Na BT zrabili film pra toje, jak biełarusy ledź vyžyvajuć u Jeŭropie. Kab zapisać videa, hierojaŭ žorstka padmanuli
Biełaruskaje telebačańnie prezientavała prapahandyscki film «Čužoje nieba» aŭtarstva Alaksieja Marcinionka. U stužcy na paŭtary hadziny raskazvajecca pra ciažki los biełarusaŭ u Polščy i krainach Bałtyi, dzie jany, maŭlaŭ, ledź zvodziać kancy z kancami. Praŭda, u vočy adrazu kidajecca amatarskaja zdymka — jak vyśvietliłasia, kadry hetyja byli zroblenyja padmanam, hieroi nie viedali, što kamientujuć svajo žyćcio dla biełaruskich prapahandystaŭ.
«2020 hod… Tysiačy biełarusaŭ pakinuli radzimu ŭ pošukach novaha doma, ale čužyja krainy nie pryniali ich radasna. Tolki ŭ nievialikaj kolkaści atrymałasia znajści aporu i dostup da mahčymaściaŭ za miažoj, tady jak bolšaść apynułasia na ŭskrajku žyćcia. Historyja pra mary, iluzii i surovuju realnaść — u našym filmie», — takim hučnym anonsam zavablivajuć hledača.
Bolšaja častka siužetnaj linii ŭ im budujecca na historyi nastaŭnicy sa Škłova, 37-hadovaj Julii. Jana skardzicca, što ŭ emihracyju pajechała za mužam, jaki pabajaŭsia palityčnaha pieraśledu. Žančyna ž nie chacieła nikudy źjazdžać, jaje ŭsio zadavalniała, ale pabajałasia, što muž zabiare z saboj dziaciej, tamu pajechała razam ź im. Julija pryznajecca, što heta było pamyłkaj, i šlach, i žyćcio biežanki apynulisia ciažkimi.
Padobna da taho, što jaje adzinuju zdymali ŭ Biełarusi, bo Julija pa vyniku viarnułasia na radzimu ź dziećmi. Bolšaja častka tych hierojaŭ filma, kaho zdymali za miažoj i z kim paśpieła pahutaryć «Naša Niva», śćviardžajuć, što jany stali ŭdzielnikami kino nie pa svajoj voli.
Jak ža zdymaŭsia film?
Jak raskazała adna z hieraiń videa, da jaje źviarnułasia znajomaja z prośbaj paŭdzielničać u zdymkach videa dla Ofisa Śviatłany Cichanoŭskaj — heta pavinna było być intervju dla ŭnutranaha karystańnia, kab pakazać patencyjnym donaram patreby ludziej, jakija na hetym momant apynulisia ŭ ciažkim materyjalnym stanoviščy. Zdymka adbyłasia jašče ŭ kastryčniku 2024 hoda.
«Intervju było patrebnaje, kab paśla mnie akazali finansavuju dapamohu. Dla videa śpiecyjalna šukali kiejsy ludziej, jakim patrebnaja hetaja dapamoha. Paprasili być ščyraj i raskazać pra ŭsie prablemy. Ale mnie skazali, što heta budzie ananimna».
Nijakaj dapamohi žančyna tak i nie atrymała, i ciapier razumieje, čamu.
Toje, što jany źnialisia mienavita dla filma BT, stała šokam i dla inšych hierojaŭ stužki. Jany daviedalisia pra premjeru ad žurnalistaŭ «Našaj Nivy»:
«Dla BT my b nie zdymalisia i pad dułam pistaleta», «My nie padazravali, što heta budzie dla prapahandy».
Ciapier udzielniki filma sprabujuć vyśvietlić, na jakim etapie adbyŭsia źliŭ materyjałaŭ. Apieratarka, jakaja zapisvała hierojaŭ, paabiacała prakamientavać situacyju «Našaj Nivie» paśla poŭnaha ŭnutranaha raźbiralnictva:
«My imkniemsia abmierkavać usio z kožnym čałaviekam, źviazanym z hetaj situacyjaj. My šakavanyja tym, što adbyłosia, nijak takoha nie čakali. Nam nieabchodny čas».
Pa viersii adnaho z hierojaŭ videa, uciečka mahła adbycca na etapie zamovy. Ludziam kazali, što videa zakazaŭ nibyta pradstaŭnik Ofisa — zahadkavy režysior ci redaktar, — ale, vidać, jaho asoba nie była nijakim čynam paćvierdžanaja.
«Naša Niva» dadatkova źviarnułasia pa kamientar u Ofis Śviatłany Cichanoŭskaj, kab daviedacca, ci zdymali jany niešta padobnaje sa svajho boku.
Ciapier čytajuć
«Franak, adnosiny pamiž ludźmi mohuć budavacca nie tolki na manipulacyjach». Prakop‘jeŭ daŭ vodpaviedź Biaspałavu. I Viačorku29
Kamientary
Kali na Zachadzie i ŭ pieršuju čarhu ŭ Eŭropie šanujuć Radyjo Svaboda i tyja pryncypy na jakich jano stvarałasia, to naležyć rabić palapšeńnie vizavaha režymu dla biełaruskaha narodu. Nie dla čynoŭnikaŭ i łukašystaŭ, nie dla karnikaŭ i prychvaśniaŭ režymu, a dla narodu. Čym bolš ludziej zmoža vyjechać ź Biełarusi choć na vychodnyja, tym bolš ludziej ŭbačać praŭdu i stanie prychilnikami pieramien da lepšaha.
Palapšeńnie vizavaha režymu i spraščeńnie pierachodu miažy na karyść narodam Eŭropy i volnaj Biełarusi.