MUS raspaviało svaju viersiju, za što pasadzili piarevaratnia ŭ pahonach Zhirskaha
Pres-słužba MUS vypuściła zajavu nakont artykuła «Našaj Nivy». Siłaviki davodziać, što 27-hadovaha supracoŭnika kryminalnaha vyšuku Dokšyckaha RAUS Michaiła Zhirskaha pasadzili zusim nie za toje, što jon kiravaŭ bandaj, jakaja ŭ bałakłavach rabavała dalnabojščykaŭ.
Učora «Naša Niva» napisała, što sud Niaśvižskaha rajona pastaviŭ pramiežkavuju kropku ŭ historyi supracoŭnika kryminalnaha vyšuku Dokšyckaha RAUS Michaiła Zhirskaha. Dniami jaho asudzili da 8 hadoŭ kałonii za vymahalnictva i złoŭžyvańnie ŭładaj.
U mai 2024 hoda siłaviki adrapartavali ab zatrymańni piaci čałaviek, jakija abkradali pryparkavanyja fury. Pakul kiroŭca spaŭ u kabinie, złačyncy ŭzłomvali zamok hruzavoha adsieka, zahružali svoj mikraaŭtobus kradzienym tavaram i źjazdžali ź miesca złačynstva.
«Naša Niva» tady nazvała imia kiraŭnika bandy — supracoŭnika kryminalnaha vyšuku Dokšyckaha RAUS Michaiła Zhirskaha. Jon nie tolki davodziŭ udzielnikam bandy infarmacyju pra chod rasśledavańniaŭ kryminalnych spraŭ pa ździejśnienych epizodach i prymaŭ udzieł u płanavańni rabavańniaŭ, ale i sam udzielničaŭ u hetych nalotach.
Ale publična kiraŭnictva MUS i tady rašuča abvierhła hetu infarmacyju niezaležnych ŚMI. Ministr Ivan Kubrakoŭ tady vystupiŭ ź videazvarotam: maŭlaŭ, banda była, ale nijaki milicyjanier u jaje nie ŭvachodziŭ. Pra los Michaiła Zhirskaha jon tady pramaŭčaŭ. Akazałasia, siłaviki vyrašyli vydzielić spravu Zhirskaha ŭ asobnuju vytvorčaść — kab nie plamić viedamstva.
Ciapier MUS vyrašyŭ vystupić z zajavaju mienavita pra Zhirskaha.
Pavodle viedamstva, infarmacyja pra ŭdzieł supracoŭnika kryminalnaha vyšuku Dokšyckaha RAUS u ździajśnieńni kradziažoŭ z hruzavoha transpartu ŭ Aršanskim rajonie, «nie adpaviadaje rečaisnaści».
«Supracoŭnik kryminalnaha vyšuku Dokšyckaha RAUS Michaił Zhirski i jaho saŭdzielnik zatrymanyja ŭ mai biahučaha hoda za ździajśnieńnie machlarstva i vymahalnictva ŭ dačynieńni da minčanina, jaki, na dumku złamyśnikaŭ, zajmaŭsia niezakonnymi ździełkami z kryptavajutaj. Zhirski i jaho saŭdzielnik dali pryznalnyja pakazańni. Sudom Niaśvižskaha rajona nazvanyja asoby prysudžanyja da pazbaŭleńnia voli», — havorycca ŭ zajavie MUS.
Cikava, što kankretny termin Zhirskamu — 8 hadoŭ kałonii — MUS nie nazyvaje. Mahčyma, kab nie paćvierdzić toje, što «Naša Niva» nasamreč vałodaje infarmacyjaj. Prysud nie ŭstupiŭ u zakonnuju siłu i moža być abskardžany.
Kamientary