Chto tyja 17‑hadovy błohier i jaho 37‑hadovaja niaviesta, jakija šykoŭna žyli na miljon, skradzieny sa zboru na chvoraje dzicia?
Para, jakaja skrała amal miljon rubloŭ achviaravańniaŭ, raniej udzielničała ŭ praŭładnym realici-šoŭ «Fabryka błohieraŭ».
Zavuć błohieraŭ z Hrodna Michaił Drahun i Jaŭhienija Tarasienka.
Na staronku 17‑hadovaha Michaiła ŭ instahramie padpisana 209 tysiač čałaviek, u tym liku były sienatar Viktar Liskovič.
Jašče ŭčora hrodzienski błohier pakutavaŭ praz toje, što nie moža zdać tearetyčny ispyt u aŭtaškole, a ŭžo siońnia staŭ hierojem kryminalnaj zvodki MUS.
Zhodna z aficyjnaj infarmacyjaj, razam sa svajoj kachanaj Michaił prapanoŭvaŭ padpisčykam za 10 rubloŭ udzielničać u rozyhryšy, dzie hałoŭnymi pryzami byli smartfony ci aŭtamabil. Arhanizatary zajaŭlali, što tolki nievialikaja častka hrošaj pojdzie na pryzy, a ŭsiu astatniuju sumu addaduć na lačeńnie chłopčyka. Źbirali hrošy dla vaśmihadovaha Vani Ściacenki, u jakoha ciažkaja hienietyčnaja chvaroba — mijadystrafija Diušena. Nieabchodny chłopcu ŭkoł kaštuje 2,9 miljona dalaraŭ.
Ahułam błohierami było sabrana 1,5 miljona rubloŭ. Ale mamie chvoraha dziciaci jany pieradali tolki 200 tysiač rubloŭ, 315 tysiač vydatkavali na pryzy dla ŭdzielnikaŭ strymu. Astatniaje puścili na šykoŭnaje žyćcio.
Abrańnica Michaiła — 37‑hadovaja Jaŭhienija Tarasienka. Razam jany letaś udzielničali ŭ praŭładnym realici-šoŭ «Fabryka błohieraŭ». Na staronku Jaŭhienii ŭ instahramie padpisana 550 tysiač čałaviek.
Žančyna maje syna-druhakłaśnika. Sioleta ŭ studzieni jana raskazała pra svoj razvod — toje videa nabrała 11 miljonaŭ prahladaŭ. Darečy, były muž Jaŭhienii taksama papularny błohier sa 126 tysiačami padpisčykaŭ.
Błohierka trymaje kramy niezvyčajnych prysmakaŭ i tematyčnych padarunkaŭ u Breście i Hrodnie.
Žančyna vychodziła na vulicy Hrodna z płakatam «Daru 1000 rubloŭ svajmu padpisčyku» — i zdymała na kamieru, jak daje najaŭnymi takuju sumu radasnym padletkam.
U 2023 hodzie Jaŭhienija vykłała ŭ storys śpis svaich pasłuh, jakija jana hatova akazać na płatnaj asnovie, — ceny byli ad 150 da 1500 dalaraŭ. Za 150 dalaraŭ možna było paśniedać u jaje kampanii, za 500 błohierka abiacała asabistuju sustreču na ceły dzień. Za 1500 dalaraŭ Jaŭhienija abiacała ceły tydzień vieści akaŭnt zamoŭščyka.
Apošnim časam błohierka rehularna razyhryvała ajfony. Darečy, sioleta na Dzień maci žančyna taksama padaryła svajoj maci hety hadžet. A da hetaha Jaŭhienija pakazała novieńkaje aŭto z sałonu.
U sacyjalnych sietkach para raskazvała pra svajo kachańnie. Jany navat zrabili parnyja tatuiroŭki na rukach — simvał biaskoncaści.
Michaił pisaŭ, što ŭpieršyniu pacałavaŭ kachanuju letaś u lipieni, a roŭna praz hod zrabiŭ prapanovu ruki i serca. Pa jaho słovach, sioleta ŭ žniŭni jany aficyjna stali mužam i žonkaj (MUS ža nazyvaje ich sužycielami).
Para razam tusiła na Viva Braslav, jeździła ŭ Maskvu i Dubaj. U žniŭni Michaił skardziŭsia, što prajhraŭ Jaŭhienii tysiaču rubloŭ, bo abiacaŭ apłacić im adpačynak na Maldyvach, ale nie zmoh hetaha zrabić. Kaža, što chaciełasia maksimalna šykoŭnaha adpačynku, a varyjanty, jaki padabalisia, kaštavali ŭ dva razy bolš za jaho biudžet.
Ale ŭžo ŭ vieraśni para palacieła tudy adpačyvać razam z synam Jaŭhienii.
Kamientary