Inaŭhuracyju Trampa pieranieśli ŭ zakrytaje pamiaškańnie z-za nadvorja
Cyrymonija prysiahi i inaŭhuracyjnaja pramova 47-ha prezidenta ZŠA ŭ paniadziełak, 20 studzienia, projduć u zakrytym pamiaškańni, jak i 40 hadoŭ tamu padčas druhoj prysiahi prezidenta Rejhana, piša «Hołas Amieryki».
Abrany prezident Donald Tramp zajaviŭ, što z-za mocnych chaładoŭ jaho inaŭhuracyja ŭ paniadziełak adbudziecca ŭ budynku Kapitolija ZŠA, a nie na adkrytym pavietry.
«Na krainu nasoŭvajecca arktyčny choład. Ja nie chaču, kab ludzi paciarpieli ci atrymali niejkija traŭmy, — zajaviŭ Tramp na svajoj płatformie Truth Social u piatnicu. — Tamu ja rasparadziŭsia, kab inaŭhuracyjnaja pramova, a taksama malitvy i inšyja vystupy byli pračytanyja ŭ ratondzie Kapitolija Złučanych Štataŭ».
Apošni raz praz mocny choład inaŭhuracyju pieranosili ŭ zakrytaje pamiaškańnie 40 hadoŭ tamu, u 1985 hodzie, padčas druhoj prysiahi prezidenta Ronalda Rejhana, kali paśla 12:00 tempieratura pavietra dasiahnuła minus 29 hradusaŭ pa Celsii.
Pavodle prahnozu nadvorja ŭ Vašynhtonie na paniadziełak, tempieratura pavietra padčas prysiahi Trampa składzie kala minus 7 hradusaŭ pa Celsii, ale hety maroz budzie adčuvacca značna macniej praź viecier.
Pavodle słoŭ Trampa, prychilniki mohuć nazirać za cyrymonijaj na ekranach u Capital One Arena, spartyŭnym kompleksie ŭ centry Vašynhtona, jaki źmiaščaje 20 000 čałaviek.
Tramp taksama paviedamiŭ, što prezidencki parad, u jakim pavinny byli ŭdzielničać maršavyja arkiestry i inšyja vykanaŭcy, jakija prachodziać pa Piensilvanskaj avieniu mima Biełaha doma, budzie pieraniesieny na stadyjon Capital One Arena. Pakul niezrazumieła, jak jon budzie arhanizavany ŭnutry spartyŭnaha kompleksu.
Tramp zajaviŭ, što dałučycca da natoŭpu na arenie paśla taho, jak budzie pryviedzieny da prysiahi.
U niadzielu, napiaredadni inaŭhuracyi, Tramp pavinien pravieści sa svaimi prychilnikami mitynh na toj ža arenie.
Chałodnaje nadvorje ŭpłyvała na chod niekatorych inaŭhuracyj i ŭ minułym.
Dziaviaty prezident ZŠA Uiljam Hienry Harysan pračytaŭ samuju doŭhuju inaŭhuracyjnuju pramovu 4 sakavika 1841 hoda ŭ syroje i chałodnaje nadvorje, biez šapki i palito. Ličycca, što heta spryjała raźvićciu ŭ jaho pnieŭmanii. Jon pamior praź miesiac paśla ŭstupleńnia na pasadu, i jaho prezidenctva stała samym karotkim u historyi ZŠA.
Padčas druhoj cyrymonii pryviadzieńnia da prysiahi prezidenta Ulisa Hranta 4 sakavika 1873 hoda niekalki kadetaŭ, jakija stajali na vulicy biez šynialoŭ, upali, a paryvisty viecier zrabiŭ pramovu Hranta nierazborlivaj navat dla tych, chto znachodziŭsia pobač ź im na płatformie. Z ranišniaj tempieraturaj u -15 hradusaŭ pa Celsii toj dzień staŭ samym chałodnym sakavickim dniom u Vašynhtonie.
«Ty ŭ nas u Biełarusi!» — «Ja mamu tvaju ja*aŭ». Hościu z Ałtaja nie spadabałasia zaŭvaha za kinuty ŭ centry Minska niedakurak6
Kamientary