Ci praŭda, što ŭ abmieńnikach nie prymajuć dalary staroha ŭzoru?
U narodzie abmiarkoŭvajuć, što dalary staroha ŭzoru nibyta nie chočuć prymać u abmieńnikach. Roliki pra takija kupiury (niekatoryja ich nazyvajuć «biełymi» dalarami) razychodziacca ŭ sacsietkach. Ale ci nasamreč tak? Razabralisia, ź jakimi dalarami mohuć być prablemy i što rabić z valutaj, jakuju nie pryniali ŭ abmieńniku.
«Naša Niva» patelefanavała ŭ niekalki bankaŭ, kab spytać pra dalary staroha ŭzoru.
U Alfa-Banku paviedamili, što nijakich abmiežavańniaŭ na abmien dalaraŭ staroha ŭzoru ŭ ich nie isnuje.
«Kankretna ŭ našym banku nijakich abmiežavańniaŭ niama, da abmienu prymajucca dalary luboha hoda vypusku», — adkazali na infalinii.
U Biełarusbanku taksama adkazali, što ŭzor kupiury nie ŭpłyvaje na mahčymaść jaje abmianiać.
«Na ciapierašni momant kupiury staroha ŭzoru źjaŭlajucca raźlikovymi srodkami na roŭnych z kupiurami novaha ŭzoru. Nijakaj infarmacyi, što banknoty staroha ŭzoru nie prymajucca ŭ našym banku, niama», — adkazali ŭ Biełarusbanku.
Ci mohuć nie prymać dalary z-za hoda ich vypusku?
Hałoŭny kryter dla pryjomu kupiur — adpaviednaść płaciežazdolnaści. Hetyja patrabavańni adnolkavyja da banknot u niezaležnaści ad ich uzoru, kažuć u banku.
Padrabiaźniej aznajomicca z adzinym pieralikam prykmiet płaciežazdolnaści banknot u zamiežnaj valucie možna na sajcie Asacyjacyi biełaruskich bankaŭ. Pryniatyja krytery dziejničajuć z 1 krasavika 2023 hoda. Uzor i hod vypusku banknoty nie moža być padstavaj dla admovy ŭ abmienie kupiury.
Što tyčycca kankretna dalaraŭ ZŠA, to pa amierykanskich zakonach usie vypuščanyja z 1914 hoda banknoty źjaŭlajucca raŭnaznačnymi.
Tamu admović u pryjomie valuty mohuć tolki praz stan kupiury. Da jakoha, pa nazirańniach čytačoŭ, apošnim časam pryhladajucca bolš pilna. Mahčyma, mnohija bajacca kupiur staroha dyzajnu mienavita praz heta: što na ich znojduć ślady ćvili ci inšyja paškodžańni.
Hrošy jość, a skarystać ich niemahčyma
Ludzi ŭsio čaściej skardziacca, što abmien valuty — heta toj jašče kvest. Čytačka «Našaj Nivy» raspaviała, što mieła try sotni dalaraŭ, jakija nie prymali ni ŭ adnym z abmieńnikaŭ praz najaŭnaść na banknotach ćvili.
«Źniešnie banknoty byli ŭ idealnym stanie, ale kasiram jany nie padabalisia, bo pry praviercy na ich stanavilisia bačnymi plamy», — tłumačyć čytačka.
Jana abyšła kala piaci roznych abmieńnikaŭ i paŭsiul atrymała admovu.
Hrošy atrymałasia pamianiać tolki ŭ Polščy.
«Pieršuju sotku pamianiali na złotyja adrazu paśla pierasiačeńnia miažy, jašče dźvieście — paźniej. Nijakich pytańniaŭ da stanu kupiur u abodvuch vypadkach nie ŭźnikła», — śćviardžaje žančyna.
Što rabić z paškodžanymi dalarami
Ci možna kudyści zdać valutu, jakuju nie prymajuć u zvyčajnych abmieńnikach?
U Biełarusbanku patłumačyli, što kali banknoty nie adpaviadać patrabavańniam, to abmianiać ich na rubli ci inšyja kupiury niemahčyma.
Kansultant dadała, što raniej isnavała pracedura «Inkasa», kali kupiury, jakija nie adpaviadali pieraliku płaciežazdolnaści banknot, nakiroŭvali na pravierku ŭ zamiežny bank za kamisijnuju ŭznaharodu. Ciapier padobnyja apieracyi nie ažyćciaŭlajuć.
U Pryjorbanku taksama adkazali, što nie prymajuć paškodžanyja kupiury navat z dadatkovaj kamisijaj.
Bankam, jaki dahetul prymaje kupiury ź niuansami, akazaŭsia Biełhazprambank.
«U nas jość funkcyja zamieny paškodžanych dalaraŭ i jeŭra na anałahičnyja banknoty ŭ toj ža valucie», — adkazali na infalinii.
Kamisija banka za takuju apieracyju składaje 12% ad sumy, ale nie mienš za 3 rubli. Pasprabavać zrabić taki abmien možna tolki ŭ adździaleńniach banka. Jak praviła, takija pytańni vyrašajucca niepasredna ŭ momant zvarotu adrazu paśla taho, jak śpiecyjalist pravieryć kupiuru.
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu7
Kamientary