Pracuje nie dla hrošaj, vizijanier i lotaje ŭ ekanom-kłasie, choć moža dazvolić sabie pryvatny samalot. IT-biznesmien raskazaŭ pra Dobkina

U novym vypusku tok-šou «Žyćcio-malina» Viktar Chamianok adznačyŭ, što siarod ludziej, na kaho jon raŭniajecca, znachodzicca Arkadź Dobkin.

«Dobkin zrabiŭ vialikaje imia, vialikuju kampaniju. Ja razumieju, nakolki heta było składana. I jon vizijanier. Jon heta robić nie dziela hrošaj, u jaho šmat sensu ŭ hetym», — adznačyŭ Chamianok.

Biznesmien zaŭvažaje: «Viadomaja bajka, što Dobkin da hetaha času lotaje ŭ ekanom-kłasie, choć moža dazvolić sabie private jet. Ja niekalki razoŭ mieŭ znosiny ź im. Heta nie pra babki. Tak, tam jość niejkija asabistyja ambicyi, ale jon rabiŭ heta ŭ tym liku i dla Biełarusi. I nasamreč JEPAM daŭ vielmi šmat ekanomicy krainy. Ja dumaju, što heta jaho drajviła vielmi mocna. I za heta ja jaho pavažaju».

Chamianok zhadvaje, što ŭ svoj čas partał Dev.by rabiŭ konkurs «Najlepšyja IT-kampanii Biełarusi». Jaho kampanija zaniała ŭ im pieršaje miesca ŭ katehoryi da 100 čałaviek, a JEPAM — u katehoryi zvyš 1000 čałaviek.

Biznesmien pryznajecca, što jamu zaŭsiody vielmi chaciełasia pahladzieć, jak pracuje JEPAM, jak kampanija ŭładkovanaja znutry. U vyniku jon zmoh trapić na pracu ŭ JEPAM:

«Ja dzieviać miesiacaŭ chadziŭ pa lesie. Raźvitvaŭsia z rozumam u tym liku, skidvaŭ vahu. Nu i ŭ niejki momant ja zrazumieŭ, što mianie staraja historyja adpuściła, i ja hatovy rabić niešta novaje. Ja napisaŭ post na fejsbuku, što, chłopcy, ja hatovy da novych ździajśnieńniaŭ, i na nastupny dzień mnie patelefanavaŭ Arkadź Michajłavič Dobkin i paklikaŭ u JEPAM».

Ale ŭ kampanii svajoj mary biznesmien prapracavaŭ tolki 10 miesiacaŭ.

«Ja pa dušy pradprymalnik, startapier, a JEPAM — heta ŭsio-taki ŭžo vialikaja takaja darosłaja karparacyja, dzie ŭsio vielmi pavolna, dzie jość šmat palityki ŭnutry. (…) Ja zrazumieŭ, što z maim tempieramientam ja nie zmahu chutka pamianiać kampaniju. (…)

Kali ty čałavieku pišaš, što treba stelefanavacca, vyrašyć piacichvilinnaje pytańnie, a jon tabie kaža, što praz dva tydni jość paŭhadziny pamiž sazvonami, i ŭsio heta raściahvajecca, raściahvajecca, adbyvajecca vielmi marudna, ja prosta nie vytrymaŭ», — tłumačyć pryčyny svajho zvalnieńnia Chamianok i zaŭvažaje, što z Dobkinym jany razyšlisia «vielmi dobra i z žadańniem praciahnuć uzajemadziejańnie ŭ budučyni».

Adznačym, što ŭ hetym miesiacy Newsweek uklučyŭ Arkadzia Dobkina ŭ śpis samych lubimych kiraŭnikoŭ. Jak piša vydańnie Dev.by, sami supracoŭniki JEPAM adznačajuć, što Dobkin «nie zvyčajny hiendyrektar, jon jak dziadula dla kožnaha z supracoŭnikaŭ».

«Raskazvajuć šmat historyj ab tym, jak jon siadzieŭ u samalotach pobač ź inžynierami JEPAM, abmieńvaŭsia mierkavańniami i naładžvaŭ suviazi. Usia sprava ŭ adnosinach da ludziej», — pisała vydańnie.

Kampaniju JEPAM čaćviorty hod zapar Newsweek uklučaje ŭ śpis samych lubimych miescaŭ pracy.

• 13
• 1
• 1
• 2
• 0
• 0
• 0
• 1