U tranślacyi inaŭhuracyi Łukašenki vykarystali kampjutarnuju hrafiku. Voś u jakim momancie
Momant zajezdu aŭtamabila ŭ dvoryk Pałaca Niezaležnaści tak i nie pakazali.
U videatranślacyi siomaj inaŭhuracyi Alaksandra Łukašenki, što adbyłasia ŭ Minsku 25 sakavika, byŭ vykarystany frahmient z kampjutarnaj hrafikaj, zaŭvažyła «Lusterka».
Hety momant, stvorany z dapamohaj hrafiki, ustavili padčas zajezdu karteža Łukašenki na terytoryju Pałaca niezaležnaści.
Frahmient ilustruje ŭjezd u varoty. Da jaho kartež padjazdžaje da aharodžy, a paśla idzie prykładna dziesiacisiekundnaja ŭstaŭka, na jakoj hałoŭnaja mašyna jedzie ŭžo pa terytoryi kompleksu.
Taki frahmient źmiaščajecca va ŭsich viersijach videa inaŭhuracyi Łukašenki, što tranślavalisia dziaržaŭnymi ŚMI na YouTube. Navošta heta było zroblena — nie tłumačycca.
Mahčyma, havorka pra patrabavańni biaśpieki. Ale praz takuju zamienu možna dapuścić, što ŭ kartežy, jaki jechaŭ pa vulicach, sam Łukašenka nie znachodziŭsia, a vyjšaŭ ź inšaj mašyny. Ci ž zadumany prylot kamiery nad varotami akazaŭsia technična niemahčymym.
Darečy, samoha momantu, kali Łukašenka vychodzić z aŭtamabila, u tranślacyi niama — zamiest hetaha pakazvajuć jaho štandar, što łunaje na fłahštoku. Potym palityk užo idzie pa čyrvonaj dyvanovaj darožcy, a mašyna tym časam adjazdžaje. Tut možna mierkavać, što jamu było ciažka pakidać aŭto.
Dapoŭniena: Paśla publikacyi hetych razvahaŭ rasijska-biełaruski prapahandyst Kanstancin Prydybajła apublikavaŭ videa, na jakim usio ž vidać, jak Łukašenka vychodzić z mašyny.
Ciapier čytajuć
Biełaruś užo nie tolki pra palitviaźniaŭ. Z čym Śviatłana Cichanoŭskaja pajechała na adzin z hałoŭnych forumaŭ pa biaśpiecy ŭ ZŠA i što tam rabiŭ Siarhiej Cichanoŭski2121
Kamientary