U Rahačovie try školnicy źbili 11-hadovaha chłopčyka, ściahnuli ź jaho trusy i imitavali seks

Incydent adbyŭsia ŭ adnoj sa škoł Rahačova ŭ 2023 hodzie. Try dziaŭčyny, 14—15 hadoŭ, vyrašyli paździekavacca sa školnika, jakomu było 11 hadoŭ. Jany padpilnavali jaho ŭ raździavałcy kala spartovaj zali. Spačatku na vačach inšych dziaciej stali jaho prynižać, dalej pavalili na padłohu, pačali źbivać nahami i rukami. Urešcie ściahnuli ź jaho štany z trusami i pačali imitavać pałavy akt.

Pra toje, što adbyłosia, stała viadoma administracyi, jakaja i paviedamiła ŭ milicyju. Na školnic zaviali kryminalnuju spravu pa fakcie złosnaha chulihanstva, ździejśnienaha hrupaj asobaj (č.2 art. 339 Kryminalnaha kodeksu, adkaznaść nastupaje z 14 hadoŭ).

U vyniku złačyncam prysudzili pa hodzie pazbaŭleńnia svabody z adterminoŭkaj na taki ž termin.

Heta značyć, školnicy zastalisia na svabodzie, ale buduć znachodzicca pad pilnym nahladam milicyi.

Aproč taho, asudžanyja pavinny zapłacić paciarpiełamu chłopčyku maralnuju škodu pamieram 10500 rubloŭ.

U prakuratury pryznajuć prablemu, što ŭ zakanadaŭstvie Biełarusi niama vyznačeńnia bulinhu i kankretnaj adkaznaści za ckavańnie. Tym časam daśledavańnie, jakoje pravioŭ JUNISIEF, pakazvaje, što 60,1% školnikaŭ i 82,1% vychavancaŭ internataŭ sutykalisia sa ckavańniem z boku inšych dziaciej. Za apošnija piać hadoŭ kolkaść złačynstvaŭ na seksualnaj hlebie, dzie paciarpiełymi prachodziać dzieci, uzrasła ŭ 20 razoŭ, ź ich 80% adbylisia ŭ internecie.

Bolš za 30% dziaciej sutykalisia z zapałochvańniami i ckavańniami ŭ internecie. Pry hetym bolšaść nie raskazvaje pra heta baćkam.

Što rabić, kali vy daviedalisia, što z vašaha dziciaci ździekujucca ŭ škole i ckujuć jaho?

Nie spadziavajciesia, što situacyja źmienicca sama saboj. Spačatku pasprabujcie vyrašyć prablemu ŭ ramkach navučalnaj ustanovy.

Vyśvietlicie padrabiaznaści bulinhu — chto ździajśniaje hvałt, jaki, dzie, kali, u prysutnaści kaho. Albo dzie ŭ internecie raźmieščany abraźlivyja vypady.

Źviarniciesia da kłasnaha kiraŭnika, u sacyjalna-piedahahičnuju psichałahičnuju słužbu, administracyju navučalnaj ustanovy.

Pahutarcie z kryŭdzicielem i jaho baćkami. Ad ich pavodzin (pryznańnie-niepryznańnie viny, žadańnia prynieści prabačeńni, pakryć naniesienuju škodu) zaležać vašyja dalejšyja dziejańni.

Hetym možna abmiežavacca, kali piedahohi i administracyja navučalnaj ustanovy razumiejuć prablemu, pravodziać pracu jak z parušalnikam, tak i z kłasam, a baćki kryŭdziciela imknucca minimizavać nastupstvy, jakija dla vašaha dziciaci nie nosiać ciažki charaktar.

Kali nastaŭniki i administracyja nie prymajuć miery, źviartajciesia va ŭpraŭleńnie adukacyi miascovaha vykankama albo da ŭčastkovaha milicyjaniera (u vypadku, kali ŭ dačynieńni da dziciaci ździejśniena administracyjnaje pravaparušeńnie).

U milicyi pavinny skłaści pratakoł i apytać udzielnikaŭ kanfliktu, potym spravu nakirujuć u kamisiju pa spravach niepaŭnaletnich. Zajava ŭ milicyju i nastupnyja pravavyja nastupstvy ŭ suviazi z hetym mohuć prycišyć zapał ahresiŭnaha padletka.

Kali ž dziciaci naniesienyja cialesnyja paškodžańni, možna źviartacca ŭ prakuraturu. Prakuror maje prava pačać administracyjny praces ci zavieści kryminalnuju spravu.

Aproč taho, možna źviartacca ŭ Nacyjanalnuju kamisiju pa pravach dziciaci. Jana kantraluje i analizuje dziejnaść roznych arhanizacyj pa pytańniach abarony pravoŭ i zakonnych intaresaŭ dziaciej.

• 0
• 0
• 0
• 12
• 7
• 14
• 17
• 0