«Paprasiŭ pažyć jašče miesiac, a jany…» Byłoha palitviaźnia Jermašuka vysialajuć z šełtara «Bajchełpa»
Mužčyna kaža, što nie moža znajści kvateru i pracu, a pradstaŭniki šełtara — što Jermašuka daŭno papiaredzili pra datu vyjezdu. «Naša Niva» vysłuchała abodva baki.
«Kali my tam siadzieli, my dumali, što tut usio pradumana, idzie padtrymka, a atrymałasia naadvarot»
28 lutaha budzie try miesiacy, jak Vadzim žyvie ŭ varšaŭskim šełtary ad fondu «Bajchełp». I ŭ hety dzień jon musić vyjechać na novaje žyllo, ale ž źniać jaho, jak kaža Jermašuk, akazałasia nie tak prosta.
Były palitviazień raskazvaje, što haspadary kvater staviacca da jaho naściarožana i admaŭlajuć u zdymie žylla: pakul što mužčyna nie maje ni aficyjnaj pracy, ni pašparta, bo jon u pracesie lehalizacyi.
Ale i ŭ šełtary Vadzimu nie chočuć iści nasustrač. Pryčyna takoha staŭleńnia, ličyć były palitviazień, u tym, što jon adkryta vykazvaje svaje patreby:
«Ja prosta patrabavaŭ i prasiŭ toje, što, ja liču, jany abaviazanyja zrabić. Miarkuju, usia dapamoha musić być dla palitviaźniaŭ, tych, chto adsiedzieŭ. Mianie try hady nie było [na voli], ja vymušana emihravaŭ. Kali my tam siadzieli, my dumali, što tut usio pradumana, idzie padtrymka, a atrymałasia naadvarot.
Tak razumieju, fondam nie padabajecca, jak ja ź imi kamunikavaŭ. Mnie ŭvieś čas rabili zaŭvahi, maŭlaŭ, havarycie na «vy». Ja ž nie viedaju, z kim tam razmaŭlaju, mahu napisać «pryviet». Mnie razoŭ 5-6 kazali, što chutka skončać sa mnoj kamunikacyju i nie buduć mnie dapamahać».
Jermašuk tłumačyć, što paśla vyzvaleńnia byŭ u ciažkim psichičnym stanie, ciapier jon pracuje ź psichołaham i pje antydepresanty. Spačatku jon kamunikavaŭ z fondami praz pasiarednicu, ale tyja nastajali, kab kamunikacyja išła naŭprost:
«Ja byŭ psichałahična niaŭstojlivy, moh pasłać na try litary. Ciapier ja mahu sabrać dumki i havaryć, a raniej ja prosta psichavaŭ. Adnosiny byli vielmi składanyja, mianie nie čuli. Šmat razoŭ pisaŭ im, što mnie ciapier składana kamunikavać, nie razumieŭ roznych rečaŭ».
Vadzim kaža, što ciapier jon žyvie ŭ pakoi, jaki da jaho pierajezdu tudy stajaŭ pustym paŭtara miesiacy, to-bok svabodnyja miescy ŭ šełtary jość. Dy i kali b ich nie było, mužčyna zhodny spać u kalidory ci na kanapie ŭ chole šełtara. Jon raskazvaje pra vypadak, kali žychar šełtara nie paśpieŭ svoječasova źniać kvateru i jamu dazvolili žyć tam na miesiac daŭžej. I heta nie adziny taki prykład, pavodle jaho słoŭ.
Błohier adznačaje, što fondy dapamahli jamu z peŭnymi vydatkami na reabilitacyju, ale pry hetym apisvaje ŭzajemadziejańnie ź imi jak «adzin śpichvaje na druhoha».
Užo ŭ Polščy vyjaviłasia, što Vadzimu treba rabić apieracyju z pachvinnaj hryžaj, i praz heta niedzie paŭhoda jon nie zmoža zajmacca ciažkaj fizičnaj pracaj.
Błohier adznačaje, što mnohija z byłych palitviaźniaŭ adčuvajuć: u zamiežžy jany nikomu nie patrebnyja:
«Mnie kryŭdna, što ja addaŭ usio: lubimuju spravu, lubimy błoh, kvateru. Ja straciŭ usio. Ciapier paprasiŭ pažyć adzin miesiac, a jany… Ja ž nie nachabničaju i nie prašu žyć hod, praŭda? Liču, heta nieprymalna.
Kali my prosim dapamohi, heta nie soramna, chacia ludzi pra heta zabyvajuć. Prasić — heta nie soramna, maŭčać — voś heta soramna».
Ciapier i sam Vadzim, i jaho siabry šukajuć dla jaho kvateru.
«Bajchełp»: Jermašuk musić vyjechać 28 lutaha
My paprasili Alaksieja Lavončyka, kiraŭnika fonda «Bajchełp», prakamientavać situacyju z Vadzimam Jermašukom.
Lavončyk adznačaje, što zvyčajna byłyja palitviaźni žyvuć u tym šełtary dva miesiacy, bo jość vysoki popyt na pakoi. Vadzim pražyŭ u šełtary na miesiac daŭžej, bo jamu jakraz pajšli nasustrač praź jaho situacyju. 28 lutaha Jermašuk musić vyjechać z šełtara, i pra hetuju datu, kaža Lavončyk, błohier viedaŭ jašče ŭ śniežni.
Alaksiej abviarhaje, što ŭ šełtary žyvuć daŭžej za čas, jaki nazyvaje Vadzim — maŭlaŭ, havorka zaŭždy pra 2-3 miesiacy pražyvańnia. Što da idei Vadzima žyć chacia b u kalidory, Lavončyk kaža, što heta było b parušeńniem abaviazalnictvaŭ šełtara pierad uładalnikami doma, dzie mieścicca šełtar, i heta prapisana ŭ adpaviednaj damovie ź imi.
Vadzim daŭno viedaŭ pra apieracyju, kaža Alaksiej, i moh da hetaha padrychtavacca. Lavončyk dadaje, što svaimi dziejańniami Jermašuk parušaje padpisanuju damovu ab nierazhałošvańni aśpiektaŭ lekavańnia i pražyvańnia.
«Naša Niva» — bastyjon biełaruščyny
PADTRYMAĆ
Ciapier čytajuć
«Dzieci rastuć z adčuvańniem, što być biełarusam pačesna, jak vypusknikom Harvarda». U Batumi dziejničaje biełaruskamoŭnaja škoła — voś jak heta pracuje88
Kamientary