Siońnia — čarhovy sud nad palitźniavolenym žurnalistam Iharam Karniejem. Niekalki miesiacaŭ jaho trymajuć u pamiaškańni kamiernaha typu
Asudžany da troch hadoŭ pazbaŭleńnia voli žurnalista Ihar Karniej adbyvaje termin u papraŭčaj kałonii № 17 u Škłovie. Amal uvieś čas jaho trymajuć u miascovaj turemnaj kamiery — tak zvanym PKT. Na 11 śniežnia nad žurnalistam pryznačany novy sud, jamu pradjaŭlajuć złosnaje niepadparadkavańnie patrabavańniam administracyi kałonii, paviedamlaje BAŽ.
Ihara Karnieja etapavali ŭ škłoŭskuju kałoniju sioleta ŭ červieni. Paśla abaviazkovaha karancinu 2 lipienia jaho raźmierkavali ŭ atrad i dazvolili patelefanavać dachaty. Ale nieŭzabavie źmiaścili na piać dzion u štrafny izalatar.
U svoj atrad jon užo nie viarnuŭsia: amal adrazu paśla ŠIZA Ihara pieraviali ŭ pamiaškańnie kamiernaha typu, što taksama źjaŭlajecca karnaj mieraj u dačynieńni da asudžanaha. Termin izalacyi ŭ pavinien byŭ skončycca ŭ žniŭni, ale pakarańnie praciahnuli jašče na paŭhoda. Žurnalist musiŭ vyjści z PKT naprykancy studzienia 2025 hoda.
Tym časam stała viadoma, što 11 śniežnia Ihara Karnieja buduć sudzić pa novaj kryminalnaj spravie — ciapier jaho vinavaciać u złosnym niepadparadkavańni patrabavańniam administracyi kałonii (pavodle častki 1 artykuła 411 Kryminalnaha kodeksa RB). Praces budzie vieści sudździa suda Škłoŭskaha rajona Alaksandr Tarakanaŭ.
Jakim patrabavańniam administracyi kałonii nie padparadkavaŭsia žurnalist, jakoha amal paŭhoda trymajuć u izalacyi ad navakolnaha śvietu, nieviadoma. Jamu zabaronienyja telefanavańni, administracyja kałonii nie pryniała i viarnuła paštovuju pasyłku ź ciopłymi rečami, adpraŭlenuju svajakami Ihara ŭ kałoniju.
Jak adznačajuć jurysty-pravaabaroncy, prykmietaj «złosnaha niepadparadkavańnia administracyi kałonii» moža stać najaŭnaść raniejšych pakarańniaŭ, u tym liku čatyry vymovy albo try spahnańni, adno ź jakich — pazbaŭleńnie čarhovaj pasyłki albo pieradačy, a taksama pazbaŭleńnie čarhovaha praciahłaha ci karotkaterminovaha spatkańnia, albo dva spahnańni, adno ź jakich — źmiaščeńnie asudžanaha ŭ ŠIZA.
Pavodle častki 1 artykuła 411 Kryminalnaha kodeksa RB, viaźnia mohuć pakarać dadatkovym terminam źniavoleńnia — da 1 hoda.
Sudy pa hetym artykule adbyvajucca najčaściej niepasredna na terytoryi kałonii, śviedkami vystupajuć jaje supracoŭniki. Za apošnija hady nie było nivodnaha vypadku, kab sud u padobnych spravach staŭ na bok «palityčnaha» asudžanaha.
Sprava Ihara Karnieja
Ahułam u niavoli Ihara Karnieja trymajuć užo amal paŭtara hoda. Jaho zatrymali 17 lipienia 2023 hoda. Spačatku aryštavali ŭ miežach administracyjnaj spravy na 10 sutak. Potym pradjavili kryminalnaje abvinavačańnie i pieraviali ŭ SIZA.
Ihara Karnieja abvinavacili va ŭdziele ŭ ekstremisckim farmavańni (pavodle č. 3 art. 361—1 Kryminalnaha kodeksa RB). Dziaržaŭnyja ŚMI pisali, što Karniej nibyta pa matyvach ideałahičnaj i palityčnaj varožaści supracoŭničaŭ z «ekstremisckaj» arhanizacyjaj «Biełaruskaja asacyjacyja žurnalistaŭ», jakuju ŭ lutym 2023 hoda KHB pryznaŭ «ekstremisckim farmavańniem».
25 sakavika 2024 hoda biełaruskaja pravaabarončaja supolnaść pryznała Ihara Karnieja palityčnym viaźniem.
Prysud Karnieju byŭ ahučany ŭ Minskim haradskim sudzie 22 sakavika 2024 hoda. Sudździa Siarhiej Kacar pryznačyŭ žurnalistu try hady źniavoleńnia ŭ kałonii ahulnaha režymu i štraf pamieram 20 tysiač rubloŭ.
Sproba asprečyć hety vyrak była biespaśpiachovaj: 7 červienia 2024 hoda kalehija Viarchoŭnaha suda pad staršynstvam sudździ Alaksandra Saŭčuka pakinuła apielacyjnuju skarhu Ihara Karnieja biez zadavalnieńnia. Praź niekalki dzion žurnalista ŭklučyli ŭ pieralik «ekstremistaŭ» na sajcie MUS i nieŭzabavie raźmierkavali ŭ škłoŭskuju kałoniju, dzie jon adrazu trapiŭ pad presinh z boku administracyi.
Ciapier čytajuć
U Kijevie za špijanaž aryštavali biełaruskuju žurnalistku Inu Kardaš. Kažuć, z 2015 hoda jana pracavała na KDB1
Kamientary