«Prapahanda, jak u Paŭnočnaj Karei». Palaki nie vierać vybaru tavaraŭ u babrujskim «Hrynie»
Tyktokierka apublikavała videa z hipiermarkieta «Hryn» i sabrała sotni kamientaŭ ad palakaŭ. Tyja nie vierać, što ŭ Biełarusi pracujuć takija kramy, i nazyvajuć rolik pakazuchaj.
Videa, pra jakoje idzie havorka, vyjšła 5 dzion tamu i maje ŭžo amal 54 tysiačy prahladaŭ. Tyktokierka tu.polanka prosta prajšłasia pa adnym ź biełaruskich hipiermarkietaŭ i źniała ŭsio toje, što možna tam nabyć, a ŭ kamientach adznačyła, što hety «Hryn» znachodzicca ŭ Babrujsku.
Akaunt, dzie vyjšaŭ rolik, polskamoŭny, tamu videa pryvabiła pierš za ŭsio palakaŭ.
I rolik ich nastolki ździviŭ, što jany pakinuli pad im sotni kamientaroŭ. Samaja papularnaja dumka — paraŭnańnie z KNDR, dzie, jak ličycca, isnujuć pakazušnyja kramy z bahatym asartymientam:
«Takaja prapahanda, jak u Paŭnočnaj Karei: kramy nibyta jość, ale miascovyja ŭ ich nie chodziać, bo niama za što».
«Krama jak u Paŭnočnaj Karei. Bahata tavaru i niejkija statysty».
«Kolki takich kramaŭ u Biełarusi, piać-šeść».
«U Paŭnočnaj Karei taksama takija kramy jość, kali Kim pryjazdžaje».
Palaki častkova arhumientavali svoj niedavier tym, što ŭ videa amal niama pakupnikoŭ. Pry hetym nieviadoma, kali źniali rolik — mahčyma, heta była siaredzina pracoŭnaha dnia. Adna z kamientatarak patłumačyła paŭpustuju kramu jašče i tym, što ŭ Biełarusi, u adroźnieńnie ad Polščy, vialikija kramy pracujuć u niadzielu, tamu niama nieabchodnaści biehčy pa pradukty ŭ kankretny čas — dla hetaha jość dadatkovy dzień.
Ale ž palakaŭ było nie spynić, chacia niekatoryja ź ich i žartavali z takoha padychodu:
«Adsutnaść ludziej u kramie kaža pra fatalny stan ekanomiki».
«Davoli pusta, krama dla elity».
«Niejak natoŭp nie vidać. Kramy možna mieć, tolki chto tam budzie kuplać? Biadnota z kałhasaŭ?»
Biełarusy taksama zajšli ŭ kamientary i patłumačyli — dla niekatorych žycharoŭ krainy ceny ŭ supiermarkiecie ciapier zavialikija, kab tudy chadzić.
Niekatoryja z palakaŭ ščyra pryznalisia, što krama ich uraziła ŭ dobrym sensie. Voś tolki kali ŭ Biełarusi jość takija kramy, dla palakaŭ zastajecca zahadkaj, čamu biełarusy hatovyja jechać u Polšču «na zakupy»:
«U Biełarusi ŭ kramach śviežaja miascovaja harodnina, a nie časnok z Kitaja i sparža ź Jehipta, pakrytyja santymietrovym słojem vosku».
«Pustych vitryn niama, ale heta nie značyć, što ludziam na ŭsio chapaje».
«Dyk cikava, čamu jany pryjazdžajuć da nas u Biełastok na zakupy».
«Naša Niva» — bastyjon biełaruščyny
PADTRYMAĆCiapier čytajuć
«Pamiery pałochajuć». Jak vyhladaje znutry novaadkryty handlovy centr u «Minsk-Śviecie» FOTY11
Kamientary