Kiroŭca karšerynha Bolt prataraniŭ aharodžu na litoŭskaj miažy i byŭ zatrymany ŭ Biełarusi
Na miažy Litvy i Biełarusi ŭ noč na niadzielu adbyŭsia niezvyčajny incydent: aŭtamabil Bolt na vialikaj chutkaści prabiŭ aharodžu i apynuŭsia na terytoryi Biełarusi. Jak miarkujecca, kiroŭca byŭ niećviarozy. Jaho zatrymali biełaruskija pamiežniki.
Pavodle paviedamleńnia Słužby achovy dziaržaŭnaj miažy Litvy (VSAT), aŭtamabil Toyota Yaris Cross, paznačany łahatypami słužby Bolt, urezaŭsia ŭ aharodžu na litoŭskim baku miažy. Pa papiarednich danych, kiroŭca złamaŭ častku aharodžy i prajechaŭ da samaj linii dziaržaŭnaj miažy.
Jak paviedamlajecca, na hetym učastku da miažy viadzie staraja daroha, jakaja zakančvajecca znakam «tupik», a dalej — darožnym znakam, što ruch zabaraniajecca.
Ale kiroŭca, jaki ŭnačy na vialikaj chutkaści ruchaŭsia pa hetym učastku, praihnaravaŭ darožnyja znaki. U ciemry jon najechaŭ na aharodžu z kalučym drotam, ustanoŭlenuju ź litoŭskaha boku dla abarony ad niezakonnaj mihracyi. Paškodziŭšy aharodžu, mašyna vylecieła na biełaruski bok.
Mašyna była surjozna paškodžanaja, spracavali paduški biaśpieki.
Biełaruskija pamiežniki chutka zatrymali parušalnika, jaki, pavodle paviedamleńniaŭ, chistaŭsia i byŭ, imavierna, niećviarozy.
Litoŭskija pamiežniki atrymali paćviardžeńnie, što zatrymany — hramadzianin Litvy.
Kamientary