Siońnia fakielnym šeściem i pieśniaj Beatles Hiermanija pravodzić Šolca
Heta ŭračystaja i vielmi zapaminalnaja cyrymonija.
Großer Zapfenstreich — u litaralnym pierakładzie «vialiki ŭdar pa piŭnym kranie» — vyšejšaja vajskovaja cyrymonija ŭ Hiermanii, jakoj mohuć udastoicca nie tolki vajskoŭcy, ale i hramadzianskija, piša ruskamoŭnaje miedyja pra Bierlin GENAU.
Prachodzić jana redka, vyhladaje navat trochi mistyčna: ciemra, vystrailisia ŭ stroj sałdaty z pachodniami, arkiestr Bundeśviera ihraje ŭračystyja maršy, vynosiać ściahi, prachodzić hanarovaja varta. Adzin raz ubačycie — nie zabudziecie. Ołaf Šolc, jaki pakidaje pasadu kanclera, napeŭna nie zabudzie — mienavita dziela jaho siońnia ŭ Bierlinie pierakryjuć vulicy la Ministerstva abarony.
Ale adkul takaja dziŭnaja nazva? Pry čym tut piŭny kran? Upieršyniu vyraz Großer Zapfenstreich zhadvajecca ŭ 1596 hodzie. U tyja časy aficer, jaki supravadžaŭsia barabanščykam abo flejtystam, pa viečarach abychodziŭ karčmy i ŭdaram pałki pa kranie piŭnoj bočki sihnalizavaŭ: usio, chopić — dapivajcie i pa namiotach. Paśla hetaha padavać ałkahol było zabaroniena, a za sproby praciahu stroha karali.
Z časam tradycyja evalucyjanavała i rabiłasia ŭsio bolš uračystaj. U sučasnym vyhladzie jana źjaviłasia ŭ pieršaj pałovie XIX stahodździa. Ale nazva z kranam zastałasia.
Kab dadać cyrymonii indyvidualnaści, hanarovamu hieroju dazvalajuć vybrać try muzyčnyja tvory — arkiestr ich razvučyć i syhraje ŭ jaho ci jaje honar.
Tak Anhiełu Mierkiel pravodzili pad Ninu Chahien — tady heta zdavałasia pank-žestam i vyklikała niamała abmierkavańniaŭ.
A što abraŭ Šolc? Voś jaho treklist:
The Beatles — In My Life. Spakojnaja, pryhožaja, ź psieŭdabachaŭskim projhryšam na kłavišach. Amal zaŭsiody tyrčyć u śpisach lepšych piesień usich časoŭ.
Aretha Franklin — Respect. Lehienda šaścidziesiatych, znakavaja pieśnia ŭ historyi pop-muzyki. Vierahodna, prachodzić u Šolca pa razradzie rok-n-rołu.
I narešcie — druhi Brandenburhski kancert Bacha. Tut usio simvalična: paśla adstaŭki Šolc stanie zvyčajnym deputatam ad Patsdama — stalicy Brandenburha. Taki voś muzyčny namiok.
A ŭžo zaŭtra Bundestah pavinien prahałasavać za novaha kanclera — Frydrycha Mierca.
-
Tramp prymaje vialikuju dozu aśpirynu dla razredžvańnia kryvi. Praz heta ŭ jaho lohka źjaŭlajucca siniaki
-
Kala 40 čałaviek zahinuli, bolš za 100 z traŭmami. Achviary strašnaha pažaru na raskošnym alpijskim kurorcie
-
23‑hadovaha ŭkrainca zatrymali ŭ Varšavie z hłušyłkaj — jon źviarnuŭ na siabie ŭvahu tym, što hadzinami prasiedžvaŭ u kaviarni ŭ aeraporcie
«Zapuskajcie dalej saluty, a ja vykliču milicyju». Biełarusy spračajucca pra zabaronu na fiejervierki2
Kamientary