U achoŭnika Džardžesku znajšli 1,5 miljona dalaraŭ najaŭnymi pad parkietam. Jašče 7,2 miljony jon z bratam atrymaŭ z Afryki
Były bajec Zamiežnaha lehijona pracavaŭ najomnikam u Afrycy i raptam pajšoŭ u palityku. U vieraśni minułaha hoda, pierad vybarami, jon lotaŭ u Maskvu.
U sieradu ranicaj rumynskaja prakuratura praviała 47 vobšukaŭ, rasśledujučy spravu vakoł pieradvybarnaj kampanii pa padrychtoŭcy da letašnich prezidenckich vybaraŭ u krainie.
Taksama rasśledavańnie viadziecca pa spravach ab stvareńni fašysckaj hrupoŭki i falsifikacyi danych ab finansavańni vybarčaj kampanii Džardžesku, piša Romania Journal.
Pad śledstvam znachodziacca 27 čałaviek. Siarod ich — były bajec Zamiežnaha lehijona i najomnik u Afrycy Haracyu Potra. Śledčyja śćviardžajuć, što jon razam ź inšymi ŭdzielnikami Zamiežnaha lehijona zasnavali fašysckuju arhanizacyju i padšturchoŭvali da hvałtu.
Haracyu Potra — 55-hadovy achoŭnik Kelina Džardžesku, byłoha prarasijskaha kandydata ŭ prezidenty Rumynii. Palityka zatrymali, a Potra ŭ krainie zaraz niama. Kažuć, što jon vyjechaŭ za miažu niekalki tydniaŭ tamu.
Haracyu Potra nazyvajuć taksama «rumynskim Pryhožynym». Z pačatku 1990-ch hadoŭ Potra byŭ u afrykanskich i arabskich krainach zamiežnym lehijanieram, ciełaachoŭnikam, načalnikam achovy, vajennym instruktaram. Zatym uznačaliŭ hrupu rumynskich najomnikaŭ nakštałt PVK «Vahnier».
U Potra doma byli i inšyja vobšuki, u tym liku pa spravie ab niavypłacie padatkaŭ. Pa źviestkach prakuratury, kampanija, jakaja kantralujecca bratam Potra, nibyta sabrała ŭ Afrycy kala 7 200 000 dalaraŭ, ale hetyja hrošy nijak nie fihuravali ŭ padatkovych dekłaracyjach.
Džardžesku pry hetym zajaŭlaŭ, što na jaho vybarčaju kampaniju syšli nulavyja vydatki. U suviazi z hetym va ŭładaŭ paŭstaŭ šerah padazreńniaŭ i jany raspačali kryminalnuju spravu.
U Potry pry vobšuku znajšli 1,5 miljony dalaraŭ, schavanych pad parkietam. Pa paviedamleńniach rumynskich ŚMI, śledčyja taksama vyjavili zbroju i bajavuju ekipiroŭku — kamizelki, kaski, zaplečniki. Prakurory kažuć, što ŭsiaho Potra zachoŭvaje bolš za 6 miljonaŭ dalaraŭ najaŭnymi.
Pieratrus prajšoŭ i ŭ partniorki Potra, jakaja, pa viersii śledstva, maje suviazi z kiraŭnictvam u Maskvie.
Na niekalkich fatahrafijach, jakija fihurujuć u rasśledavańni, partniorka achoŭnika adlustravanaja pobač z čačenskimi najmitami. Taksama, pavodle infarmacyi śledstva, Haracyu Potra byŭ zaŭvažany na Krasnaj płoščy ŭ Maskvie ŭ vieraśni minułaha hoda.
Džardžesku ŭ fejsbuku adreahavaŭ na vobšuki: «Kamunistyčna-balšavisckaja sistema praciahvaje svaje adyjoznyja złoŭžyvańni!».
Džardžesku pieramoh u pieršym tury prezidenckich vybaraŭ, nabraŭšy 22.94% hałasoŭ, jon pavinien byŭ pazmahacca za prezidencki post u druhim tury. Adnak Kanstytucyjny sud skasavaŭ vyniki pieršaha tura z-za zamiežnaha ŭmiašańnia ŭ vybarčy praces. Pavodle danych śpiecsłužbaŭ, za Džardžesku ŭ tyktoku ahitavali dziasiatki tysiač botaŭ, jakich źviazvajuć z Kramlom.
Ciapier čytajuć
Nad šerym kardynałam Nacbanka zhuścilisia chmary? Zatrymali jaho siabra, byłoha vykanaŭčaha dyrektara Banka raźvićcia5
Kamientary