Čamu nie ŭratavali Alesia Puškina? Tłumačyć były kiraŭnik turemnaj miedycyny Biełarusi
U novym vypusku TOKu doktar i pravaabaronca Vasil Zavadski vykazaŭ svajo mierkavańnie, što na samaj spravie mahło adbycca ŭ turmie z mastakom Alesiem Puškinym.
Viadomy biełaruski mastak, žyvapisiec-nonkanfarmist, pierformier Aleś Puškin pamior 11 lipienia 2023 hoda na 58-m hodzie žyćcia ŭ reanimacyi hrodzienskaj balnicy, kudy jaho dastavili z turmy. U mastaka była prabadnaja jazva.
Vasil Zavadski bolš za 20 hadoŭ pracavaŭ u turemnaj miedycynie, ź jakich bolš za dziesiać byŭ jaje kiraŭnikom. Zychodziačy z svajho prafiesijnaha dośviedu, mužčyna ličyć, što palitviaźniu Alesiu Puškinu byŭ pamyłkova pastaŭleny dyjahnaz.
«Maje kalehi nie razabralisia ŭ tym, što jość prabadzieńnie jazvy. Lačyli jaho, chutčej za ŭsio, ad jakoha-niebudź asteachandrozu, radykulitu. Byli źviestki, što Aleś atrymlivaŭ niejkija supraćzapalenčyja srodki nakštałt ibuprafienu, abiazbolvajučyja srodki».
Jak tłumačyć doktar, isnuje «prapisnaja iścina» ŭ miedycynie — abiazbolvać nielha da toj pary, pakul nie budzie pastaŭleny dyjahnaz.
«Kali jość padazreńnie na niejkaje vostraje zachvorvańnie — «vostry žyvot» nazyvajecca — nielha abiazbolvać da taho, pakul nie budzie pastaŭleny dyjahnaz. Kali jość vostraja chirurhičnaja patałohija, tady apieratyŭnaje chirurhičnaje lačeńnie. A kali niama, tady možna abiazbolvajučyja srodki».
Pa słovach Zavadskaha, pa tym, što Alesiu Puškinu abiazbolvajučyja srodki byli pryznačany, možna mierkavać, što była dapuščana pamyłka ŭ dyjahnazie.
Śpiecyjalist zaŭvažaje, što ŭ jaho niama adkazu na pytańnie, čamu tak adbyłosia, ale z-za hetaj pamyłki byŭ stračany čas.
«My nie viedajem, u jakich abstavinach Aleś utrymlivaŭsia. Ja maju na ŭvazie, adzin jon byŭ u kamiery ci nie adzin. Zvyčajna, kali takoje adbyvajecca, to inšyja źniavolenyja źviartajuć uvahu i pačynajuć hrukacca, patrabavać, klikać lekara. I heta taksama dapamahaje časam. Kali jon byŭ adzin, to, kaniečnie, heta ŭskładniała situacyju», — vykazvaje svajo mierkavańnie Zavadski i dadaje:
«Jość infarmacyja, što Aleś sam kankretna ŭkazaŭ čas, u jaki jon adčuŭ hety rezki bol i prasiŭ miedycynskaj dapamohi. Lekar pryjšoŭ i daŭ jamu niejkuju tabletku. Heta jašče raz paćviardžaje majo mierkavańnie pra toje, što heta była pamyłka ŭ dyjahnazie.
Jon pozna trapiŭ da chirurhaŭ u stanie, kali pačałasia poliarhannaja niedastatkovaść. Nie zmahli, na žal, jaho vyratavać. Serca nie vytrymała. U anamniezie napisana, što pryčyna śmierci — «spyniłasia serca», ale heta možna ŭ kožnym vypadku pisać. U vypadku kožnaj śmierci serca tak ci inakš spyniajecca».
«Vysnova takaja, što heta pamyłka maich kaleh», — padsumoŭvaje Vasil Zavadski.
Hladzicie całkam:
Aleś Puškin: chto hety hienijalny mastak i palitviazień, što zhinuŭ u źniavoleńni
«Jon havaryŭ, što heta hulnia. Tut musiać być niejkija praviły. Ja ich vykonvaju»
Apošni pierformans Alesia Puškina
Aleś Puškin mučyŭsia strašnymi bolami, ale jaho nie špitalizavali. Chto načmied u turmie, dzie jon pamior
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary