«Niedzie, moža, pastaviŭ łajk nie toj». Na BT pakazali čarhovaha biełarusa, jaki pryjechaŭ na radzimu praz kamisiju pa viartańni
Mužčynu, jaki napisaŭ u kamisiju pad kiraŭnictvam hienprakurora Andreja Švieda zajaŭku na viartańnie i atrymaŭ na jaho dazvoł, zavuć Kirył Danilkievič. Raniej jon u publičnaj śfiery nie źjaŭlaŭsia, viadoma tolki, što mužčyna sa Słonima.
Kirył Danilkievič raskazvaje, što vyjechaŭ u Polšču jašče da 2020 hoda i žyvie tam užo 5 hadoŭ, adpaviedna ŭ pratestach nie ŭdzielničaŭ. Ale ŭ hałavie, maŭlaŭ, «ad pačatku była nie zusim pravilnaja pazicyja», tamu moh niedzie «pastavić łajk nie toj».
Ciapier ža, choć za miažoj u jaho niaviesta ź dziciom, jon zasumavaŭ pa radzimie, dzie zastałasia mama i dzie za čas jahonaj adsutnaści pamierli dźvie babuli, na pachavańnie jakich mužčyna nie pryjechaŭ. Kali navažyŭsia, napisaŭ u HUBAZiK, tyja pieranakiravali ŭ kamisiju pa viartańni, a ŭ joj Danilkieviču skazali, što nijakich spraŭ na jaho nie zaviedziena — možna viartacca.
Za hetuju łasku jon ciapier raskazaŭ prapahandystcy Ksienii Lebiedzievaj, jak za miažoj u jaho mianialisia pohlady. Pieršym šturškom dla hetaha staŭ, maŭlaŭ, niejki zapisany siłavikami ŭ 2021 hodzie rolik, u jakim u fihuravali Śviatłana Cichanoŭskaja «sa svajoj šušaraj», jakija nibyta abmiarkoŭvali, što treba brać siłaj niejki pałac u Homieli. Paśla ž, kali pačałasia vajna va Ukrainie, jon spačatku taksama byŭ nie na baku Pucina i Łukašenki, ale paśla ŭsio ž niejkim čynam taki pryjšoŭ da dumki, što «nas chacieli pradać». Dla bolš pierakanaŭčaj ilustracyi hetaha tezisu jon paŭtaraje prapahandysckija naratyvy, što na Zachadzie «my nikomu nie patrebnyja».
Siońnia hienieralny prakuror Andrej Švied, vystupajučy na abjadnanym pasiadžeńni Pałaty pradstaŭnikoŭ i Savieta Respubliki, raskazaŭ, što «kamisija pa viartańni» za čas svajoj pracy razhledzieła 241 zvarot, u vyniku čaho ŭ Biełaruś viarnulisia 20 čałaviek z bolš čym 30, jakija atrymali stanoŭčy adkaz.
Usim, chto viarnuŭsia na radzimu praz kamisiju, pavodle słoŭ hienprakurora, «prapanujecca raskazać praŭdu pra toje, jak im tam žyłosia za miažoj, jakoje staŭleńnie realnaje da biełarusaŭ».
Kamientary