17‑hadovy błohier, jaki šykavaŭ na hrošy sa zboru na chvoraje dzicia, znoŭ źbirajecca razyhryvać ajfony
Juny błohier Michaił Drahun z Hrodna skardzicca, što nie moža addać pryzy pieramožcam svaich rozyhryšaŭ praz błakiroŭku rachunkaŭ siłavikami. Ale pry hetym płanuje ŭ chutkim časie znoŭ pačać razyhryvać ajfony.
Nahadajem: papularnyja błohiery z Hrodna 17‑hadovy Michaił Drahun i 37‑hadovaja Jaŭhienija Tarasienka pravodzili rozyhryšy, kab sabrać hrošy dla vaśmihadovaha Vani Ściacenki, u jakoha ciažkaja hienietyčnaja chvaroba — mijadystrafija Dziušena. Nieabchodny chłopcu ŭkoł kaštuje $2,9 miljona. Para abiacała, što na pryzy ŭdzielnikam patracić nievialikuju sumu, a bolšuju častku hrošaj addaść na lačeńnie Vani.
Sabrać Michaił i Jaŭhienija zdoleli 1,5 miljona rubloŭ. Ale mamie chvoraha dziciaci jany pieradali tolki 200 tysiač rubloŭ. Jašče 315 tysiač rubloŭ vydatkavali na pryzy dla ŭdzielnikaŭ strymu. Astatniaje, jak śćviardžajuć siłaviki, puścili na šykoŭnaje žyćcio.
Pra zatrymańnie pary siłaviki paviedamili ŭ pačatku listapada, ale praz 72 hadziny błohieraŭ adpuścili damoŭ. U svaim telehram-kanale Michaił raskazaŭ, što jaho abvinavačvajuć pa dvuch artykułach (jakich kankretna, jon nie nazyvaje). Ale dadaŭ:
«Z adnym artykułam ja zhodny i pryznaju vinu, za hety artykuł dajuć štraf. Z druhim, što ja lam sabie prysvoiŭ — ch*j tam».
U instahramie błohier pa-fiłasofsku kaža: «Kali maju vinu dakažuć, značyć, tak i treba, značyć ja taki drenny. Na siońnia ja ŭ roli padazravanaha — navat nie abvinavačanaha».
Niechta z padpisčykaŭ spytaŭ, ci nie adčuvaje Michaił soramu. Toj adkazaŭ, što nie, bo nie ličyć, što zrabiŭ niešta zvyškryminalnaje: «Ja byŭ arhanizataram usioj hetaj temy. To-bok kamuści ajfon, kamuści mašynu, kamuści keš… Nu i Vani niešta dastavałasia».
Michaił pryznaje, što nie ŭsie pieramožcy atrymali svaje pryzy (havorka idzie pra ajfony, mašyny i hrošy) — ale śćviardžaje, što nie moža ich uručyć ludziam vyklučna praz toje, što siłaviki zabłakiravali jaho rachunki i zabrali niekatoryja rečy.
— Ajfošy (tak błohier nazyvaje ajfony — NN) byli nabytyja, ale ja prosta ich nie paśpieŭ dasłać tym rankam. Kryŭdna, što ŭ Jaŭhienii byli try ajfošy, jakija navat nie maje. Ja chaču, kab usim usio addali. Zabirajcie ŭsio, što zastałasia zvyš, ale viarnicie ŭsio pieramožcam.
Tym nie mienš błohier choča praciahvać pravodzić rozyhryšy. I ŭpeŭnieny, što ludzi stanuć udzielničać, navat kali havorka nie idzie pra niejkuju dabračynnaść. Staŭki płanuje tyja ž — pa 10 rubloŭ za numarok.
Pakrysie dziejničać Michaił užo pačaŭ — jakraz ciapier jon źbiraje sponsaraŭ dla rozyhryšu (harantuje kožnamu zabiaśpiečyć pa 15 tysiač padpisčykaŭ).
Siarod svaich padpisčykaŭ, chto adreahuje na rekłamnuju storys, błohier abiacaje razyhrać dva ajfony i ci to 5 tysiač, ci to 10 tysiač rubloŭ. Kaža, prosta adčuvaje patrebu paradavać svaju aŭdytoryju.
Chto tyja 17‑hadovy błohier i jaho 37‑hadovaja niaviesta, jakija šykoŭna žyli na miljon, skradzieny sa zboru na chvoraje dzicia?
Były muž błohierki, jakaja razam z 17‑hadovym žanichom šykavała na sabranaje dla chvoraha dziciaci, raskrytykavaŭ tych, chto hetyja hrošy joj pieravodziŭ
Błohier z Hrodna, jakoha abvinavacili ŭ machlarstvie na hrašach dla chvoraha dziciaci, u instahramie prakamientavaŭ svaju spravu
Maci chłopčyka z Hrodna, jakomu dapamahali źbirać hrošy zatrymanyja błohiery: Jany pieradali nam 257 tysiač, dla nas heta vielizarnyja hrošy
Kamientary