Dziŭnyja paloty ź Biełarusi zaŭvažyła vydańnie, jakoje analizuje pavietrany trafik.
Samalot Ił-62 biełaruskaj avijakampanii Rada Airlines vylataŭ z terytoryi «byłoj avijabazy ŭ Biełarusi» ŭ napramku Bienhazi, pieradaje vydańnie Reform.news.
Jon byŭ pieraabstalavany z pasažyrskaha ŭ hruzavy. Pavodle infarmacyi vydańnia Aeroin, pavietrany bort, vierahodna, pieravoziŭ zbroju ŭ Liviju/
Pavodle źviestak vydańnia, ź Biełarusi była praviedziena «sieryja» takich palotaŭ.
«Sieryja palotaŭ źviazana ź vizitam Sadama Chaftara, adnaho z synoŭ Chalify Chaftara, u Biełaruś, jaki adbyŭsia 11 kastryčnika 2024 hoda. Sadam byŭ u supravadžeńni bryhadnaha hienierała Muchamada Al-Manfura Al-Amina, kamandujučaha Avijacyjnaj akademijaj na ŭschodzie Livii», — piša vydańnie.
Paviedamlajecca, što pieršyja rejsy ź Biełarusi ŭ Liviju adbylisia ŭ listapadzie.
«Samalot z rehistracyjnym numaram EW-450TR pralacieŭ nietypovym maršrutam, abminajučy pavietranuju prastoru Turcyi i pralatajučy praz takija krainy, jak Iran, Irak i Siryja, pierš čym dasiahnuć Livii. Na nastupny dzień samalot viarnuŭsia na bazu, hetym razam pa najbolš karotkim maršrucie, jaki ŭklučaŭ pralot nad Turcyjaj», — paviedamlajecca ŭ publikacyi.
Abchod Turcyi rejsam, jaki adbyŭsia 12 listapada, vydańnie źviazvaje z tym, što «Turcyja padtrymlivaje ŭrad, raźmieščany ŭ Trypali, i, chutčej za ŭsio, nie dapuścić prachodžańnia zbroi praz svaju terytoryju».
Paźniej samalot znoŭ vylecieŭ z Oršy ŭ Bienhazi, «prytrymlivajučysia stratehii abychodu pavietranaj prastory Turcyi».
«U nastupnyja dni było praviedziena jašče bolš palotaŭ, u tym liku viartańnie ŭ Minsk, zaŭsiody z uchileńniem ad maršrutaŭ, jakija mahli pryciahnuć uvahu ŭład, jakija vystupajuć suprać pieravozki zbroi. Hetyja apieracyi padkreślivajuć składanuju dynamiku vajennaj i materyjalna-techničnaj padtrymki ŭ livijskim kanflikcie, adnačasova vykarystoŭvajučy prabieły ŭ mižnarodnych praviłach i kidajučy vyklik vysiłkam pa strymlivańni praz sankcyi», — adznačaje vydańnie.
Nahadajem, Sadam Chaftar, syn hałoŭnakamandujučaha Livijskaj nacyjanalnaj armijaj (ŁNA) Chalify Chaftara, u kastryčniku naviedaŭ Biełaruś, kab zaklučyć pahadnieńnie ab padrychtoŭcy vajennych lotčykaŭ dla Livijskaj nacyjanalnaj armii, jakoj kamanduje jahony baćka.
Kala 19 tysiač kamier płanujuć ustalavać kala minskich padjezdaŭ. Heta amal u 10 razoŭ bolš, čym ciapier3
Kamientary