«Maša i Miadźviedź» pakidajuć Rasiju

1 maja 2025 hoda stała viadoma pra pačatak maštabnych źmienaŭ u rabocie studyi «Animakord», jakaja stvaryła adzin z samych paznavalnych animacyjnych brendaŭ postsavieckaj prastory — multsieryjał «Maša i Miadźviedź».

Jak adznačaje miedyjaekśpiert Ivan Iljin, u hety dzień pačałasia pieršaja chvala zvalnieńniaŭ u maskoŭskim ofisie. Čakajecca, što da kanca červienia 2025 hoda dziejnaść rasijskaha padraździaleńnia budzie całkam spynienaja.

Prajekt, jaki raniej časta prezientavaŭsia jak prykład paśpiachovaha kulturnaha ekspartu, faktyčna vychodzić z-pad rasijskaj jurysdykcyi. I na heta paŭpłyvała niekalki faktaraŭ.

Pa słovach Iljina, adnoj z klučavych pryčyn stała toje, što prajekt «Maša i Miadźviedź» daŭno pierastaŭ być całkam rasijskim. Jašče ŭ 2014 hodzie pravy na multsieryjał byli pieradadzieny kiprskaj kampanii Animaccord LTD, i hałoŭny ofis studyi źmiaściŭsia na Kipry.

Stvaralnik sieryjała Aleh Kuzaŭkoŭ, jaki aformiŭ pravy na piersanažaŭ na siabie asabista, atrymaŭ mahčymaść u luby momant spynić suviazi z maskoŭskim ofisam. Tak i adbyłosia: Kuzaŭkoŭ pryniaŭ rašeńnie vyvieści prajekt z-pad rasijskaj jurysdykcyi, zrabiŭšy jaho mižnarodnaj franšyzaj.

Druhoj pryčynaj staŭ unutrany kryzis u studyi. Aleh Kuzaŭkoŭ nieadnarazova vystupaŭ suprać kanviejernaha padychodu da vytvorčaści novych sieryj, jaki naviazvała kiraŭnictva «Animakorda». Pavodle insajdaraŭ, akcent na kolkaść zamiest jakaści pryvioŭ da straty idejnaj i emacyjanalnaj nasyčanaści prajekta.

«Vycisnuli ŭsie soki ź miadźviedzia, a potym ździvilisia, što jon pierastaŭ davać miod», — kažuć pradstaŭniki industryi.

Palityzacyja i ekanomika

Jašče adna važnaja pryčyna — palityzacyja pośpiechu «Mašy i Miadźviedzia». Z pačatku 2010-ch sieryjał vykarystoŭvaŭsia jak prykład «miakkaj siły» Rasii. Jaho prezientavali na mižnarodnych forumach jak dasiahnieńnie dziaržaŭnaj padtrymki animacyi. Pry hetym sama studyja nieadnarazova prasiła nie źviazvać prajekt ź dziaržaŭnaj palitykaj, adnak hetyja zvaroty byli praihnaravanyja.

U niekatorych krainach multfilm pačali ŭsprymać jak instrumient rasijskaj prapahandy, choć jon i nie ŭtrymlivaje palityčnych elemientaŭ. Naprykład, u 2017 hodzie adna z ukrainskich arhanizacyj zaklikała zabaranić sieryjał, a The Times publikavała materyjały, dzie piersanažy razhladalisia jak palityčnyja mietafary.

Takaja reputacyja ŭskładniała mižnarodnyja prodažy i licenzavańnie, što mahło stać dadatkovym matyvam dla pieranosu prajekta z-pad rasijskaha ściaha.

Umovy viadzieńnia biźniesu ŭ Rasii taksama adyhrali svaju rolu. Sankcyjnyja abmiežavańni, padatki, žorstki kantrol za finansavymi apieracyjami praź miažu zrabili pracu ŭ rasijskaj jurysdykcyi mienš pryvabnaj. Dla franšyzy z hłabalnaj aŭdytoryjaj i miljardami prahladaŭ na YouTube pierajezd u jurysdykcyju z bolš spryjalnym klimatam vyhladaje łahična.

Jak adznačaje Iljin, «hrošy iduć tudy, dzie himn hučyć cišej, dzie lepšyja ŭmovy i nie treba tłumačyć, čamu ŭ tvaich piersanažaŭ mienavita takija kolery ci što aznačaje toj ci inšy siužet».

Što dalej

«Maša i Miadźviedź» praciahnie isnavańnie jak mižnarodny prajekt, ale ŭžo biez rasijskaha ściaha. Pavodle insajdaraŭ, Aleh Kuzaŭkoŭ płanuje adradzić prajekt u inšaj krainie — mahčyma, na Kipry abo ŭ inšaj dziaržavie z dobrymi ŭmovami dla kreatyŭnaha biznesu.

Dla dziciačaj aŭdytoryi pa ŭsim śviecie heta naŭrad ci stanie zaŭvažnaj źmienaj — hieroi zastanucca takimi ž, jak i byli. Ale dla Rasii heta aznačaje stratu: pracoŭnych miescaŭ, reputacyi, padatkovych pastupleńniaŭ.

«Rasija ŭmudryłasia prajhrać navat u mulciku», — zaŭvažaje Iljin.

• 40
• 4
• 20
• 13
• 5
• 7
• 2
• 3