U Biełarusi ŭ kinateatrach pakazvajuć askaranosny łatvijski multfilm «Płyń». Aŭtary kažuć, što nielehalna
Dystrybjutar łatvijskaha multyplikacyjnaha filma choča prymusić biełaruskija kinateatry źniać stužku z pakazu.
U biełaruskich kinateatrach pakazvajuć łatvijski film «Płyń», jaki atrymaŭ mnostva ŭznaharod, uklučajučy «Oskar» i «Załaty hłobus». Vytvorca i saaŭtar scenaryja Matys Kaža zajaviŭ, što multfilm tranślujuć nielehalna: dystrybjutar zabaraniŭ pakaz stužki ŭ Biełarusi i Rasii.
«Płyń» pakazvajuć u niekalkich staličnych kinateatrach, časam pa dva razy na dzień. Praŭda, raskład jość tolki na najbližejšyja niekalki dzion.
«Film — łaŭreat «Załatoha hłobusa», ciapier i ŭładalnik «Oskara», da taho ž jon nie źmiaščaje dyjałohaŭ i pryznačany dla siamiejnaha prahladu. Dumaju, heta dastatkova važki arhumient dla pirackich pakazaŭ», — cytujuć Kažu Delfi.
Dystrybjutarskaja kampanija Charades u aficyjnaj zajavie režysioru filma Hintsu Ziłbaładzisu skazała, što nikoli nie pradavała, nie padpisvała i nie dała nijakaha zhody na kamiercyjnaje raspaŭsiudžvańnie abo pakaz filma na fiestyvalach u Biełarusi i Rasii.
U Charades patłumačyli, što admova ad supracoŭnictva ź lubymi arhanizacyjami ŭ Rasii i Biełarusi była ŭzhodniena z režysioram jašče da suśvietnaj premjery filma ŭ prahramie «Asablivy pohlad» Kanskaha kinafiestyvalu letaś. Tady kinakampanii z Rasii i Biełarusi prajaŭlali cikavaść da prakatu «Płyni».
«Ni pry jakich abstavinach my nie pojdziem suprać vašych pažadańniaŭ. My źviažamsia z kinateatrami, jakija niezakonna demanstrujuć film u Rasii i Biełarusi, i pastarajemsia spynić hetyja pakaz, — padkreślili ŭ Charades.
«Płyń» raskazvaje historyju kata, čyj adzinoki ład žyćcia źmianiajecca, kali jaho dom razburaje mocnaje pavodka. Kab vyžyć, kat pavinien navučycca pieraadolvać strach pierad vadoj i ładzić z roznymi žyviołami.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary