Samy bahaty śpiecsłužbist płaniety namieryŭsia stać lidaram novaj technałahičnaj revalucyi
Zahadkavy i niepubličny šejch Tachnun bin Zaid al Nachajan, jaki ŭznačalvaje vyviedku AAE i kiruje adnym z najbujniejšych kapitałaŭ płaniety, vyrašyŭ ukłaści astranamičnuju sumu hrošaj u raźvićcio sistem štučnaha intelektu, kab stać lidaram novaj hłabalnaj technałahičnaj revalucyi. Taki krok moža stać pradvieśnikam pieraŭtvareńnia haliny ŠI ŭ sistemu tatalnaha kantrolu nasielnictva.
Šejch Tachnun bin Zaid al Nachajan, rodny brat prezidenta Abjadnanych Arabskich Emirataŭ Muchamieda bin Zaid al Nachajana — adzin z samych bahatych i ŭpłyvovych ludziej u śviecie, jaki kiruje aktyvami na sumu zvyš 1,5 tryljona dalaraŭ. Hetaja suma składajecca z častki asabistaha kapitału siamji Al Nachajan u bolš za 300 miljardaŭ dalaraŭ i aktyvaŭ adnaho z najbujniejšych suvierennych fondaŭ płaniety — Abjadnanaj inviestycyjnaj administracyi AAE (ADIA).
Źjaŭlajučysia kiraŭnikom nacyjanalnaj vyviedki AAE i staršynioj uradavaj rady pa štučnym intelekcie i pieradavych technałohijach, šejch Tachnun bin Zaid al Nachajan žadaje skarystacca ŭsim padkantrolnym jamu kapitałam, kab damahčysia biassprečnaha daminavańnia AAE ŭ suśvietnaj halinie štučnaha intelektu (ŠI), piša vydańnie Wired.
Siońnia Tachnun bin Zaid faktyčna kantraluje ŭvieś ŠI-siektar AAE, inviestujučy miljardy ŭ budaŭnictva data-centraŭ, u tym liku ŭ ZŠA i Kitai. Adnym z takich tranšaŭ u chutkim časam moža stać inviestycyja ŭ $100 miljardaŭ u raźvićcio suśvietnaha ŠI-rynka, jaki sam pa sabie ciapier kaštuje amal $750 miljardaŭ.
Heta śviedčyć ab tym, što šef vyviedki AAE hatovy na ŭsio, kab stać lidaram novaj hłabalnaj technałahičnaj revalucyi, niahledziačy na ŭsie palityčnyja vykliki i krytyku ŭ adras mietadaŭ kiravańnia emirackaha šejcha, adznačaje Wired.
Pa styli žyćcia Tachnun bin Zaid — heta sumieś tradycyjnaha arabskaha šejcha, technałahičnaha na zachodni manier miljardera, apantanaha šachmatami, viełasportam i džyŭ-džytsu, i hałoŭnaha złodzieja ź filmaŭ pra Džejmsa Bonda. Šef vyviedki AAE zaŭsiody nosić ciomnyja akulary, navat u trenažornaj zale, z-za adčuvalnaści da śviatła, viadzie niepubličny ład žyćcia i atačaje siabie achovaj ź liku čempijonaŭ UFC i źmiešanych bajavych mastactvaŭ. Pavodle adnaho ź biznesmienaŭ, jaki sustrakaŭsia z šejcham asabista, pierad pieramovami toj nastojvaje na nieabchodnaści ździejśnić ź im niekalki kruhoŭ pa jaho vialikim pryvatnym viełatreku.
Siarod šmatlikich biznes-aktyvaŭ al Nachajana asablivaje miesca zajmaje vielizarnaja karparacyja G42, jakaja zajmajecca daśledavańniami ŭ halinie štučnaha intelektu i bijatechnałohij (asabliva ŭ śfiery pošukaŭ mietadaŭ pieramohi nad śmierciu). Mienavita hetaja kampanija źjaŭlajecca fłahmanam i asnoŭnym instrumientam šejcha Tachnuna bin Zaid al Nachajana, praź jaki iduć inviestycyi ŭ suśvietnuju halinu ŠI, padkreślivaje Wired.
Ciomnym nieaficyjnym bokam karparacyi G42 źjaŭlajecca raspracoŭka najnoŭšych sistem uzłomu i sačeńnia za ludźmi dla patreb śpiecsłužbaŭ AAE i palityčnych represij u adnosinach da lubych apanientaŭ ułady arabskaj manarchii.
Pavodle mižnarodnych pravabarončych arhanizacyj, G42 i jaje kampanii-papiaredniki ź inšymi nazvami byli adkaznyja za stvareńnie prahramy DarkMatter (emiracki anałah izrailskaha špijonskaha instrumientu Pegasus i łukašenkaŭskaj sistemy videadsočvańnia Kipod) i papularnaha niekalki hadoŭ tamu miesiendžara ToTok (ToTok dazvalaŭ uradu AAE špijonić za miljonami karystalnikaŭ u roznych krainach śvietu. Google i Apple paźniej vydalili jaho z svaich kram paśla abvinavačvańniaŭ u špijonskaj dziejnaści).
Da 2024 hoda karparacyja G42 i inšyja technałahičnyja kampanii Tachnuna bin Zaid al Nachajana aktyŭna supracoŭničali z uradam i biznes-hihantami Kitaja, adnak paśla G42 abviaściła ab razryvie suviaziaŭ z Kitajem i vydaleńni sa svaich siervieraŭ kitajskaha abstalavańnia. Kitajskija śpiecyjalisty pačali cicha pakidać technałahičny siektar AAE, śćviardžajuć miascovyja miedyja, blizkija da ŭłady manarchii.
U hety ž čas pačałasia intensiŭnaja dypłamatyčnaja kampanija pa naładžvańni adnosin pamiž ZŠA i AAE, padčas jakoj Tachnun bin Zaid naviedaŭ miljardera Iłana Maska ŭ Techasie, pravioŭ treniroŭku pa džyŭ-džytsu z kiraŭnikom Meta Markam Cukierbierham, a taksama sustrakaŭsia z zasnavalnikam Microsoft Biłam Hiejtsam i ŭładalnikam Amazon Džefam Biezasam. Adnak najbolš važnyja sustrečy ŭ 2024 hodzie adbylisia ŭ Biełym domie z takimi klučavymi asobami, jak daradca pa nacyjanalnaj biaśpiecy Džejk Salivan i sam prezident ZŠA Džo Bajden, piša Wired.
Niahledziačy na namahańni šejcha al Nachajama zavajavać davier amierykanskich technałahičnych hihantaŭ i palitykaŭ, mnohija analityki ŭ śfiery nacyjanalnaj biaśpieki ZŠA zastavalisia skieptyčnymi adnosna ščyraści namieraŭ šejcha.
Asnoŭnyja aściarohi zaklučalisia ŭ tym, što Tachnun bin Zaid moh zymitavać razryŭ biznes-suviazaŭ z Kitajem i ŭsio jašče zastajecca nadziejnym partnioram Piekina, a inviestycyi AAE ŭ ŠI-siektar SŠA mohuć spryjać masavaj pieradačy amierykanskich technałohij u Kitaj u abychod sankcyj.
«Emiraty — majstry ŭ bałansavańni intaresaŭ. Hałoŭnaje pytańnie: ci nie hulajuć jany na dva baki?» — zajaŭlaŭ u lipieni 2024 hoda staršynia Kamiteta pa zamiežnych spravach Pałaty pradstaŭnikoŭ ZŠA Majkł MakKoł.
Druhim faktaram ryzyki źjaŭlajucca jak reputacyja AAE ŭ jakaści aŭtarytarnaj dziaržavy z surjoznymi parušeńniami pravoŭ čałavieka, tak i tajemnaja dziejnaść karparacyi G42 i inšych aktyvaŭ šejcha al Nachajama.
«Niama sumnievaŭ u tym, što AAE chacieli b upłyvać na raźvićcio ŠI, kab vykarystoŭvać jaho dla pavyšeńnia dziaržaŭnaha kantrolu i parušeńnia pravoŭ hramadstva, a nie dziela ahulnačałaviečych kaštoŭnaściaŭ», — zajaŭlajuć amierykanskija ekśpierty.
Chto toj pierakładčyk, jaki niecenzurna pieradaŭ słovy Łukašenki kiraŭnictvu AAE?
«Płanavaŭ zabić svajho dziadźku-karala atručanym piarścionkam z Rasii». Stali viadomyja tajamnicy hałoŭnaha naślednika trona Saudaŭskaj Aravii
Viečny dyktatar. Jak chutka tyrany zmohuć skarystacca pieršymi lekami ad stareńnia?
Ciapier čytajuć
Źnikły Anatol Kotaŭ byŭ partnioram samaha vysokapastaŭlenaha biełaruskaha raźviedčyka, jaki pierajechaŭ u Polšču. Tut moža być kluč da razhadki jaho źniknieńnia8080
Kamientary
To bok, zaŭždy lapić apošni skaz tak, kab u im paśla prostaj movy išli słovy aŭtara.