Odry Bakbierh, jakoj ciapier 82 hady, bieź viestak źnikła sa svajho domu ŭ miastečku Rydsburh 7 lipienia 1962 hoda. Na toj momant joj było 20 hadoŭ, paviedamlaje palicyja štata Viskonsin, piša Bi-bi-si.
Jak udakładnili ŭ ofisie šeryfa, žančynu šukali šmat hadoŭ. Niadaŭna da rasśledavańnia viarnulisia ŭ ramkach standartnaj prahramy pa pracy z «chałodnymi spravami».
Vyśvietliłasia, što ciapier Bakbierh žyvie ŭ inšym štacie, a «z domu źjechała pa ŭłasnaj voli, a nie ŭ vyniku złačynnaj dziejnaści ci supraćpraŭnych dziejańniaŭ».
Šeryf raspavioŭ, što ŭsie hetyja hady žančyna žyła pa-za miežami Viskonsina, ale inšych padrabiaznaściaŭ nie paviedamiŭ.
Pavodle danych niekamiercyjnaj arhanizacyi, Odry Bakbierh vyjšła zamuž, kali joj było kala 15 hadoŭ. U šlubie naradzilisia dvoje dziaciej.
Adnosiny z mužam byli składanymi, niezadoŭha da źniknieńnia Odry padała ŭ sud, śćviardžajučy, što muž biŭ jaje i pahražaŭ zabić. U dzień svajho źniknieńnia žančyna pajechała na tkackuju fabryku, kab zabrać zarobak.
Razam ź niańkaj svaich dziaciej Odry dabrałasia aŭtaspynam da Medysana (stalicy Viskonsina), paśla žančyny pierasieli na aŭtobus i dajechali da Indyjanapalisa (štat Indyjana).
14-hadovaja niańka raskazała palicyi, što źniervavałasia i zachacieła viarnucca dadomu, ale Odry admoviłasia. Apošni raz jaje bačyli na aŭtobusnym prypynku.
Ofis šeryfa raskazaŭ, što ŭsie hetyja hady śledčyja aktyŭna šukali źnikłuju žančynu, razhladajučy roznyja viersii, ale sprava «zajšła ŭ tupik».
Prahres adbyŭsia, kali na pačatku hetaha hoda jany praviali ŭsiebakovy analiz starych materyjałaŭ i znajšli ŭ sacsietkach staronku siastry źnikłaj, raskazaŭ Ajziek Hiensan, jaki raskryŭ hetuju spravu.
Jon źviazaŭsia z šeryfam horada, dzie ciapier žyvie Odry Bakbierh, i razmaŭlaŭ ź joj pa telefonie 45 chvilin.
«Ja dumaju, jana prosta źjechała. Adyšła ad usiaho, pačała zajmacca svaimi spravami i žyć svaim žyćciom, — skazaŭ jon WISN. — Padajecca, jana ščaślivaja. Upeŭnienaja ŭ svaim rašeńni. I ni pra što nie škaduje».
Ciapier čytajuć
Zahinuŭ biełaruski dobraachvotnik Alaksiej Łazaraŭ2
Kamientary