Žychar Śmiłavič paskardziŭsia ŭ tyktoku na raźbityja vulicy i «znakamituju łužynu». Što jamu adkazali ŭłady
Žychar haradskoha pasiołka Śmiłavičy Červieńskaha rajona apublikavaŭ videa, u jakim pakazaŭ žałasny stan niekatorych vulic. Na rolik źviarnuła ŭvahu dziaržaŭnaje vydańnie.
«Tut niama i nikoli nie było tratuaraŭ, aśviatleńnia ŭ ciomny čas sutak taksama niama», — raskazaŭ aŭtar pra stan 2-ha zavułka Horkaha.
Taksama ŭ roliku možna pabačyć inšyja vulicy, na jakim raźbity asfalt, łužyny, brud. Kruhły hod kałdobiny, a paśla daždžu — sucelnaja kałatuša, raskazaŭ aŭtar pra vulicu Palavuju.
Taksama jon pakazaŭ terytoryju, dzie minułym letam prakładvali ciepłatrasu. Daroha tam adsutničaje.
Jašče mužčyna raskazaŭ pra «znakamituju łužynu», jakuju, pavodle jaho słoŭ, ułady abiacajuć pryvieści da ładu šmat hadoŭ.
Žurnalisty «Minskaj praŭdy» źviarnulisia pa kamientar da namieśnika staršyni Červieńskaha rajvykankama pa pytańniach budaŭnictva i ŽKH Rusłana Čarniaŭskaha.
Toj skazaŭ, što rabota pa ramoncie daroh viadziecca pastajanna, i tolki letaś na asfaltavańnie daroh u Śmiłavičach vydzielili kala 2 młn rubloŭ z respublikanskaha biudžetu i 235 tysiač ź miascovaha.
Jak zapeŭniŭ Čarniaŭski, vulica Palavaja ŭklučana ŭ płan na hety hod — u 2025 hodzie darohu całkam zaasfaltujuć.
Darohu, dzie prakładali ciepłatrasu, dobraŭparadkujuć paźniej praz umovy nadvorja.
Pytańnie z aśviatleńniem na vulicy Palavoj i ŭ 2-m zavułku Horkaha «znachodzicca na kantroli». Ale ničoha kankretnaha čynoŭnik nie paabiacaŭ.
Kamientary
A ci pracuje taja čaburečnaja, i ci handlujuć šparka sałam ? Niekali až dva pierasoŭnyja šapiki stajali, a ŭ ich sała na luby hust, pad samuju stol. A jašče valonki tam vyrablali hodnyja, ciapier niama, nie znajšoŭ, źvialisia majstry...