Jeści ŭčarašniaje možna ci škodna? Bulba, rys i makarona ŭ chaładzilniku

Situacyja znajomaja kožnamu: paśla viačery zastałasia makarona, i zamiest taho kab vykinuć, my stavim jaje ŭ chaładzilnik, kab dajeści na nastupny dzień. Z vyhladu jana moža być całkam jadomaj navat praź niekalki dzion. Ale heta — zmanlivaje adčuvańnie. Nasamreč u varanych kruchmalistych praduktaŭ davoli karotki termin zachoŭvańnia. Pra heta piša Fitbook.de

Jak adznačajuć śpiecyjalisty, varanyja makarona, rys i bulba – idealnaje asiarodździe dla bakteryj, asabliva dla Bacillus cereus. Hetaja bakteryja ŭstojlivaja da ciapła, jaje spory nie źniščajucca navat pry paŭtornym razahrevie i mohuć vypracoŭvać taksiny, niebiaśpiečnyja dla zdaroŭja. Mienavita tamu važna nie tolki pravilna zachoŭvać takija pradukty, ale i svoječasova ich utylizavać.

Pa danych śpiecyjalistaŭ i takich arhanizacyj, jak Ministerstva sielskaj haspadarki ZŠA, termin zachoŭvańnia hetych praduktaŭ u chaładzilniku nievialiki:

• Makarona: da 3-4 dzion.

• Bulba (u tym liku advarnaja i smažanaja): maksimum 3 dni.

• Rys: tolki 2 dni.

Pierad tym jak schavać bulbu ŭ chaładzilnik, pažadana prybrać lišniuju vadu, naprykład, pramaknuŭšy jaje survetkaj. Heta źmianšaje vilhotnaść i zapavolvaje rost bakteryj.

Nie mienš važna i kali vy źmiaščajecie pradukty ŭ chaładzilnik. Zrabić heta treba adrazu paśla astyvańnia, ale nie paźniej čym praz 2 hadziny paśla pryhatavańnia. Pryčym zachoŭvać ich lepš u ščylna začynienych kantejnierach, kab abmiežavać dostup vilhaci i pavietra — heta źnižaje ryzyku razmnažeńnia bakteryj.

I nie zabyvajcie rehularna čyścić chaładzilnik — chacia b raz u miesiac. Dla hetaha vydatna padydzie prosty rastvor vady z vocatam ci cytrynavym sokam.

Pry paŭtornym nahrevie prytrymlivajciesia prostaha praviła: da 70°C i nie mienš za dźvie chviliny. Heta dapamoža źniščyć bolšaść škodnych mikraarhanizmaŭ, chacia i nie harantuje poŭnaj biaśpieki ŭ vypadku z Bacillus cereus.

Navat kali termin zachoŭvańnia jašče nie skončyŭsia, važna daviarać svaim orhanam pačućciaŭ. Prykmietami, što pradukt sapsavany, źjaŭlajucca: ślizistaja tekstura, dziŭny pach, niezvyčajny smak.

U hetym vypadku lepš nie ryzykavać — vykinuć biaśpiečniej, čym lačycca ad charčovaha atručvańnia. Bo sapsavanyja pradukty mohuć vyklikać surjoznyja prablemy: ad dyjarei i rvoty da paražeńnia piečani i nyrak z-za nazapašvańnia mikataksinaŭ pry rehularnym spažyvańni.

Cikava, što suchuju makaronu sa skončanym terminam prydatnaści možna jeści navat praz 10 hadoŭ! Daśledavańnie Niamieckaha centra charčavańnia pakazała, što takija pradukty zastajucca biaśpiečnymi, kali zachoŭvalisia ŭ suchim i prachałodnym miescy. Tak što kali pakunak ceły, a makarona nie źmianiła vonkavy vyhlad i pach, vykidvać jaje zusim nie abaviazkova.

• 12
• 1
• 0
• 3
• 2
• 2
• 0
• 0