Minčanku, što źbiła na pierachodzie naśmierć školnika, asudzili na dva z pałovaj hady

Trahiedyja zdaryłasia viečaram 10 studzienia. 28-hadovaja minčanka jechała za rulom baćkoŭskaha Ford F-150 pa vuł. Kasmanaŭtaŭ u napramku vuł. Słabadskoj. Jana viezła dadomu dačku siabroŭki, ź jakoj napiaredadni naviedała cyrulniu. Dziaŭčynka znachodziłasia na piarednim pasažyrskim siadzieńni, paviedamlajuć Minsk-naviny.

Vadzicielka adčuvała stomu, u jaje baleła hałava, adnak abiazbolvalnych tabletak z saboj nie było. Žančyna ruchałasia ź nievysokaj chutkaściu — nie bolš za 23 km/h, z uklučanym bližnim śviatłom far. Pakolki išoŭ mokry śnieh, pracavali ščotki.

Minčanka drenna aryjentavałasia ŭ hetym mikrarajonie, tamu ŭviała adras miesca žycharstva siabroŭki ŭ navihatar svajho telefona. Kali maršrut ruchu byŭ zrobleny, jana pakłała hadžet na prybornuju panel pierad saboj.

U hety momant aŭtamabilistka nienadoŭha zhubiła kantrol nad darožnaj abstanoŭkaj i adčuła ŭdar ab kuzaŭ pikapa. Jana pahladzieła pa bakach i napierad, ale nikoha pierad mašynaj i pobač ź joj nie ŭbačyła. Raptam ź levaha boku ŭ škle dźviarej kiroŭcy žančyna zaŭvažyła inšuju žančynu, što znachodziłasia na piešachodnym pierachodzie, jakaja kryčała i machała rukami. Minčanka vielmi spałochałasia, bo zrazumieła: adbyłosia strašnaje.

Jana ŭčapiłasia ŭ rul i praciahnuła pavolna kacicca napierad, raptam adčuŭšy, što niešta pierajechała piarednimi kołami, adnak Ford spyniła tolki praź niekalki mietraŭ. Vyjšła z sałona i aniamieła ad žachu. Zzadu pikapa stajała nieznajomaja žančyna, a na prajeznaj častcy pobač ź joj lažaŭ chłopčyk. Jon spačatku dychaŭ, ale praź niekalki chvilin pierastaŭ padavać prykmiety žyćcia. Vakoł adrazu ž sabrałasia šmat ludziej, niechta ź ich vyklikaŭ chutkuju dapamohu i milicyju.

— Abvinavačanaja zaviedama viedała pra svajo chvaravitaje i stomlenaje stanovišča, što ŭjaŭlała niebiaśpieku dla dalejšaha ruchu i navakolnych. Jana nie admoviłasia ad kiravańnia aŭtamabilem, choć mahła i pavinna była heta zrabić, a praciahnuła jechać za rulom, — raspaviadaje načalnik adździeła pa rasśledavańni złačynstvaŭ suprać biaśpieki ruchu i ekspłuatacyi transpartu śledčaha ŭpraŭleńnia USK pa Minsku Dźmitryj Niačaj. — Nabližajučysia da nierehulujemaha piešachodnaha pierachodu, fihurantka adciahnułasia na mabilny telefon i zhubiła kantrol nad darožnaj abstanoŭkaj, u suviazi z čym nie dała pieravahu piešachodam, ździejśniŭšy najezd na vaśmihadovaha chłopčyka.

Prybyŭšyja na miesca zdareńnia miedyki kanstatavali śmierć druhakłaśnika. Vyśvietliłasia, što ŭ toj viečar jon razam z maci viartaŭsia z zaniatkaŭ pa anhlijskaj movie. Kali jany pierachodzili darohu pa nierehulujemym piešachodnym pierachodzie, dzicia išło krychu napieradzie.

Znachodziačysia pasiarod prajeznaj častki, žančyna źviarnuła ŭvahu na pikap. Pakolki aŭtamabil ruchaŭsia davoli pavolna, jana padumała, što vadziciel ich bačyć i spynicca.

U nastupny momant minčanka zrazumieła: Ford, prajechaŭšy štučnuju niaroŭnaść, nie tarmozić, i zakryčała synu: «Stoj!» Toj, zaŭvažyŭšy mašynu, jakaja ŭžo vyjazdžała na «ziebru», spałochaŭsia i pabieh da procilehłaha kraju darohi.

Inšaja haradžanka, što prachodziła mima, zrazumieła, što vadziciel nie źbirajecca tarmazić, taksama hučna zakryčała. Adnak heta nie dapamahło: pikap najechaŭ piaredniaj levaj častkaj na chłopčyka. Školnika zaciahnuła pad koła, jakoje jaho pierajechała. Kali Ford usio ž spyniŭsia, druhakłaśnik znachodziŭsia pad kuzavam aŭtamabila — adtul jaho vyciahnuła maci.

Paźniej baćki raskazvali śledčamu, što syn byŭ vielmi dapytlivym, dobra vučyŭsia, zachaplaŭsia anhlijskaj movaj i płavańniem. Ź im i doma, i ŭ škole pastajanna razmaŭlali pra nieabchodnaść vykanańnia Praviłaŭ darožnaha ruchu.

Viadoma, što Ford 2019 hoda vypusku nie byŭ zastrachavany, a taksama nie mieŭ dazvołu na dopusk da ŭdziełu ŭ darožnym ruchu.

U abvinavačanaj na ŭtrymańni znachodziacca małaletnija dačka i syn. Jaje staž — z 2014 hoda.

Sud asudziŭ jaje na dva hady i šeść miesiacaŭ, jakija abvinavačanaja praviadzie ŭ vypraŭlenčaj kałonii va ŭmovach pasialeńnia, z pazbaŭleńniem prava zajmacca dziejnaściu, źviazanaj z kiravańniem transpartnymi srodkami, na 5 hadoŭ. Akramia taho, jana pavinna vypłacić baćkam zahinułaha chłopčyka, jakija pryznanyja paciarpiełymi pa hetaj kryminalnaj spravie, materyjalnuju kampiensacyju maralnaj škody.

• 0
• 0
• 0
• 3
• 0
• 1
• 2
• 0