Premjer Litvy: Sankcyi suprać Rasii i Biełarusi pavinny być chacia b rehijanalnymi, nacyjanalnyja biez tołku
Apošnim časam u Litvie na vysokim uzroŭni stali havaryć, što kali Jeŭrasajuz nie praciahnie siektaralnyja sankcyi suprać Rasii i Biełarusi, to Litva mahła b uvieści suprać ich svaje nacyjanalnyja abmiežavańni. Premjer-ministr krainy Hintaŭtas Pałuckas, adnak, zajaviŭ, što takoje rašeńnie pavinna być pryniata na rehijanalnym uzroŭni, inakš jano nie daść nijakaha realnaha efiektu, piša Delfi.lt.
«Kali hetyja [jeŭrapiejskija] sankcyi nie buduć praciahnutyja, budzie składana damahčysia taho ž efiektu z dapamohaj nacyjanalnych siektaralnych sankcyj. Nam treba padrychtavacca, nam treba praličyć, nam treba ŭzvažyć. Kali takoj damoŭlenaści nie budzie — heta budzie vielmi niadobra», — zajaviŭ litoŭski premjer 14 krasavika.
«Nacyjanalnyja sankcyi nie mohuć być pryroŭnienyja i nie mohuć kampiensavać jeŭrapiejskija sankcyi. Kali bolš nie budzie jeŭrapiejskich sankcyj, jany mohuć być nacyjanalnymi, ale jany ŭsio adno pavinny być pryniatyja chacia b na rehijanalnym uzroŭni.
Heta značyć, što łatyšy, estoncy, palaki, finy taksama pavinny prymać takija rašeńni. Kali jany nie chočuć ci nie mohuć prymać takija rašeńni, to Litva, pryniaŭšy takija rašeńni asobna, nie dasiahnie nijakich metaŭ, a škoda budzie adčuvalnaj», — padkreśliŭ jon.
Sa svajho boku, prezident Litvy Hitanas Naŭsieda vystupaje za nacyjanalnyja sankcyi.
«Litva była b hatovaja razhledzieć nacyjanalnyja sankcyi. Chaču adznačyć, što prymianieńnie sankcyj asobnymi dziaržavami, na žal, akazvaje na ahresara značna mienšaje ŭździejańnie, čym sankcyjny pakiet z boku ŭsioj supolnaści. […] Mahčyma, my znajšli b niamała adnadumcaŭ. Adnak ja ŭsio ž vystupaju za toje, kab sankcyi ES nie prosta praciahvali, ale my pavinny havaryć i dziejničać, płanujučy siamnaccaty pakiet sankcyj, jaki ciapier razhladajecca», — zajaviŭ Naŭsieda 11 krasavika.
Termin dziejańnia dziejnych ciapier sankcyj ES suprać Rasii zakančvajecca ŭ lipieni.
Na hetym tydni prapanova ab praciahvańni nacyjanalnych sankcyj u dačynieńni da hramadzian Rasii i Biełarusi prajšła čarhovaje hałasavańnie ŭ Siejmie. Zhodna ź dziejnym zakonam ab nacyjanalnych sankcyjach, hetyja abmiežavalnyja miery dziejničajuć da 2 maja 2025 hoda. Prapanoŭvałasia praciahnuć hety termin jašče na hod.
Kamientary
Čalaviekaznaūcy takija znajšlisia, davajcie, zapatrabujcie ū svaim 17-m pakiecie sankcyjaū suprac` hramadzianaū Bielarusi abaviazkovyja našyūku na adziežy, tak vam budzie biaspiečniej...