Mierkavany bijohraf Iłana Maska ličyć, što miljarder ujaŭlaje niebiaśpieku dla ŭsiaho śvietu

Pa słovach viadomaha ŭ ZŠA prafiesara z Harvarda Seta Abramsana, miljarder «źjazdžaje z hłuzdu» i stanovicca pahrozaj jak dla ZŠA, tak i dla ŭsiaho śvietu, pieradaje vydańnie Daily Beast.

Abramsan kaža, što sačyŭ za pavodzinami Maska na praciahu apošnich dvuch hadoŭ. I źviartaje ŭvahu, što miljarder sam pryznavaŭ najaŭnaść psichičnych zasmučeńniaŭ, mocnaha stresu i ŭžyvańnie kietaminu. Pa słovach Abramsana, upłyŭ Iłana Maska na Donalda Trampa vyklikaje zaściarohi ŭ častki atačeńnia novaabranaha prezidenta ZŠA.

Kažučy ab pavodzinach Maska, Abramsan vykazvaje zaniepakojenaść padtrymkaj miljarderam ultrapravych partyj Jeŭropy, jakaja aktyvizavałasia paśla pieramohi Trampa na vybarach u ZŠA.

U pryvatnaści, Abramsan źviartaje ŭvahu na ciapierašnija paralelnyja miedyjnyja kampanii Maska suprać uradaŭ Hiermanii i Vialikabrytanii, u jakich miljarder adkryta simpatyzuje niamieckim ultrapravym z «Alternatyvy dla Hiermanii» i brytanskim ultrapravym z «Reform UK». Abiedźvie partyi ličacca druhimi pa ŭpłyvu ŭ svaich krainach, vystupajuć za žorstkuju antymihracyjnuju palityku i za naładžvańnie adnosinaŭ z Rasijaj.

«Asabistyja prablemy Maska nie vyklikali b stolki turboty, kali b jany nie vynosilisia na ŭsieahulnaje abmierkavańnie. Miljarder maje kałasalny ŭpłyŭ na ekanomiku i palityku ZŠA, a taksama vałodaje aktyvami ŭ bolšaści važnych dla płaniety śfier». 

«U suviazi z hetym zaklikaju administracyju prezidenta ZŠA Džo Bajdena apieratyŭna pryniać miery, kab jašče da inaŭhuracyi Donalda Trampa zaścierahčy Štaty ad dramatyčnych nastupstvaŭ praŭleńnia Maska. Uradu varta razarvać z Maskam usie kantrakty, spynić stvareńnie jahonaha Departamienta pa dasiahnieńni dziaržefiektyŭnaści (DOGE), a taksama pačać fiederalnyja rasśledavańni suprać miljardera pa spravach ab pahrozie nacbiaśpiecy», — reziumuje Set Abramsan.

Pry hetym amierykanski prafiesar, pa jahonych słovach, uśviedamlaje, što ničoha z vyšejpieraličanaha chutčej za ŭsio nie adbudziecca.

Pavialičyć

48-hadovy amierykanski prafiesar Set Abramsan maje jurydyčnuju adukacyju Harvardskaha ŭniviersiteta i źjaŭlajecca aŭtaram niekalkich biestseleraŭ (adznačanych vydańniem The New York Times), jakija byli pryśviečany rasśledavańniam karupcyi pieršaj administracyi Donalda Trampa (2016-2020) i mahčymych suviaziaŭ Trampa z uradami Rasii i Kitaja.

Ale pry hetym u publičnym dostupie niama aficyjnaj infarmacyi ab tym (akramia słovaŭ samoha Abramsana), što prafiesar źjaŭlajecca sapraŭdnym bijohrafam miljardera Iłana Maska.

• 46
• 2
• 5
• 4
• 3
• 1
• 0
• 0