyktok-zorkaj u vobrazie viaskovaj žančyny
Ciapier čytajuć
Jak vypadkovaje znajomstva ŭ hiej-kłubie skončyłasia hučnym zabojstvam. Novyja detali pa spravie biełarusa, jaki 25 hadoŭ tamu zarezaŭ pradziusara ŭ Maskvie44
Kamientary