Džej Dzi Vens vyrašyŭ dałučycca da žonki padčas vizitu ŭ Hrenłandyju. Na vostravie vizit nazvali pravakacyjaj

Prezident Donald Tramp nieadnarazova zajaŭlaŭ pra žadańnie dałučyć vostraŭ da ZŠA, i miascovyja čynoŭniki jašče da zajavy Vensa nazvali płanavanuju pajezdku Ušy, a taksama daradcy prezidenta pa nacyjanalnaj biaśpiecy Majka Uołtca, pravakacyjaj.

Bieły dom paćvierdziŭ, što siamiejnaja para Vensaŭ źbirajecca naviedać Hrenłandyju, i ŭdakładniŭ, što jany naviedajuć amierykanskuju vajenna-kaśmičnuju bazu Pitufik na poŭnačy vostrava.

U videa, raźmieščanym u sietcy X, Džej Dzi Vens žartaŭliva rastłumačyŭ, što budučaja pajezdka jahonaj žonki ŭ Hrenłandyju vyklikała vialiki ažyjataž, i jon nie choča dapuścić, kab usio zadavalnieńnie ad padarožža dastałasia tolki joj.

Vice-prezident adznačyŭ, što vizit na bazu Pitufik daść jamu mahčymaść pravieryć sistemu biaśpieki vostrava. «Šmat krain pahražajuć Hrenłandyi, imknucca skarystacca jaje terytoryjaj i vodnymi šlachami, kab pahražać ZŠA, Kanadzie i, viadoma, samim hrenłandcam», — zajaviŭ Džej Dzi Vens.

Jon dadaŭ, što administracyja Trampa imkniecca ŭzmacnić biaśpieku naroda Hrenłandyi, i što ZŠA i Danija nibyta zanadta doŭha nie nadavali hetamu pytańniu naležnaj uvahi.

Amierykanskaja presa i sami čynoŭniki na minułym tydni paviedamili, što ŭ bližejšyja dni ŭ Hrenłandyju pavinny byli prybyć dźvie amierykanskija delehacyi: adnu mieła ŭznačalić žonka vice-prezidenta Uša Vens, u skład druhoj uvachodziać daradca prezidenta pa nacyjanalnaj biaśpiecy Majk Uołtc i ministr enierhietyki Krys Rajt.

Pavodle źviestak The Washington Post, Uša Vens płanavała znachodzicca ŭ Hrenłandyi z čaćviarha pa subotu, z 27 da 29 sakavika, naviedać miascovyja słavutaści i pahladzieć Avannaata Qimussersu — tradycyjnuju honku na sabačych zaprežkach. Pavodle ŚMI, vizit Uołca pačniecca jašče da pryjezdu Ušy Vens. The New York Times piša, što daradca Trampa źbirajecca padarožničać pa Hrenłandyi razam ź ministram enierhietyki Krysam Rajtom.

Infarmacyju pra ich płany paćvierdziła krynica CBS News, amierykanskaha partniora BBC.

Akramia taho, Uołc i Rajt taksama źbiralisia naviedać vajenna-kaśmičnuju bazu ZŠA Pitufik na poŭnačy vostrava.

Ciapier, zhodna z zajavaj Biełaha doma, bazu naviedajuć razam ź imi i Vensy. Zastajučysia na pasadzie premjer-ministr Hrenłandyi Mute Ehiede jašče da zajavy Džeja Dzi Vensa nazvaŭ pajezdku amierykanskich vysokapastaŭlenych asobaŭ pravakacyjaj.

«Što daradca pa biaśpiecy robić u Hrenłandyi? Adzinaja meta — prademanstravać nam svaju ŭładu», — skazaŭ Ehiede ŭ intervju vydańniu Sermitsiaq.

Pavodle jaho słoŭ, vizit Uołca «ŭzmocnić vieru amierykancaŭ u misiju Trampa i ŭzmocnić cisk» na vostraŭ.

Jens-Frederyk Nilsien, vierahodny budučy lidar aŭtanomii, čyja partyja «Demakraatyt» («Demakraty») pieramahła na niadaŭnich vybarach, u intervju hetamu ž vydańniu abvinavaciŭ amierykanskich čynoŭnikaŭ u niepavazie da naroda Hrenłandyi.

Niehatyŭna na pajezdku adreahavali i ŭ Danii (Hrenłandyja źjaŭlajecca jaje aŭtanomijaj). Ministr zamiežnych spraŭ karaleŭstva Łars Lokkie Rasmusen zajaviŭ, što pryjezd amierykanskich pradstaŭnikoŭ u Hrenłandyju źjaŭlajecca «prablematyčnym» i demanstruje «niepavahu».

• 1
• 4
• 1
• 3
• 0
• 0
• 3
• 0