«Mielnikava pazyčała hrošy aktyvistam u Varšavie i nie prasiła viarnuć»
Źnikłaja śpikierka Kaardynacyjnaj rady Anžalika Mielnikava nidzie nie pracavała ŭ Polščy, ale viała davoli zamožny ład žycca, piša polskaje vydańnie «Rzeczpospolita».
Anžalika Mielnikava, choć i nie pracavała ŭ Polščy i nie atrymlivała zarobku (navat jak kiraŭnik fondu Belarus Liberty Foundation), u kaleh stvarała ŭražańnie, što jana — zamožny čałaviek, piša vydańnie.
Jak śpikierka Kaardynacyjnaj rady jana navat stvaryła ŭłasny pryz u 10 tysiač jeŭra dla ludziej, jakija majuć novyja idei i chočuć realizavać roznyja prajekty.
Jana admoviłasia navat ad zarobku, tamu što ŭ arhanizacyi kryzisnaja situacyja i niama srodkaŭ, raspavioŭ vydańniu namieśnik staršyni Abjadnanaha pierachodnaha kabinietu Pavał Łatuška.
Pavodle jaho słoŭ, Mielnikava navat pazyčała hrošy niekatorym biełaruskim apazicyjanieram u Varšavie i «nie patrabavała viartańnia».
— Paśla taho, jak amierykancy spynili finansavuju padtrymku, jana ŭ studzieni za svaje hrošy prafinansavała pasiadžeńnie Kaardynacyjnaj rady, pryśviečanaje złačynstvam režymu Łukašenki, zmahałasia za pryznańnie Kaardynacyjnaj rady inšymi krainami i, vystupajučy ŭ Parłamienckaj asamblei Rady Jeŭropy, patrabavała nie pryznavać Łukašenku prezidentam i pryciahnuć jaho da kryminalnaj adkaznaści ŭ adpaviednaści ź mižnarodnym pravam, — kaža Łatuška.
Jon śćviardžaje, što dziejnaść žančyny «nie vyklikała nijakich padazreńniaŭ».
Adkul jana ŭziała hrošy ŭ Polščy? Mielnikava nibyta tłumačyła svaim siabram, što heta tamu, što jaje muž — prahramist, pracavaŭ u Polščy, dobra zarablaŭ. Miž tym, jak raspaviadała Mielnikava, z mužam jana była ŭ razvodzie.
Pra źniknieńnie śpikierki Kaardynacyjnaj rady Anžaliki Mielnikavaj jaje kalehi paviedamili ŭviečary 28 sakavika. U zajavie Paŭła Łatuški havaryłasia, što suviaź adsutničaje z 25 sakavika, adnak havorka idzie pra anłajn-kamunikacyju. Nasamreč Mielnikavu ŭžyvuju nie bačyli ŭžo daŭnym-daŭno. Paźniej stała viadoma, što Anžalika Mielnikava pakinuła terytoryju Jeŭrasajuza 26 lutaha, a jaje były muž źjechaŭ z Polščy ŭ Biełaruś 3 sakavika.
7 krasavika žurnalistam «Lusterka» ŭdałosia parazmaŭlać z byłym mužam Anžaliki Mielnikavaj, jaki paćvierdziŭ, što znachodzicca ŭ Biełarusi, a dzieci — pry im. Baćki Mielnikavaj u razmovie z žurnalistam «Jeŭraradyjo» taksama paćvierdzili, što dzieci znachodziacca ŭ Biełarusi, a pra miescaznachodžańnie samoj Anžaliki jany sami ničoha nie viedajuć i tryvožacca.
8 krasavika vice-śpikierka Kaardynacyjnaj rady Stanisłava Hlińnik, jakaja ciapier vykonvaje abaviazki śpikierki, paviedamiła, što 13 sakavika z akaŭnta Anžaliki Mielnikavaj byli spampavanyja fajły, da jakich jana mieła dostup u ramkach pracy Kaardynacyjnaj rady. Siarod ich — stratehičny płan, biudžet, unutranyja dakłady i inšyja apieracyjnyja materyjały pačynajučy ź lipienia 2024 hoda.
10 krasavika telekanału «Biełsat» stała viadoma, što z rachunka fondu Białoruś Liberty, zasnavanaha Anžalikaj Mielnikavaj, źniali hrošy. Zrabiła heta jana sama ci chto inšy, pakul nieviadoma.
14 krasavika stała viadoma, što rasśledavańnie źniknieńnia Anžaliki Mielnikavaj u Polščy pieraviali na bolš vysoki ŭzrovień — zamiest Varšaŭskaj akruhovaj prakuratury hetym budzie zajmacca Nacyjanalnaja prakuratura. Na dumku śledčych, spravu pavinny rasśledavać prakurory, jakija zajmajucca najbolš važnymi spravami, u tym liku pytańniami špijanažu.
Mielnikava rychtavała svajo źniknieńnie i manipulavała atačeńniem. Pakul niajasna, ci dziejničała jana pa kamandzie ź Minska
Lavončyk: Mielnikava vylecieła ŭ Łondan i, nie zatrymlivajučysia, vylecieła z Łondana — heta 100-pracentna
Eks-muž Mielnikavaj: Pra źniknieńnie Anžaliki nikudy nie źviartaŭsia, nie baču sensu
Mielnikava prasiła, kab jaje apošniaje intervju vyjšła na niekalki dzion raniej, čym płanavałasia
Kamientary
Situacyja tam niaprostaja, jak raniej pisali niezaležnyja ŚMI: https://d2accbiqacj5y8.cloudfront.net/364407